Esaie 64 - La Sainte Bible en Langue Yipunu

¹ Guba nana muji aguivendumusi mikansu na nana mufu aguimatili mu mamba amefunduyi. Bavinitsi bagu bojaba yiri guvu Nsambi. Bisi malongu boregama va gusu agu,

² ava guvayila bimaga bimasundila. Nyiina, gumasunduga na mikongu mimakungusu va gusu agu.

³ Na kala basamalewiji na kala basamagulu yika ndeʼ agumarungula uvayila abamakevega ombu gagu bimaga bimunongu eni.

⁴ Ndeʼ guibengusini abedugusu duganu duagu na nsangu abetasi uvioyila mu mansila ama gumasola. Gumanyoga mu mbari tumaba na mbela. Utsoga tuitsoyingi te na tuwaku kalala.

⁵ Jetu botsu tumaba bango muinsi na dusungugu duetu dumaba nderi yiduaru ayivu muinsi; mbela tsietu tsituvembuli nderi kambagaji.

⁶ Vagaa mutu oyivosi nagu oyirondi ubambana nagu. La dibandu gumatusueyila yinsi yiagu na gumatusingisa ubungana mu diambu dimabi metu.

⁷ Aa Fumu, ndeʼ guvu taji etu; jetu tuvu nana diga, ndeʼ agumatubumba, jetu botsu tuvu yisalu yiagu.

⁸ Aa Fumu, tugula kabu agu, guyarangimina dibi dietu mutubu! Tasa yiri jetu botsu tuvu batu bagu!

⁹ Misiengi miagu miyingitsi mimakaluga mbura atsigaa na mamba, Jerusalem uvu mbura ajigaa na mamba, Sion uvu mududu.

¹⁰ Ndagu jiNsambi etu jimaba na kembu aji bataji betu bamaguyitsilanga jimanyensu. Mbura aji tuirondi tindi uronda jivu bivongu.

¹¹ Aa Fumu, gugekipi motsu mana? Guba sui notunyongisa ne uviolila?