Esaie 63 - La Sainte Bible en Langue Yipunu

Yilumbu yikabusulu pila

¹ Anyi eruyili o Edom? Bosra na biduaru bibenga abivedimi? Uruga eruyi na tuyitsi ajilasi mangolu mandi. Fumu amavosa rie: Menu agumavangana udugobula nolasa dusungugu ombu bisi malongu.

² Dibandu yi biduaru biagu bivu bibenga? Dibandu yi biduaru biagu bivu nderi bijandi oyigami malamu?

³ Nyimaba waʼ pinsa ugamuga mirayisan ne mutu mosi asamaba nami; nyimamagama na kabu ami. Nyimatsiarila batu na kabu ami jineni; malungu mogu mamanyansuga mu biduaru biami na nyimabibivisa biotsu.

⁴ Yilumbu yikabusulu pila yimasuegu o murima ami, yilima yiami yidugobutsu yimaruga.

⁵ Nyimagengila, vasamaba mutu ukuamusa; nyimakambulu, mutu asamakuarisa kabogu gogu ami umakuamusa na kabu ami jineni jimaba yisiku yiami.

⁶ Na kabu ami nyimatsiarila batu bapuela na nyimabalansa na kabu ami jineni, na nyimawitila malungu mogu va butamba.

Maboti maFumu

⁷ Nyunyavisa maboti maFumu nesi duyitsu duFumu mu diambu dimotsu ama Fumu amatuvayila; nyuvosa maboti mandi maneni ama amavayila bisi ndagu Israel, ama amabavayila na yingeba na durondu duandi duneni.

⁸ Amavosa mu diambu dibaIsrael rie: Dingensa bavu batu bami, bavu baana abagondunsa! Kabogu amaba Mugobutsi ogu.

⁹ Mu munyongu ogu uotsu basamagambu na duwamusu, yiansa yiandi yimabawaka kalala; jaʼ beni amabagobula na durondu duandi na yingeba yiandi na amabawarisanga temu tsiotsu.

¹⁰ Tumba bamaba mimbini na bamanyongisa Yinyunyi yiandi. Amakaluga muvinitsi ogu na amatoga nogu.

¹¹ Mbana batu bandi bamarangimina temu tsikala atsi bamawendusulu na Moise: na bamawivula rie: Agumasabusa batu bandi mubu aka?

¹² Jandi amabanganga va mabaala maMoise ulasa mangolu mandi. Amapasa mamba va misu mabatu bandi anana amadilila diina diduyitsu mutubu.

¹³ Amabawendisa va gari mamba dedi mosi nana kabala ewendingi va mbura atsigaa na mamba; basamaduku mabaku.

¹⁴ Nana mugamba uvu sui o yibususu anana Yinyunyi yiFumu amababeyila o yivumu. Anana Fumu guiwendisili batu bagu anana gumadilila diina diduyitsu mutubu.

Ndembugulu

¹⁵ Ndeʼ aguvu va yitsiga yiagu yibunsambi ayivu na bundumba o julu, tugengila nana tuvu! Yiusila yiagu na mangolu magu bika? Guyatsikadana utulasa durondu duagu.

¹⁶ Mu mbari guvu taji etu. Taji etu Abraham agetujabi na Jacob agetukipi, tumba ndeʼ Fumu guvu taji etu ubanda kala kala guinengulungu Mugobutsi etu.

¹⁷ Aa Fumu, dibandu yi gumatukakasana vala na mansila magu? Dibandu yi gumagalisila mirima mietu yiri tuisaa na goma agu? Mu diambu didurondu duagu gabuga ombu getu, jetu basalitsi bagu abavu abagu!

¹⁸ Jetu batu bagu tumadila bulongu yika mua temu; Ndagu agu jimatsiarulu na baviniti betu.

¹⁹ Yitsingu yineni jetu tuvu batu aba ndeʼ gugerumi, nesi abagenengulu na diina diagu! Aa mbe gumapasa julu na mbe gumasunduga! Va gusu agu mikongu mbe miukungusu!