Esaie 9 - La Sainte Bible en Langue Yipunu

¹ Batu abamaba o tsi pisama bamalaba yijalala yineni; jogu abamabatsana o bulongu bupisama bamamonutsu yijalala yineni.

² Fumu ndeʼ guifunisi batu na guibalasi nsangu jineni, besangili va gusu agu dedi mosi nana besangilili va temu dutsonsugu na nana begamuyili na nsangu ava begabinini abimakindu.

³ Yilala yitsira ayi bamanangula nesi mikasa ami bamadimbu nesi tsilu tsimukuanitsi ndeʼ guibipansi namunyi nana gumapansila bisi Madian.

⁴ Bapondu na bikutu bibagora abimagolusunu malungu biunyensu na biusielusunu na muji.

⁵ Muana umatuburulu, muana dibaala umatuvegu, durumu duba va julu muru andi. Bomunengilanga rie: Usimunu, Mulongitsi, Nsambi Mangolu, Taji Mutubu, Kaga Duvotsu.

⁶ Oroyisa bufumu na owarisa duvotsu adugoba na disukusulu. Otsana va yitsiga yiDavid na orumanga nowarisanga bufumu buandi na musuga na dusungugu, ubanda namunyi te no mutubu. Adina Fumu Mabadi ovaganga na durondu duandi duneni.

Nguangu jiFumu

⁷ Fumu amatinda dilubu ombu bategula baJacob: dimagaaga bufumu buIsrael.

⁸ Batu botsu bodijaba nesi bisi Efraim na bisi Samarie. Abavu na dunangu nokerutsula bevosi rie:

⁹ Birika bimapansiga, turunga yika na mamanyi; misikomora mimawangu, tuvinsa misedera.

¹⁰ Kabogu Fumu ordiga muvinitsi ogu Ressin; owarisa bavinitsi bogu.

¹¹ Bisi Syrie boruyila o gusu, baPhilistin boruyila o nsima; bobelisa baIsrael. Ne nana kabu Fumu jigosaguga, via, nguangu jikivu va dikaka diandi.

¹² Batu bagegabusi ombu jandi oyibadimbi na bagerombi Fumu Mabadi.

¹³ Fumu opatula baIsrael miuru na miyila, nesi metu mambari nesi bilelenga; motsu mana mu yilumbu yimosi.

¹⁴ Bivunda na barumitsi bavu muru. Babiyitsi abefuringi bavu muyila.

¹⁵ Abewendisi batu beni babatsiemusi abesingi uwendusu nogu beketsiemusa.

¹⁶ La dibandu Fumu agelabi nsangu na bafudu bogu na agelasi bisiana nesi bakuili bogu yingeba mu mbari botsu bavu babi na bavayitsi bamasumu; botsu bevosi tindi nsoruru. Ne nana kabu Fumu jigosaguga, via, nguagu jikivu va dikaka diandi.

¹⁷ Mbivulu tsisielisini nderi muji aguinyensi kengitsi na matsiendi; aguisielisini nesi musiru, aguirongubusi nsumbili.

¹⁸ Kabu Fumu Mabadi jirimbusi bulongu na batu bavu nderi yima ayi muji usielasana; ne mutu umosi agewaki mutu nandi kalala.

¹⁹ Bekindi o yiari yimabaala ne nana bana nsala; bejangingi o yiari yimagetu ne nana bagegukuru; mutu mutu etumuni mutu nandi.

²⁰ Manasse etoyi na Efraim, Efraim etoyi na Manasse; botsu babeji betoyi na baJuda. Ne nana kabu Fumu jigosaguga, via, nguangu jikivu va dikaka diandi.