Galates 5 - La Sainte Bible en Langue Yipunu

Kebananu na dujegusu duenu

¹ Dujegusu duvu netu, Christ amatujeyisa. Kabogu waranu, duyamuekekotisa obuviga.

² Guluanu! Menu Paul, nyidutsinguli rie: Pa dusinga urebu, Christ agorungula uduwamusa.

³ Nyimuedulubusa rie: Pa mutu esingi durebu akelisi migaga miotsu misusu wandi.

⁴ Jenu aduiduki migaga yiri dusungama na Nsambi dumakakana na Christ. Dumavinda maboti maNsambi.

⁵ Jetu tuna ditasa yiri Nsambi otusungiga nandi; tuidivivi na yitu na tumawarusu na mangolu maYinyunyi yiNsambi.

⁶ Ava tuifubinini mirima na Jesus Christ durebu dugaa na diambu. Adiviolila motsu la yitu ayifuningi na durondu.

⁷ Dibandu dienu dimabueji! Kabogu anyi amadudunsa? Dibandu yi dumabusila ngensa!

⁸ Adina disamavagu na Nsambi agumadunengila.

⁹ Mua pesu dufunusu duimatisi dipa diotsu.

¹⁰ Ne nana nyiduvayili yitu. Dinonga adivu netu na Fumu dipeyi yitu yieyiyi rie: dugofubana mirima na jandi oyidukungisi, ne aji nana nyi okilusu na Nsambi.

¹¹ Baana bataji dibandu yi nyikuanungu pa nyilonsi durebu? Mbe nana, malongi mami makurusu magomuevinu.

¹² Divu diwelimina yiri jogu abevayi kindu va gari enu bokevangula!

¹³ Baana bataji, jenu adumajegusu duyagengila dujegusu duenu nderi duna musuga uvaga nana duirondili tumba wamusananu na durondu.

¹⁴ Mu mbari migaga miotsu mimadugusu na diruma dimosi la didi rie: Rondanga mutu nagu nana guikerondila.

¹⁵ Tumba pa duigelisini nofuengasana kebananu yiri dugokebivisa jenu beni na jenu beni.

Durumu duYinyunyi yiNsambi na dubumutu

¹⁶ Kabogu nyivosi rie: Singanu yiri Yinyunyi yiNsambi odulonsanga na dugomueba na nsala tsibumutu.

¹⁷ Mu mbari bumutu buna nsala atsigesoyini na nsala tsiYinyunyi yiNsambi na Yinyunyi yieni ana nsala atsigesoyini na atsi bumutu; tsionyi tsigayini yiri dugomuevaga ama duirondi.

¹⁸ Pa Yinyunyi yiNsambi odulonsanga duisaa o tsi migaga.

¹⁹ Amavu na bumutu amama rie: buvuyisa na muinsi na bupumbi

²⁰ na dusambu dubakosi na mavanda na divina na mitsundu na ngusu na kabu na dugabu na miyitsa

²¹ na diwavi na malangi na uviosulila uji na mambu mamunongu eni. Nyibuesi udulubusa nana nyimaleduhibusila rie: Jogu abevayi minongu mimambu meni bagqjaba Durumu duNsambi.

²² Tumba Yinyunyi yiNsambi efunisi durondu na nsangu na duvotsu na pugu na yisagumunu na maboti na usigama

²³ na buvolambombu na usunda; vagaa mugaga aguigandisi motsu mana.

²⁴ Jogu abamafubana mirima na Jesus Christ bamabokisa bumutu na nsala tsibuonyi.

²⁵ Yinyunyi yiNsambi amatuvega monyu kabogu aturumi wandi.

²⁶ Tuyabanu na dunangu na tuyalasasananu maguga na tuyawavasananu.