Habacuc 1 - La Sainte Bible en Langue Yipunu

¹ Abubu buvu bulumbi abu Nsambi amatsingula mubiyitsi Habacuc.

Mubiyitsi unengila enengili Nsambi umuwaka kalala

² Aa Fumu, te na temu yi nyugunengililanga na ndeʼ gugulu mbila ami notuwaka kalala jidikasi adi tuilabi?

³ Dibandu yi guinsingisi ulaba amagaa masungama? Dibandu yi guvu mbeji jipurulu? Nyikuanungu na nyilasungu dikasi, mitsundu na misosi bivu yiari na yiari.

⁴ Migaga migededulu na dusungugu dugelabini; batu babi beviolili batu basungama na dusungugu duivinsi kingu.

Kabusulu jiNsambi

⁵ Fumu amavosa rie: Gengilanu o malongu masusu! Kambuluanu na sutuanu! Nyirondi usala yisalu mu temu enu ayi dugogaru ne pa mutu odulasa yionyi kengili.

⁶ Nyiina, nyunengila bisi Babylone, batu abavu na bukanyi na dikasi, abelingi o biari bisusu uyenapatulanga biari abigaa biogu.

⁷ Bavu tindi batu baranga; na dunangu duogu bekipi yika dusungugu dujogu beni.

⁸ Bakabala bogu bewendi tindi mambangu ne uviolila magena na bavu balenga nderi baminsi batsisiga. Babeyitsi bogu babakabala bedumuyi nderi mbira ajiviki ayi oji.

⁹ Batu beni botsu bamakevega uyenakindanga; bavu nsunsuba uweʼ o gusu na begukiyi bakoli nderi yisieyi.

¹⁰ Bedesi bakaga na bepeji barumitsi. Bereki bivaga biotsu na berurungi bikadi na bebipatuli.

¹¹ Uvioga bevioyi nderi mungudi, bevayi mabi ava bevioyili, jogu beyitsi mangolu mogu nderi nsambi ogu.

Mubiyitsi unengila emuenengila Nsambi

¹² Aa Fumu Nsambi ami, aguami usiema, ndeʼ gumaba ubanda va dibandu. Jetu tugofu? Aa Fumu ndeʼ gumapalisa batu bebaba ulasa mukilu agu; ndeʼ aguvu dimanyi diami, gumabapalisa utukilisa.

¹³ Misu magu magogaru ugengila mabi na gugorungula ugengila mbivulu. Dibandu yi gugengila badunsitsi? Dibandu yi guba sui ava mutu mubi ebungili agusungama?

¹⁴ Dibandu yi guvayila mutu dedi mosi nana banyama bamamba nesi yilandila ayigaa na fumu?

¹⁵ Bisi Baby lone begaangi batu nderi banyama belobi; bamosi na diloba basusu na mbusa, bebasobini botsu mu biduba biogu. Belabingi nsangu nobueji;

¹⁶ la dibandu bevagulili mbusa tsiogu pagu tsiunyensa na biduba biogu pagu jibima bimbunga jiboti; bionyi bibaveyi banyama nesi biguji.

¹⁷ Bogaanganga banyama mu mbusa tsiogu mutubu? Bobokisanga batu tsiri ubalasa yingeba mutubu?