Esaie 46 - La Sainte Bible en Langue Yipunu

Bansambi baBabylone ubungana bebungini; Nsambi Israel avu sikiri

¹ Bel nsambi jiBabylone jimarakuga, Nebo nsambi jiBaby lone jimaberuga. Bitumba biogu bimanangusu bibulu, tindi mufuna bivu. Nyiina, tindi mufuna ombu bibulu abimatogulu.

² Bansambi beni bamapepa lana na bamaberuga, basamarungula ukegobula: jogu beni bambegu baviga.

³ Jenu bisi ndagu Jacob kuiuluanu nesi jenu bansialutsu baIsrael, jenu aba nyimakelisa ubanda va dibandu aba nyimawendisa ubandila na duburu duenu.

⁴ Nyuba munongu mosi te na bununu buenu, nyuduwarisanga te na dudila bamfi. Nyimadivaga kala na nyumueduwendisanga. Nyiina, nyudukelisanga na nyudugobulanga.

⁵ Fumu evosi rie: Na nyi dumbagusunu? Na nyi tuvu dedi? Va mutu ususu nana menu?

⁶ Bamapuga lora atsimaba mukomi tsiogu. Bamapitsa lora jivema na lora, befuti musalitsi ulora ubavayila nsambi, bejisambili na begudimi va gusu jionyi.

⁷ Bebeyi nsambi ogu, bejinanguli va masambaka na bejisunsi va mbura jionyi. Nsambi eni jitsani vana jigekungi. Diuleba bejisambili jigewaguli, na jigegusuli munyongu

Dugobutsu uruga duiruyi

⁸ Jenu mimbini guluanu, tsiyisanu diambu diedidi, dikotisianu o mirima mienu.

⁹ Rangiminanu amamavioga kala: Menu nyivu Nsambi na vagaa ususu. Vagaa nsambi ajibagunu nami.

¹⁰ Kala kala nyimatubula adiami. Kala kala nyimavosa adisakalabana. Nyimavosa rie: Adudu la duganu duami, dubanganga mutubu. Nyivayi motsu ama nyirondi.

¹¹ Menu nyinengili tsoli o yiari ayi wisi epalili, o bulongu buvala nyinengili dibaala uyidugusu kanu tsiami. Nyimadivosa na nyudidugusu; adi nyimatasa nyudidugusu wandi!

¹² Jenu aduvu na mirima migala, kululuanu; jenu aduvu vala na dusungugu.

¹³ Nyiina, nyibambisini dusungugu duami! Dugaa vala, dugobutsu dugotsinga nyudulasa o Sion. Nyiina, nyulasa bundumba O Israel.