Esaie 49 - La Sainte Bible en Langue Yipunu

Musalitsi uFumu Duimbu adumubeji

¹ Bisi banyingi kuiuluanu! Jetu batu abavu vala, liganu matuji! Fumu amansola vana duburu duami, amanduga diina ava nyimapaliia o moji nguji ami.

² Amavaga munu ami nderi dijenga adivu mengu, amakubiga na yidumbitsi yidikaka diandi, amapaga nderi dubansa dutsuela amansuega o gari dupalu duandi.

³ Amansingula rie: Ndeʼ guvu musalitsi ami, ndeʼ Israel; mu ndeʼ nyulasa bundumba buami.

⁴ Menu nyimatasa rie: Yika kulini nyimasala, yika kulini nyimamanina mangolu mami; tumba dusungugu duami duvu na Fumu na yisaku yiami yivu na Nsambi ami.

⁵ Namunyi Fumu uvosa evosi, jandi agumansola uba musalitsi andi o moji nguji ami. Erondi yiri nyugabusa bategula baJacob ombu gandi, nesi ugukiga baIsrael ombu gandi. Fumu ejabi yisalu yiami yivu yiwelimina, Nsambi ami avu mangolu mami.

⁶ Amakwivula rie: Divu diambu digeyi yiri guba yika musalitsi ami ugukiga bifumba biJacob nesi bansialutsu baIsrael? Nyimagusola uba yijalala yibisi malongu, ubega dugobutsu duami te no masuka mabulongu.

Dugabugu duneni dubakoli

⁷ Fumu aguvu Mugobutsi na Nsambi Israel evosi nagu, ombu gagu agu belensi agu bebusi, ombu ndeʼ aguvu muviga ubango mangolu, evosi rie: Ava bakaga bogulabila boretsama; baana babakaga banogulaba bogudama va gusu agu. Anana bolasila duyitsu ombu aguvu Nsambi Israel agumagusola.

⁸ Fumu amavosa rie: Nyimagugululu va temu jiwelimina, nyimguwarisa va yilumbu yidugobutsu. Nyimagusola uba yilumbi yipangini aji nyimavangana na batu. Nyumuegusingisa utsana o bulongu buenu abuvu bulongu va temu ejiji.

⁹ Nyivosi na bakoli abavu o pisama rie: Palanu, kelasanu! Bodilanga biguji mu mansila nesi mu bikundubuga biotsu.

¹⁰ Bagogulu nsala na bagogulu puila; yiusila yineni yiwisi yigobatsoyisa mu mbari jandi oyibalasi yingeba oba mulonsi-nsila ogu, obabega o bileka.

¹¹ Nyuvaga nsila va julu tsimikongu na mansila mami momuebueji.

¹² Labatianu uruga beruyi vala, bamosi beruyisini o yiari yibanda basusu o yiari ayi wisi ewendisini yimubu, basusu o tandu jiEgypte.

¹³ Julu, sangilanu! Butamba, labanu nsangu! Mikongu, gamuganu migamu minsangu! Fumu ubembiga ebembiyi batu bandi, alasi abandi abamakambulu yingeba.

Ngegulibini

¹⁴ Jerusalem amavosa rie: Fumu amambusa, Fumu ami amadibana!

¹⁵ Tumba Fumu amawaka rie: Je mugetu elibini muana agu enuisi? Agaa na yingeba ombu agu jaʼ beni amabura? Ne pa jandi omulibana, menu ngogulibana, via!

¹⁶ Gulu nyimasona diina diagu mu mirima mimakaka mami; nyilabingi bibaga biagu temu tsiotsu.

¹⁷ Jogu abogurungulila beruyi mambangu, abamagubunga nogupansa urina berini.

¹⁸ Gengila yiarina yiari nojaba rie: Baana bagu botsu ugukama begukimi na uruga beruyi ombu gagu. Fumu amavosa rie: Dingensa ava ngivu monyu boba nderi musanga udufunu duneni agu guduara nderi beleeti aji guduara ava gukotila o diwela.

¹⁹ Guvu yika bivongu na biari abimapansu bulongu buagu buisaa na batu. Tumba namapapa buba bugeyi ukelisa batu bagu; jogu abamagutsoyisanga borina vala.

²⁰ Gumatasa yiri gugaa na baana tumba baana bagu bovosa nagu rie: Mbura ami jivu jibandana; kunsili mbura yiri nyutsana vana.

²¹ Mbana gukewivula rie: Anyi amamburila baana bebaba? Nyisamaleba na baana nyimaba yinguma. Nyimapalusu na nyimaba yilayilayi. Anyi amabangusa baana bebaba? Nyimasiala pinsa! Ababa agunyi bamaleba?

²² Fumu Nsambi uvosa evosi rie: Nyugebula bisi malongu na dikaka diami; nyureliga yilimbu yiami mbana bogabusa baana bagu bababaala va miogu miogu na bonangula baana bagu babagetu va julu tsimasambaka mogu.

²³ Bakaga boba babungulitsi bagu na baana babakaga babagetu boba bandetsi bagu; bokutama nogudama va gusu agu bovenda difufundu dimakulu magu. Mbana gujaba yiri menu nyivu Fumu na jogu abepayili yitu bagolaba yisonyi.

²⁴ Abimakindu bimungo mangolu biurungula umupatulu? Bakoli, tsie bowakulu kalala?

²⁵ Fumu amavosa rie: Nyiina, bakoli bamungo mangolu bomupatulu na abi mungo dikasi amakinda biumupatulu! Jerusalem, meʼ beni nyubelisa bavinitsi bagu na nyuwaka baana bagu kalala.

²⁶ Nyurombisa bakuanitsi bagu ukejanganga; bolabanga malungu mogu nderi malamu madisoga. Mutu uotsu ojaba yiri nyivu Fumu na Mugobutsi agu na oyiguwaki kalala avu Nsambi aguvu mangolu maJacob.