Esaie 59 - La Sainte Bible en Langue Yipunu

Amekakisini Nsambi na batu

¹ Je dikaka diFumu divu difurama yiri digodugobula? Je avu madiba yiri agedugulu?

² Tumba mabi menu medukakisini na Nsambi enu; mu diambu dimasumu menu edusuemi na memugubitsi udugulu.

³ Makaka menu mamabivusu na malungu nesi milembu mienu mimabivusu na mabi; miunu mienu mivosingi mamfurulu na ndimi tsienu tsipalisinga mabi.

⁴ Ne mutu mosi va gari enu agaa na dusungugu ava efundili mutu ne mutu mosi va gari enu agetabuli bunsonsi buwelimina; duikipi mambu makulini na duifuringi; duifunisingi mabi duidunsingi batu na bifu bienu.

^5-6 Duibandimini makeji mamuemfu, duirungi nsanda tsidibuba. Oyiji makeji efu; na pa obula dimosi nyoga jipali. Nsanda tsienu tsigaa biduaru mutu agorungula ugumba jionyi. Bisalu bienu bivu yika bukongu na bukongu.

⁷ Duiwendi mambangu uyenavaganga mabi na dugetambi nobokanga batu abagaa na mbela; matasa menu mavu yika mabi na mabi duisili dubungu na bivongu mu mbura tsiotsu atsi duivioyingi.

⁸ Dugejabi duvotsu na bifu bienu bigaa bisungama; duirondi mansila marekama: oyimavioyili agojaba duvotsu, via!

Batu baNsambi bejabi nsimbulu tsiogu

⁹ La dibandu dugobutsu dumakakinina netu na dusungugu dugelabini. Tuivivi yijalala tumba tuilabi yika pisama. Tuivivi wisi utebuga tumba tuilingi o tsi pisama.

¹⁰ Tuibembitini nderi bidunga mu mugula yibaga, tuibembitini nderi mutu aguaa na misu. Va muangulu tuiduku dibaku nderi mukolu.

¹¹ Ne pa tuji buranga tuvu nderi magena, amegumbingi nderi mabembi; tuivivi uwaku kalala tumba jigelabini nesi dugobutsu tumba duvu vala netu.

¹² Nsimbulu tsietu tsivu tsipuela va gusu agu na masumu metu metugaangi; nsimbulu tsietu tsivu na tuijabi mabi metu.

¹³ Tuna mbela na tugaa basigama va gusu Fumu. Tumabusa uguduka, ndeʼ Nsambi etu. Tumavosanga yika mambu madikasi na bumbini. Tuifunisingi mamfurulu na tuimasingi.

¹⁴ Dusungugu dugelabini na dugobutsu dumakakana netu; ngensa jimakungusu va misu mabatu na amavu mawelimina magelabini.

¹⁵ Ngensa jimatsiemuga, jandi oyikakini na mabi aji kwaku jibatu babi. Fumu amalaba motsu amamavagu. Asamasingisa yiri dusungugu dulensu.

Duwamusu duFumu

¹⁶ Amalaba dingensa vagaa mutu; amakambulu yiri vagaa dibaala ubawaka kalala. Kabogu jaʼ beni amabawamusa; na dusungugu duandi dumamuwarisa.

¹⁷ Dusungugu dueni dumaba nana yikutu yibudilu na dugobutsu dumaba nana yisiemba; kabusulu pila jimaba nana yiduaru yiandi; diwavi dimaba nana yijungi yiandi.

¹⁸ Osaka mutu mutu nana amasalila, olasa kabu jineni ombu bavinitsi bandi na ogabusila pila ombu abemuvini nesi abavu vala o banyingi.

¹⁹ Boduma diina diFumu ubandila o yiari ayi wisi ewendisini, boduma bundumba buandi ubandila o yiari ayi wisi epalili. Ava muvinitsi oruyila nderi nyidu avana Yinyunyi yiFumu omubingisila.

²⁰ Fumu evosi rie: Mugobutsi uruga eruyi uyigobula Jerusalem nesi baIsrael abokalula diela nodunda bumbini buogu.

²¹ Fumu amabuesa rie: Guluanu pangini ami aji nyivangini nenu; ubanda namunyi te na mutubu: Yinyunyi yiami otsana nenu na bulumbi buami bubanganga nenu te na mutubu. Bugodupatulu nesi jenu nesi baana benu nesi bategula benu. Menu oyidivosi.