Esdras 5 - La Sainte Bible en Langue Yipunu

¹ Tumba yilumbu yimosi Aggee mubiyitsi na Zacharie mubiyitsi bamavosa na baJuif abamaba o Juda no Jerusalem mambu maNsambi Israel agumaba Nsambi ogu.

² Mbana Zorobabel muana dibaala uChealtiel na Yechoua muana dibaala uYossadac bamabanda urungulila Ndagu Nsambi o Jerusalem va mosi na babiyitsi baNsambi.

³ Vana temu eni Tattenai murumitsi uyiari yina yiEuphrate na Chetar-Boznai na bambatsi bogu bamabarasuna uyebawivula rie: Anyi amaduvega musuga urungulila Ndagu Nsambi nomuereliga bivaga?

⁴ Bamabuesa rie: Tuveyianu miina mabatu aberungi Ndagu ejiji.

⁵ Tumba Nsambi amaba na baJuif na ba-samagandusu usalanga mu mbari bamatindila muganda ombu kaga Darius; uviva bevivi kabusulu andi.

BaJuif utinda betindi malubu ombu kaga Darius

⁶ Muganda egugu umatindu ombu kaga Darius na Tattenai murumitsi udisimu dina diEuphrate na Chetar-Boznai na bambatsi bogu abamatsananga o disimu digunu.

⁷ Muna muganda eni bamamusonina mambu memama rie: Mambolu ombu gagu kaga Darius!

⁸ Kaga ajabi yiri jetu tumawenda o Juda o Ndagu Nsambi. Urungu jirungu na mamanyi maneni na mikambu mimaviosu. Usala besali buranga na biwendi mbangu!

⁹ Tumawivula bivunda bivu rie: Anyi amaduvega musuga urungulila Ndagu ejiji nomuereliga bivaga?

¹⁰ Tumabawivula nesi miina mogu yiri tugutsingula monyi na muna muganda tumasona miina mabarumitsi babisalu.

¹¹ Jogu bamatuwagula rie: Jetu tuvu basalitsi baNsambi julu na butamba, urungulila tuirungulili Ndagu ajimarungu kala kala na kaga jiIsrael.

¹² Tumba bataji betu banonyoyisa Nsambi aguvu o julu, jandi amabawakisa ombu Nabucodonosor kaga jiBabylone agumaba muisi Chaldee, jandi amapansa Ndagu ejiji na amabega batu baviga o Babylone.

¹³ Tumba yilima yitega yidurumu duandi o Babylone kaga Cyrus amaruma batu urungulila Ndagu Nsambi.

¹⁴ Kaga Nabucodonosor amagusula bisalulu bilora na bilora jivema abimaba o Ndagu Nsambi o Jerusalem noyebikotisa o ndagu nsambi jiBabylone. Kaga Cyrus amabipalisa o ndagu nsambi jiBabylone na amabiwakisa ombu mutu diina diandi Chechebassar agu amavaga murumitsi uJuda.

¹⁵ Amamuruma rie: Bonga bisalulu bieni, yebisunsa o Ndagu Nsambi o Jerusalem yiri Ndagu Nsambi jiumuerungululu, vana mbura aji jimaleba.

¹⁶ Chechebassar eni amaruga na amamuerunga yibuga yiNdagu Nsambi o Jerusalem; ubanda va temu eni te na namunyi urungu jirungu, jisakasuka.

¹⁷ Kabogu pa divu diwelimina nagu barombi mu dibuku didubayi dibataji bagu o Babylone uyelaba yeri kaga Cyrus amavega diruma urungulila Ndagu Nsambi o Jerusalem. Mbana gukatusonina adi guirondi yiri tuvaga.