Galates 6 - La Sainte Bible en Langue Yipunu

Munasananu kata

¹ Baana bataji pa mutu amatsukugu mu dibi jenu aduvu na Yinyunyi yiNsambi musungiyianu na buranga. Kebananu, jenu beni yiri dugomangu wandi.

² Pa dumunasana kata adina dilasi yiri duidedili migaga miChrist.

³ Pa mutu etasi yiri aji mutu muneni, diuleba agaa muneni ekedunsa.

⁴ Mutu mutu akeluli mutsanu andi pa uwelimina asangili, ayamuegengila aguvu na mutu ususu.

⁵ Mutu mutu na uandi.

⁶ Oyiwiji Musamu Uboti agabili mulonsi andi maboti mandi motsu.

⁷ Duyakedunsa: Nsambi agedesu; ayi mutu evari ayina edili.

⁸ Pa mutu evari miaga amivu na tsombi miaga mieni miboli tumba oyivari miaga miboti edili magondi. Munongu mosi jandi oyidugusu nsala tsibumutu odila dufu tumba jandi oyidugusu nsala tsiYinyunyu yiNsambi, Yinyunyi omuvega monyu umutubu.

⁹ Kabogu tuyatoganu uvaga maboti, pa tugodeda tudilanu.

¹⁰ Kabogu ava tukivu na diweru tuvayilianu botsu maboti tumba sinsa viri baana bataji betu.

Malubu amesiti mbana ebaganini

¹¹ Gengilanu nana mirendu mivu mineni. Nyimadusonina na dikaka diami.

¹² Botsu abavu na dunangu bedugomi urebu na bedivayi yiri bagokuanu mu diambu dikurusu jiChrist.

¹³ Mu mbari jogu beni abamarebu bagekelisi migaga tumba berondi yiri jenu durebu yiri borungula usangila novosa rie: Bamarebu mu mbari tumabalonsa.

¹⁴ Mbe ka menu nyusangila yika mu diambu dikurusu jiFumu etu Jesus Christ Va kurusu eni nyimabokisa nsala tsibutamba buebubu la dibandu nsala tsibutamba buebubu tsigaa na tsongu ombu garni.

¹⁵ Durebu dugaa na diambu tumba mutu abi yisundu yigona.

¹⁶ Ombu jogu abeduki diruma diedidi ubi duvotsu na yingeba nesi ombu batu baNsambi botsu!

¹⁷ Ka muna ubueji gu pa mutu agomuendasa maguga; mivedi amivu nami milasi yiri nyiji muviga uJesus.

¹⁸ Maboti maFumu etu Jesus Christ mabi nenu, baana bataji! Amen!