Esaie 54 - La Sainte Bible en Langue Yipunu

Jerusalem

¹ Ndeʼ Jerusalem aguvu yinguma labansangu! Ndeʼ agusamagulu misongu sangila. Fumu evosi nagu rie: Mugetu agumabusu oba na baana uviolila jandi oyitsani na mulumi.

² Jeyisa puasasa jindagu agu jitsanda; wala matsanda majionyi; guyatsikadana! Duta mikudu mijionyi nowarisa makutu majionyi!

³ Ndeʼ guroyisa mbura agu nesi o mabaala nesi o magetu; bategula bagu bobasa malongu amebambini, misiengi amimasiala mududu miumuetsanunu.

⁴ Gugomuelaba keri; gugomuelaba yisonyi mu mbari gugovongulu. Gulibana yisonyi yibungebi buagu na gugomuerangimina bukuili buagu.

⁵ Agumagusunda avu mulumi agu! Diina diandi divu Fumu Mabadi; Mugobutsi agu avu Nsambi Israel! Bemunengili Nsambi jibulongu buotsu.

⁶ Fumu ogurangimina nderi mugatsi agumalebusu, agumagaangu na yisonyi. Fumu ewivuli rie: Tsie mutu obusisla mugatsi ubungebi agu amalegusula?

⁷ Nyimaguliyila nsima mua temu, tumba nyumuegudila na durondu dunem.

⁸ Fumu oyikipi amagu amavosa rie: Nyimagusueyila yinsi yiami ava kabu jimabangila, tumba nyugulasanga yingeba na durondu.

⁹ Nyuvaga nana nyimavayila va temu Noe: nyimavangana pangini yiri mamba magomuebasa butamba nana mamabasila va temu Noe. Dedi mosi nyumuevangana pangini: ngomuegunyoyila na ngomuegukilisa.

¹⁰ Ne pa mikongu miukakana na pa bikundubuga biukunga menu Fumu aguvu na yingeba nyivosi rie: Durondu duami dugokakana nagu, via! Na pangini ami jiduvotsu jigokungusu, via!

Jerusalem aguba o gusu

¹¹ Aa ndeʼ Jerusalem aguvu na munyongu na tindi purulu, agusamabembugu. Fumu jandi rie: Nyumuegurungulila na mamanyi madufunu duneni na nyumuerungulila bibuga biagu na mamanyi masafira.

¹² Nyusukisa bibaga na mamanyi marubi na nyuvaga maguyi matsiengi na bibaga biagu biotsu biurungu na mamamanyi madufunu duneni.

¹³ Baana bagu botsu boba badukitsi bami, bobanganga na maboti mapuela mapuela,

¹⁴ ndeʼ guwarusu na dusungugu; la dibandu dikuana na dusiensi bigomuegukambisa.

¹⁵ Pa bogutungila fundu jigobanda nami; mutu uotsu agugutungila fundu obetsu.

¹⁶ Nyimagusunda mukuba oyisayisi, na jandi etuli yitogulu; va julu vana nyimasunda mubungitsi oyibungi.

¹⁷ Yitogulu yiotsu ayimatulu ugutoyisa yigoba na tsongu. Na mutu uotsu agugufuengilila okilusu. Fumu amavosa rie: Adina disiala dibasalitsi bami, aguna la mugaga agu bodilila ombu gami.