Esaie 57 - La Sainte Bible en Langue Yipunu

¹ Mbe ka batu basigama befu; ne mutu mosi agekipi; batu baboti bamabongu diuleba mutu agejabi dibandu. Batu basigama borinusu mabi.

² Bokota o duvotsu avana bovumanga, jogu botsu abevioyi mu nsila jisungama.

Basambilitsi babakosi bamasiembu

³ Ruganu jenu baana bababaala bamurumitsi umugetu, jenu bategula bayimbembu yimugetu!

⁴ Anyi duidesi? Anyi duigomuni? Dugaa mimbini amimapalila mu yifumba yibafuritsi?

⁵ Dumavaga kulini o yiari yimiri mineni nesi o tsi miri miotsu, dumavagula baana pagu va migula mimijamba o gari tsimalima.

⁶ Dikabu diagu adi dumasola divu mamanyi amamaliomusu na bivela; guimavagulili pagu tsiunu na gumavagulili pagu tsitsangu! Fumu ewivuli rie: Vengu nyuwarila bingana bimunongu eni?

⁷ Gumagomina tangi agu o tindi julu tsimikongu na aguna guimati uyevagula pagu tsiagu.

⁸ Ndeʼ gumavakiga yirangumunu yiagu o nsima yiabutsu. Gumakunsa tangi agu na gumayesilama; gumajeyisa tangi agu ava gumakunsila dinonga na bansambi bamfurulu. Gumasumba maronda ama gumaronda usilama nogu; gumagengila penyi tsiogu.

⁹ Gumagolila matsi uwenda ombu kaga, gumafunisa muyombu agu. Gumasindiga bilumbi biagu o vala; mu motsu mana te no mbura jiabafu

¹⁰ Muendu umagutsogusu ne nana gugevosi rie: Kondini! Gumakewarisa la dibandu gumadedila.

¹¹ Kabogu anyi guidumi? Anyi egurombisi umfurila yiri gugemuetasila nesi utangimina? Nyimaba sui yitsingu yirieni. La dibandu gugendumini?

¹² Nyunyavisa dusungugu duagu ne nana bisalu biagu biotsu bigoba na tsongu.

¹³ Je ava gugamuyila, yinombu yiagu yibakosi yiuguwaka kalala? Mungudi ubavembula nesi punga jiubanangula. Tumba jogu abokevega ombu gami bobialila butamba abuba buogu na bodila mukongu ami.

Dubelusu dubatu baNsambi

¹⁴ Fumu amavosa rie: Solanu, solanu nsila, gusulanu mabaku motsu mu nsila jibatu bami!

¹⁵ Nsambi aguvu uneni agu nsanunu jibangingi mutubu aguvu na diina diNsambi, evosi rie: Nyitsani o julu o mbura jiyingitsi tumba nyivu na batu abamakambulu na abamakesunsa wandi; diwendi rie: nyuwamusa abamakambulu na nyuwamusa abamakesunsa wandi.

¹⁶ Ngosiembanga batu temu tsiotsu, ngokelisanga kabu ami mutubu mbe bobungana.

¹⁷ Mu diambu dinyinga jiIsrael nyimanyoga na nyimamudimba, mu diambu dikabu ami nyimakesuega. Tumba mumbini avu eduki durumu dumurima andi.

¹⁸ Nyimalaba bifu biandi tumba nyumubelusa nyuba mulonsi andi na nyumubembiga; jandi na jogu abelili nandi.

¹⁹ Fumu amavosa rie: Duvotsu, duvotsu ombu jandi aguvu vala nesi ombu jandi aguvu bebeli, nyubabelusa na nyubarombisa usangila.

²⁰ Tumba batu abagekipi yitu nesi migaga bavu nderi mubu aguifunduyingi agugorungula uvola sui, aguisabuli bibogu na kambagaji.

²¹ Tumba Nsambi ami amavosa rie: Batu abagekipi yitu nesi migaga bagaa na duvotsu.