Esdras 7 - La Sainte Bible en Langue Yipunu

Esdras muvagulitsi upagu

¹ Mambu meni manovioga mu temu du rumu duArtaxerxes kaga jiPerse, Esdras amaruga o Babylone. Amaba muana dibaala uSeraya muana dibaala uAzaria muana dibaala uHilquia

² muana dibaala uChalloum muana dibaala uSadoc muana dibaala uAhitoub

³ muana dibaala uAmaria muana dibaala uAzaria muana dibaala uMerayot

⁴ muana dibaala uZeraya muana dibaala uOuzi muana dibaala uBouqui

⁵ muana dibaala uAbichoua muana dibaala uPinhas muana dibaala uElazar muana dibaala uAaron agumaba yivunda yibavagulitsi bapagu.

⁶ Esdras eni agumaruyila o Babylone, amaba musonitsi agumaba na dujabu dumigaga miMoise ami Fumu Nsambi Israel amavega. Mangolu ma Fumu Nsambi andi mamaba nandi te na kaga amamusingisa motsu ama amamuwivulanga.

⁷ BaIsrael bapuela na bavagulitsi bapagu na bisi Levi na bawimbitsi na bakelisi bamakotulu na basalitsi baNdagu Nsambi bamawenda o Jerusalem mu yilima yimusambuali bidurumu duArtaxerxes.

⁸ Esdras wandi amatola o Jerusalem mu tsungi jimuranu.

⁹ Amarambuyila o Babylone mu yilumbu yitega yitsungi jitega na amatola o Jerusalem mu yilumbu yitega yitsungi jimuranu mu mbari Nsambi andi amamubamba tindi umubamba.

¹⁰ Esdras amakevega na murima andi uotsu uwiji nokipanga migaga miFumu nolonsanga baIsrael migaga na maruma.

Bisalu abi Artaxerxes amavega Esdras

¹¹ Agugu la muganda agu kaga Artaxerxes amavega ombu Esdras muvagulitsi upagu aguvu musonitsi agumalonsanga maruma na migaga miFumu ombu baIsrael:

¹² Menu Artaxerxes kaga jibakaga nyisoni muganda egugu ombu Esdras muvagulitsi upagu aguvu musonitsi aguvu na dujabu dumigaga miNsambi aguvu o julu.

¹³ Nyiveyi musuga uwenda na baIsrael botsu nesi bavagulitsi bapagu nesi bisi Levi abavu o bufumu buami; diwendi rie: botsu abavu bakunsama uwenda nagu o Jerusalem.

¹⁴ Jetu na yisambuali yiami yimilonsi tuigusi ndiyi uyenatsiengilanga Juda na Jerusalem uyelaba nana migaga miNsambi agu mikipu lu.

¹⁵ Guyenabeganga lora na lora jivema abi jetu na milonsi miami tuiveyi Nsambi Israel aguvu na Ndagu andi o Jerusalem.

¹⁶ Guyenabeganga wandi lora jiotsu jivema na lora abi gudila o biari biotsu biBabylone na miensili mitondini ami batu na bavagulitsi bapagu uru ngulila Ndagu Nsambi o Jerusalem.

¹⁷ Kabogu na lora na lora jivema gusumbila balumi babangombi na bahimi babindombu na baana babindombu na biotsu abivu biwelimina uva gulila pagu tsitsangu na tsiunu; gukavagula biotsu bina va yinyensulu yipagu ayivu o Ndagu Nsambi agu o Jerusalem.

¹⁸ Mbana je nu na bambatsi bagu dukavaga adivu diwelimina na lora jivema na lora atsiusalulu, sinsa viri rangiminanu duganu duNsambi eni.

¹⁹ Gukasunsa bisalulu biNdagu Nsambi abi guma vegu o Ndagu Nsambi o Jerusalem.

²⁰ Tsiotsu tsisusu atsi guba na nsala tsiufutu na kaga.

²¹ Menu kaga Artaxerxes nyirumi jenu bakelisi babilundulu biami aduitsani o disimu dina diEuphrate rie: Pa Esdras muvagulitsi upagu aguvu musonitsi aguvu na dujabu dumigaga miNsambi aguvu o julu oruga ombu genu dukamuwamusanga.

²² Ana musuga udila te na tosini yirieru tsikilu tsilora jivema na magumarieru matosini tsikilu tsible na tosini jina tsimbuta tsimalamu na tosini jina tsimbuta tsimatsi na musayi uwelimina.

²³ Motsu ama Nsambi aguvu o julu amaruma mu diambu diNdagu andi madugusu mbangu yiri Nsambi eni agonyoyila bufumu buami nesi menu nesi bategula bami.

²⁴ Va julu vana tuidulubusi duyafutisa nesi bavagulitsi bapagu nesi bisi Levi nesi bawimbitsi nesi bakelisi bamakotulu nesibasalitsi baNdagu Nsambi bamunongu na munongu ne dumandu iie lepu ne musuga uvioga.

²⁵ Mbe ka ndeʼ Esdras, na diela diNsambi adimasonu mu dibuku adivu nagu, sola bansonsi na bivovi abotabulilanga batu bansonsi o disimu dina diEuphrate, sinsa viri jogu abejabi migaga miNsambi agu; gukalonsa abagemijabi mionyi.

²⁶ Uotsu agugodedila tindi udedila migaga miNsambi agu na mikaga adili mbela dufu vo apalusu o bulongu vo apatulu bima biandi vo akotusu o tsugu.

Esdras ugabusila egabusili Nsambi diboti

²⁷ Esdras amagamuga rie: Diboti ombu Fumu Nsambi bataji betu! Amavega kaga ditasa ukipa Ndagu andi ajivu o Jerusalem.

²⁸ Gumandilisa maboti makaga na mamilonsi miandi na mabivunda bisusu Na mangolu magu Fumu Nsambi ami nyimagukiga basefu baIsrael uwenda nami.