Esaie 47 - La Sainte Bible en Langue Yipunu

Dusundusu duBabylone

¹ Tsiemi, muana mugetu uBabylone, sunduga notsana vadifufundu! Muana mugetu uBabylone tsana va tsi, guisaa na yitsiga yibufumu, ubanda namunyi, bagomuegunengilanga dikongu dimugetu.

² Bonga rapa gukarapa malobi; gusula tsanda agu o yinsi, furiga milemba miyilinga yiagu, siela tsanga agu usabuga mijamba!

³ Penyi agu jiujabunu na yisonyi yiagu yiulabana. Nyugabusa pila ami, ngoba na dupasu dubatu.

⁴ Mugobutsi etu la jandi aguinengulu Fumu Mabadi na Nsambi Israel.

⁵ Muana mugetu uBabylone, tsana sui, suema o pisama! Ubanda namunyi, bagomuegunengilanga kaga jimugetu.

⁶ Nyimanyoyila batu bami, nyimasingisa disiala diami usabulu, nyimabawakisa ombu gagu. Gusamabalasa yingeba, gumawendisa binunu na yilala yiagu.

⁷ Gumavosa rie: Nyuba kaga jimugetu mutubu! Gumadivosa tsiri urangimina bifu biagu na gusamarangimina adiuba o gusu.

⁸ Legulu diambu diedidi, ndeʼ aguvu utsana va yitsiga yiagu yibufumu na murima usunda guivosi o tsi murima agurie: Menu, vagaa ususu yika menu! Ngoba mukuili, ngobokisa baana!

⁹ Kebana, gusundila ulaba mambu meni mabeji muna yilumbu yimosi; gubokisa baana na mulumi; motsu mabeji moguvikana va mosi diuleba guna puela mambu mabulosi nesi mavanda mapuela.

¹⁰ Gumake warisa na mbivulu tsiagu ava gumavosila rie: Ne mutu mosi agendabi! Diela diagu na dujabu duagu bimagudunsa. Gumavosanga o tsi murima agu rie: Menu, vagaa ususu yika menu!

¹¹ Ne wisi ukatebuga punilu jiuguruyila maguga mogugaanga na gugorangula umarina. Dubungu dusundila ugugaanga vana temueni.

¹² Kabogu kipanga mavanda magu nesi bulosibuagu. Ubandayabungebi buagu gumabikipanga na ditasa udila tsongu nesi ureyimisa batu.

¹³ Gumaketsoyisa uwendanga ombu abewiji bambuelili. Baretsimi uyeguwaka kaiaia, jogu abejabi julu abegengili bambuelili na abetubuli adiulabana namapapa na mangoiu mabisusungi!

¹⁴ Gulu, jogu bavu nderi kambagaji: muji ubasielasana, bagorungula urina milutsu mimuji; ugoba mua muji ulambiia biguji nesi agu begori.

¹⁵ Anana bavanditsi bagu bolabila, aba gumaketsoyisilanga uyelabanga, ubanda va bungebi buagu. Botsiemuga, mutu mutu o yiari yiandi; vagoba mutu uguwamusanga.