Esaie 6 - La Sainte Bible en Langue Yipunu

Esaie ekevega ombu Fumu

¹ Yilima yidufu dukaga Ozias, nyimalaba Fumu atsana va yitsiga yibufumu ayimaba o julu na mulemba uyijungi yiandi umabasa Ndagu Nsambi.

² Biansa bimaba va julu andi; yiansa yiansa yimaba na mapapi masiamunu: mapapi mabeji ama bimakubiyilanga binsi biogu, mapapi masusu mabeji ama bimakubiyilanga nyuru tsiogu na masusu mabeji ama bimapurumuyilanga.

³ Jogu botsu bamagamuganga rie: Ka muna munerii gu Fumu Mabadi avu! Bulongu buotsu bubasa de na bundumba buandi.

⁴ Mufi mogu mamansiegarana, maguyi mamakungusu mu mabandu mogu na Ndagu Nsambi jiotsu jimabasa na nsumbili.

⁵ Mbana nyimavosa rie: Ka muna ubiva gu nyilabi! Nyimatsiemuga mu mbari bilila biami bivu muinsi na nyitsani va gari batu aba bilila biogu bivu muihsi. Kabogu nyimalaba Kaga aguvu Fumu Mabadi na misu mami.

⁶ Tumba yiansa yimosi yimapurumuga na yimarugasana ombu gami na yibongulu yimuj i va dikaka diandi ayi amabongila digala dimuji diyinyensulii yipagu.

⁷ Yimabemba munu ami na yimavosa rie: Digala diedidi dimabemba bilila biagu; mabi magu mamagusulu na masumu magu mamaliomusu.

⁸ Nyimagulu diufi diFumu, amawivula rie: Anyi nyusindiga? Anyi oba yilumbi yietu? Nyimawagula rie: Meʼ janduʼgu, nsindiyi!

⁹ Mbana amamuevosa rie: Wenda yetsingula batu beni rie: Dugulu yika ugulu tumba dugotsiyisa; dugengila yika ugengila tumba dugolaba.

¹⁰ Rombisa mirima mibatu bebaba ugala, dibiga matuji mogu yiri bakelaba na bakegulu na baketsiyisa na bekekalula diela na bakebeluga.

¹¹ Nyimawivula rie: Fumu, te na temu yi? Amawagula rie: Te na misiengi miusiala mududu na migomueba na batu te na vagomueba ne mutu umosi o mandagu; dilongu diotsu yika duvovu.

¹² Nyiina, Fumu okakasana bisi bulongu. Bulongu buotsu buba tindi bugumuga.

¹³ Ne pa vakivu mua bansialutsu, jogu wogu bobungu. Tumba nana miterabeta na misena misiali yika bisindu abiubenda bakola dedi mosi batu beni boba na bategula abavu aba Nsambi.