Esaie 61 - La Sainte Bible en Langue Yipunu

Yilumbu yiFumu, yisalu yiandi, malongi mandi

¹ Yinyunyi yiFumu aguvu Fumu avu nami, mu mbari Fumu amambiatsa usamuna Musamu Uboti ombu jogu abamakambulu; amansindiga ubembiga abavu na mirima mibuliga, notubula dujegusu ombu bakoli, nowaka baviga kalala;

² utubula yilima ayi Fumu ogobulila abandi na yilumbu ayi Nsambi etu ogabusilila bavinitsi bandi pila; nobembiga abavu na munyongu;

³ uvega abelabi munyongu o Sion dugaba va yivinga yidibufu na muyombu unsangu va yivinga yibukuili na yiduaru yiduyitsu va yivinga yimurima agumabuliga. Boba nderi miri ami Fumu jaʼ beni amavara. Bovaga amavu mawelimina na Nsambi oyitsu mu abi amasala.

⁴ Bomuerungulila na bivongu bigulu, bomuereliga mandagu amamapansiga kala, bomuerungulila misiengi amimabungu nopansu kala.

⁵ Benyi boba vana na bobungulanga migamba mienu, bisi biari bisusu boba bafutsitsi benu na basalitsi benu bamanungi marayisan

⁶ Jenu beni dunengulungu: Bavagulitsi bapagu baFumu. Bodurangunanga: Basalitsi baNsambi etu. Dujanganga busina bumalongu na dubanganga na nsangu na buonyi.

⁷ Fumu amavosa rie: Dumalasungu tindi yisonyi, nesi temu beji. Batu bamadufutila mateji udulensa. La dibandu dusakulu kumbu beji o bulongu bubatu bebana, ubanda va temu eni dulabanga nsangu.

⁸ Menu Fumu, nyirondi dusungugu, nyivini abekindi na dikasi; ngotamba uduvega yisaku yienu na nyuvangana pangini jimutubu nenu.

⁹ Dilongu dienu diuba na diduma va gari malongu masusu nesi bategula benu vagari batu basusu. Botsu abobalaba bojaba yin bavu dilongu adi Fumu amagabila miula.

Duimbu dukabusulu tsimaboti

¹⁰ Nyusangilanga Fumu na murima ubasa na nsangu jiNsambi ami. Amanduisa biduaru bidugobutsu, amakumba yijungi yidusungugu, nyina nsangu jiyiwela-mugetu ayimakeduisa dugaba. Nyina nsangu jimugatsi andi agumakeduisa misanga miandi.

¹¹ Nana butamba buibendisili bivaru na nana nungi jibendisili tsangu dedi mosi Fumu Nsambi ofunisila dusungugu na duyitsu mu malongu motsu.