Esaie 50 - La Sainte Bible en Langue Yipunu

Nsambi agekakini na batu bandi

¹ Fumu eduwivuli rie: Je dumalaba muganda uguboka diwela agu nyimagusulila nguji enu? Je nyimadusumbisa ombu basombisitsi bami? Dumasumbusu mu diambu dimabi menu. Mu diambu dimasumu menu nguji enu jimagusululu.

² Nyimaruga. Dibandu yi vasamaba mutu? Nyimadunengila. Dibandu yi mutu asamawagulila? Je dikaka diami divu difurama yiri ngoguwaka kalala? Ngaa na mangolu mawelimina uduwaka kalala? Nsiembu tsiami tsigekamusi mubu? Ngaa na mangolu ukalusa mijamba mbura tsigumuga te na banyama yika ufu befu na digambu dimamba?

³ Nyurungula ukalusa julu pisama nesi ujiwala yifuila.

Musalitsi uFumu (Duimbu dumurieru)

⁴ Fumu Nsambi amandonsa posulu tsiwelimina yiri nyujaba uwarisa jandi agumatogulu. Etambusi kedi tsiotsu, etambusi ugulu nana mudukitsi egululu!

⁵ Fumu amandonsa ugulu na nyisamabusa na nyisamagabuga mansinsima.

⁶ Nyimaliga nsima abamandimbanga na nyimaliga mabanga ombu abamatsufulanga yiedu yiami. Nyisamakubiga yinsi yiami ava bamansiengilanga nesi ava bamamftitila mateji.

⁷ Tumba Fumu Nsambi ekwamusi la dibandu ngolabila yisonyi. Nyimawarisa murima mu mbari nyimajaba yiri ngolaba yisonyi.

⁸ Jandi oyinsungiyi avu bebeli. Anyi otsunda nami? Tulabini va mosi va gusu nsonsi! Anyi avu muvinitsi ami? Akweki ombu gami?

⁹ Nyiina, Fumu Nsambi ekwamusi. Anyi opega mbela? Bavinitsi bami botsu betsatsuyi nderi yiduaru ayimabungu na bibungi.

Ugululu umusalitsi uFumu

¹⁰ Anyi va gari enu edumi Fumu? Anyi egulu diufi dimusalitsi andi? Jandi oyilingi o tsi pisama mu mbari agaa na yijalala, avayili diina diFumu yitu nokevega ombu Nsambi andi.

¹¹ Jenu botsu aduibangisi muji na aduvu na bitutu, wendanu na yijalala yimiuji mienu na yibitutu bienu! Mambu meni motsu meruyili ombu Fumu, dufuanganga na maguga.