Esdras 8 - La Sainte Bible en Langue Yipunu

Bambatsi baEsdras

¹ Amama la miina mabasefu bamikuta na bukulu bujogu abamarambuyila nami o Babylone va temu durumu dukaga Artaxerxes.

² Mu yifumba yiPinhas, Guerchom; Mu yifumba yiltamar, Daniel; Mu yifumba yiDavid, Hattouch;

³ Muana dibaala umosi uChekania; Mu yifumba yiParoch, Zacharie va mosi na kama na magumaranu mababaala bamu kuta andi;

⁴ Mu yifumba yiPahat-Moab, Eliohenai muana dibaala uZeraya va mosi na kama beji tsibabaala;

⁵ Mu yifumba yiZattou, Chekania muana dibaala uYaziel va mosi na kama yirieru tsibabaala;

⁶ Mu yifumba yiAdin, Ebed muana dibaala uYonatan va mosi na magumaranu mababaala;

⁷ Mu yifumba yiElam, Yechaya muana dibaala uAtalia va mosi na magumidusambuali mababaala;

⁸ Mu yifumba yiChefatia, Zebadia muana dibaala uMikael va mosi na magumidunana mababaala;

⁹ Mu yifumba yiYoab, Obadia muana dibaala uYehiel va mosi na kama beji na yigumi na yinana yibabaala;

¹⁰ Mu yifumba yiBani, Chelomit muana dibaala uYossifia va mosi na kama na magumasiamunu mababaala;

¹¹ Mu yifumba yiBebai, Zacharie muana dibaala uBebai va mosi na magumabeji na yinana yibabaala;

¹² Mu yifumba yiAzgad, Yohanan muana dibaala uHaccatan va mosi na kama na yigumi yibabaala;

¹³ Mu yifumba yiAdonicam, abamaba bangebi bayifumba yiAdonicam: Elifelet na Yeiel na Chemaya va mosi na magumasiamunu mababaala;

¹⁴ Mu yifumba yiBigvai, Outai na Zakour va mosi na magumidusambuali mababaala.

Ukunsa bekunsi muendu uwenda o Jerusalem

¹⁵ Nyimababengusana va mugulu mujamba uAhava na tumavaga milaku vana te na bilumbu birieru. Nyinogengila batu botsu nyisamalaba ne muisi Levi umosi va gari ogu.

¹⁶ Kabogu nyimaruma batu unengila basefu: Eliezer na Ariel na Chemaya na Elnatan na Yarib na Elnatan na Natan na Zacharie na Mechoullam va mosi na milonsi mimigaga: Yoyarib na Elnatan.

¹⁷ Nyimabasindiga ombu Iddo agumabanganga sefu jiKassifia na nyimabalonsa ama bamayetsingula Iddo na baana bataji bandi abamaleba basalitsi baNdagu Nsambi abamatsana o Kassifia, yiri batubeyili basalitsi uyisalanga o Ndagu Nsambi etu.

¹⁸ Nsambi amatubambanga kabogu bamatubeyila Cherebia agumaba na diela, jandi amasolulu mu yifumba yiMali agumaba mutegula uLevi muana dibaala uJacob na baana bandi bababaala na baana bataji bandi; dutalu duogu dumaba yigumi na yina na;

¹⁹ Hachabia na Yechaya mu yifumba yiMerari na baana bataji bandi na baana bogu bababaala bamaba va mosi nandi; dutalu duogu dumaba magumabeji.

²⁰ Amabega kama beji na magumabeji mababaala abamaba basalitsi baNdagu Nsambi aba David na basefu bandi bamakotisa mu yisalu, bamaba bisi Levi; mutu mutu na yisalu yiandi.

²¹ Vana mugula mujamba uAhava nyimavosa rie: Tubusianu uji ukesunsa va gusu Nsambi etu yiri otulinsa milingu miboti, nesi jetu nesi baana betu nesi jogu abavu netu.

²² Nyulaba yisonyi uvonda kaga bagora na babeyitsi bamakalu aboyenatukelisanga muna nsila yiri bavinitsi bagotubemba mu mbari tumaletsingula kaga rie: Nsambi etu ebambi jogu abemurondi tumba kabu andi jiulasu na tindi mangolu ombu jogu abemuliyili nsima.

²³ La dibandu tumabusila uji na tumasambila Nsambi etu. Jandi amatugulu.

²⁴ Nyimasola yigumi na bivunda bibeji bibavagulitsi bapagu: Cherebia na Hachabia na yigumi yibaana bataji bogu.

²⁵ Va misu mogu nyimapitsanga lora jivema na lora na bisalulu abi kaga na milonsi miandi na basefu bandi na baIsrael basusu bamavega usala o Ndagu Nsambi etu.

²⁶ Nyimabawakisa magumabeji matona tsilora tsivema na tona yirieru tsibisalulu bilora tsivema

²⁷ na magumabeji mamamoyi malora amamaba na dufunu dutosini mbongu tsilora na bisanga bibeji bikunga ajimaba vedi vedi na dufunu duviolila lora.

²⁸ Mbana nyimabatsingula rie: Dedi nana dumawakusulu ombu Fumu, bisalulu biebibi bimawakusu wandi. Lora na lora jivema bivu pagu jitondini jiFumu Nsambi jibataji benu.

²⁹ Bikelisianu na buranga te na dutola o Jerusalem mbana dubipitsa va misu mabivunda bibavagulitsi bapagu na bisi Levi na va gusu basefu bamikuta miIsrael abobikotisa o bibuku biNdagu Nsambi.

³⁰ Mbana bavagulitsi bapagu na bisi Levi bamabonga biotsu bilora jivema na lora na bisalulu; bamayenabibega o Jerusalem o Ndagu Fumu Nsambi etu.

Utola betoli o Jerusalem

³¹ Tumarambuyila va mujamba uAhava uwenda o Jerusalem mu yilumbu yiyigumi na bibeji bitsungi jitega. Nsambi amatubamba na amatuwaka kalala ombu bavinitsi nesi bakinditsi abamatulasa maguga.

³² Tumatola o Jerusalem na tumavuma bilumbu birieru.

³³ Yilumbu ayimuina tumapitsa lora jivema na lora na bisalulu o Ndagu Nsambi; mbana tumabiwakisa ombu Meremot muana dibaala uOuria agumaba muvagulitsi upagu nombu Elazar muana dibaala uPinhas nombu bisi Levi: Yozabad muana dibaala uYechoua na Noadia muana dibaala uBinnoui.

³⁴ Biotsu bimagengulu na bimatalu mbana bimasonu.

³⁵ Jogu abamaruyila o buviga bamavagulila Nsambi Israel pagu jiunyensa; yigumi na balumi babeji babangombi na magumidufu na balumi basiamunu babindombu na magumidusambuali na yisambuali yibaana babindombu na yigumi na balumi babeji babinsabi bipagu jiutsindula dibumi. Biotsu bina bimavagulu pagu atsimasielusunu va gusu Fumu.

³⁶ Bamatolisa miganda mikaga ombu batu bandi nombu barumitsi badisimu digunu diEuphrate. Kabogu bamawamusa baIsrael na bisalu biogu biNdagu Nsambi.