Esaie 52 - La Sainte Bible en Langue Yipunu

Rambuga, rambuga Jerusalem

¹ Rambuga ndeʼ Jerusalem lensa norambuga, mueduara kembu agu! Sion musiengi uNsambi duara biduaru bifeta. Amuna mugomuekotanga agusarebu nesi aguvu na muinsi.

² Jerusalem gubula difufundu diagu norelama, muetsana va yitsiga yiagu. Sion nyangula mikudu mibukoli amivu mu kingu agu!

³ Fumu amavosa na batu bandi rie: Dumakotusu muensili o buviga dedi mosi dugokobulu na badoli.

⁴ Fumu Nsambi amabuela rie: Kala batu bami bamawenda o Egypte uyetsana guna. Bisi Assyrie bamabalasanga maguga.

⁵ Mbana Fumu amawivula rie: Diambu yi? Batu bami bamabegu baviga muensili, abamabatsoyisanga usangila besangili. Yilumbu na yilumbu diina diami disabulungu.

⁶ Namapapa batu bami bojaba menu nyivu, muna yilumbu yicni bojaba yiri la menu oyivosi rie: Meʼ janduʼ gu!

Fumu ugabuga egabuyi o Jerusalem

⁷ Ka muna ubueji gu olaba aguisamuni musamu uboti o julu tsimikongu. Enyavisi dugobutsu! Esamuni musamu uboti na dugobutsu!

⁸ Diufi dibawatsi bagu dinsieyirini; ugamuga begamuyi, begamuyi migamu minsangu va mosi. Belabi Fumu ugabuga egabuyi o Sion.

⁹ Bivongu biJerusalem, gamuganu migamu minsangu! Fumu ubembiga ebembiyi batu bandi, uwaka ewaki Jerusalem kalala.

¹⁰ Fumu amalasa mangolu mandi na bunsambi buandi ombu bisi malongu motsu. Bisi masuka motsu mamalongu bolaba dugobutsu duNsambi etu!

Gusuganu o Babylone

¹¹ Jenu aduinanguli bisalulu biFumu, wendanu, wendanu, gusuganu o Babylone! Tsiri ubemba ne yima yimosi ayivu muinsi! Palanu va gari ogu! Keliomisanu.

¹² Duyasindasana na duyarina mambangu ava duiwendili. Fumu oba va gusu enu, na Nsambi Israel oba va nsima enu.

Musalitsi uFumu Duimbu dumuina

¹³ Fumu amavosa rie: Nyufunisila musalitsi ami maboti; omatusu na oyitsungu!

¹⁴ Batu bapuela bamakambulu umulaba. Ka muna ubivusu gu, yinsi yiandi yimabivusu! Ka muna ubivusu gu yikebutsu yiandi yimabivusu tindi ubivusu.

¹⁵ Namapapa batu bapuela bosutu mu diambu diandi; bakaga bokambulu va gusu andi mu mbari adi bolaba nowiji diviolili adimalonsu.