Esaie 51 - La Sainte Bible en Langue Yipunu

Dugobutsu dumutubu

¹ Fumu amavosa rie: kululuanu, jenu aduirombi dusungugu, jenu aduirombi Fumu. Gengilanu dimanyi adi dumapakulu nesi yiduna ayi dumafululu.

² Rangiminanu taji enu Abraham nesi Sara agumadubura. Abraham asamaba na baana ava nyimamunengilila tumba nyimamugabila miula na nyimamufunisa.

³ Anana Fumu elasili Sion yingeba, elasi biotsu abimapansiga yingeba, okalusa mbura eni ajigaa na mamba nderi nungi Eden, na butamba bueni nderi nungi jiFumu. Nsangu nobueji biugulunu muna, nesi kabusulu tsimaboti na nyimbu wandi.

⁴ Fumu amavosa rie: Batu bami bavu limba! Bisi bulongu buami ndiyilianu matuji! Migaga miupalija ombu gami; migaga miami miuba nderi yijalala.

⁵ Dusungugu duami duka bebeli, dugobutsu duami dulabana. Na mangolu mami nyutabulila batu bunsonsi; bisi banyingi bopayila yitu na bovayila mangolu mami yitu wandi.

⁶ Buaganu misu o julu na gengilanu va tsi! Julu jiuronguga nderi nsumbili, butamba butsatsuga nderi yiduaru na bisi buonyi bobungana nderi bansi. Tumba dugobutsu duami dutsinga mutubu na dusungugu duami dugoba na disukusulu.

⁷ Jenu aduijabi dusungugu kaluluanu nesi jenu aduikelisi migaga miami! Duyaduma nsiembu tsibatu na duyalaba bisiengu biogu goma

⁸ mu mbari bobungu nderi biduaru abimabungu na bibungi. Tumba dusungugu duami duitsinganga mutubu na dugobutsu duami te na kula tsiotsu.

Rambuga, rambuga Fumu

⁹ Rambuga Fumu, lensa norambuga! Muelasa mangolu magu! Rambuga nana va kala, nana kula tsigulu! Tsiri ndeʼ agumabelisa Egypte? Tsiri ndeʼ agumabelisa Rahab agumagesumuna mukuimbi nyoga?

¹⁰ Tsiri ndeʼ agumakamusa mubu nesi mamba mambengi jineni? Tsiri ndeʼ agumavaga diviogulu o ndonga tsimubu nesi nsila uviosila abamawaku kalala?

¹¹ Fumu owaka abandi kalala. Bogabuga o Jerusalem na nyimbu tsindungulu. Bobasa na nsangu te na mutubu; ubueji na nsangu biubabamba, buali na bibimu biutsiemuga.

Batu bami diambu yi duilabi goma?

¹² Fumu jandi rie: La menu, menu nyidubembiyi. Dibandu yi duilabili mutu aguifuangingi goma? Mutu uotsu uvioga evioyi nderi yiriri.

¹³ Dibandu yi duilibinini Fumu avu Musunditsi enu agumawala julu nosunda butamba? Dibandu yi duireyiminingi bilumbu biotsu ava duilabili kabu jineni jimukuanitsi nderi abu ukunsama udubunga? Kabu jineni jimukuanitsi jika?

¹⁴ Namapapa jandi aguvu koli ojegusu; agofuila o tsugu; agogambu na biguji, via!

¹⁵ Menu la Fumu Nsambi enu oyimatisi mubu nesi ugumbisa mibiji. Diina diami divu Fumu Mabadi.

¹⁶ Nyimadusindiga na bulumbi buami, nyimadukubiga na yidumbitsi yidikaka diami, yiri nyurungula uwala julu jigona nesi usunda butamba bugona notsingula Jerusalem rie: Jenu duvu batu bami!

Rambuga, rambuga Jerusalem!

¹⁷ Rambuga, rambuga! Jerusalem retsama. Gumanu dimoyi adivu va dikaka diFumu diwendi rie: kabu andi. Gumanu te na gumamanisila dibondi adimagutsiengisa misu.

¹⁸ Va gari baana bababaala aba gumabura vagaa mutu uguwendisa, va gari baana bagu botsu bababaala aba gumabangusa vagaa mutu ugugaanga mu gogu.

¹⁹ Gumalaba purulu beji beji ne nana mutu agelili! Dubungu na bivongu; dungosu dunsala na dijenga. Tsie nyurungulila ugubembiga?

²⁰ Baana bagu bamatabuga nyambu na bavu volongu va mabaga mamansila nderi kabi ajimawakululu mu murambu. Bamalasu kabu jiFumu nesi nsiembu tsiNsambi!

²¹ La dibandu ndeʼ Jerusalem agumakambulu, guluati; ndeʼ aguvu na dilangi adigaa dimalamu!

²² Fumu aguvu Fumu na Nsambi agu oyiwaki batu bandi kalala evosi rie: Nyugupatula dimoyi adigutsiengisi misu, dimoyi dikabu ami, gugomuedinu!

²³ Nyudiwakisa bakuanitsi bagu abamagurumanga rie: Silama, mbana jetu tuvioga! Gumavaga nsima agu nderi jivu nsila aji batu bevioyilingi.