Esdras 4 - La Sainte Bible en Langue Yipunu

Bavinitsi babaJuif

¹ Bisi bulongu abamavina baJuda na baBenjamin bamagulu yiri abamaba o bu viga urungulila berungulili Ndagu Nsambi jiFumu Nsambi Israel.

² Bamarasuna Zorobabel na basefu bamikuta na bamabatsingula rie: Turunga nenu uduwamusa mu mbari jetu wetu tuiyitsi Nsambi enu na tuimuvagulili pagu tsiunyensa ubanda va temu jiAssarhaddon, kaga jiAssyrie agumatubega gunu.

³ Tumba Zorobabel na Yechoua na basefu basusu bamikuta miIsrael bamawaka rie: Tsiri yisalu yijetu nenu urungila Nsambi etu Ndagu. Yika jetu turungila Fumu Nsambi Israel Ndagu. Kaga Cyrus aguvu kaga jiPerse amaturuma nana.

⁴ Kabogu bisi bulongu bamakevega ulasa baJuif goma nobatutsa umuerunga Ndagu Nsambi.

⁵ Ubanda na durumu duCyrus kaga jiPerse te na durumu duDarius bamafutanga batu ugubitsanga yisalu yibaJuif.

BaJuif ubusa bebusi kaga Artaxerxes

⁶ Va dibandu didurumu duXerxes, bavini-tsi babaJuif bamamusonina mfuengululu atsi amafuengilila baJuda na bisi Jerusalem.

⁷ Va durumu duArtaxerxes, kaga jiPerse Bichelam na Mitredat na Tabeel na bambatsi bogu basusu bamamusonina muganda agu masonugu mu mbembu jiArameen.

⁸ Rehoum agumaba murumitsi na Chi mechai agumaba musonitsi, amasonina kaga Artaxerxes muganda mu diambu diJerusalem. Muganda eni umabanda rie:

⁹ Rehoum aguvu murumitsi na Chimechai musonitsi andi na bambatsi bogu basusu ba biari biDin na Afarsatak na Tarpel na Afaras na Erek na Babylone na Suse na Deha na Elam

¹⁰ mu diina dibisi malongu masusu aba Asnappar aguvu muneni agumababega nobasunsa o musiengi uSamarie nesi o mbura tsisusu o yiari yimujamba Euphrate.

¹¹ Muganda eni umasonugu rie: Aa kaga Artaxerxes basalitsi bagu na batu badisimu dina diEuphrate begutindili mambolu.

¹² Kaga ajabi yiri baJuif abamarambuyila ombu gagu bamatola ombu getu o Jerusalem na urungulila berungulili musiengi umimbini. Banolonda bibuga urungulila berungulili bi vaga.

¹³ Kabogu kaga ajabi yiri pa musiengi eni umarungululu na pa bivaga biuonyi bima relugu, bagomuefuta dumandu nesi lepu nesi musuga uvioga na kaga agomuedilanga bado li.

¹⁴ Kabogu jetu tuji basalitsi bagu tugorungula uwarila yiri gulensu la dibandu tuigutindili misamu miemimi.

¹⁵ Bagengili mu dibuku didubayi; gulaba yiri bisi musiengi eni bavu mimbini na bamalensanga bakaga na barumitsi na bamabanganga yika mimbini na mimbini. La dibandu musiengi eni umapansulu.

¹⁶ Tuigulubusi yiri pa musiengi eni umarungululu na pa bivaga bi-uonyi bimamuerelugu gugomueba fumu jiyiari yieni yiotsu.

Kabusulu jikaga Artaxerxes

¹⁷ Kaga amatinda kabusulu ejiji rie: Ombu Rehoum aguvu murumitsi nombu Chimechai musonitsi andi na bambatsi bogu basusu abetsaniningi o Samarie no mbura tsisusu o disimu dina diEuphrate.

¹⁸ Nyudutindili mambolu. Muganda agu dumatindila unokalulu uma tangulu.

¹⁹ Nyimaruma batu ugengila na ba malaba yiri kala kala bisi musiengi eni bama lensanga bakaga na bamabanganga mimbini na mimbini.

²⁰ Nyilabi wandi o Jerusalem umaba bakaga bamangolu abamaba fumu tsi bulongu buotsu te no disimu dina diEuphrate abamafutulu dumandu na lepu na musuga uvioga.

²¹ Kabogu gandisanu baJuif, bayaru ngulila musiengi te na nyibavega musuga.

²² Kebananu, duyagungisa diambu! Dibandu yikaga olensulu?

²³ Muganda ukaga Artaxerxes unoranguva gusu Rehoum na Chimechai musonitsi andi na bambatsi bogu, bamalensa uwenda o Jerusalem na bamagandisa baJuif

Ubanda bebandi urangulila Ndagu Nsambi

²⁴ Kabogu yisalu yiNdagu Nsambi o Jerusalem yimasikugu te na yilima yimubeji bidurumu duDarius kaga jiPerse.