Esaie 44 - La Sainte Bible en Langue Yipunu

¹ Aa baJacob, basalitsi bami, legu-luatianu! Aa baIsrael aba nyimasola!

² Guluanu adi nyidutsinguli rie: Menu Fumu agumaduvaga, agumadusunda ne dukaburu; nyivu muwarisitsi enu, nyivosi rie: Duyalaba keri, jenu baJacob, basalitsi bami; nesi jenu baIsrael aba nyimasola.

³ Mu mbari nyuwitila mamba va mikamuyila na mijamba migeyi va mbura atsigaa na mamba. Nyuwitila Yinyunyi yiami va bategula benu na nyugabila bategula benu miula.

⁴ Bagotamba nobanguga nderi bisinga va mbura jinyega, dedi mosi na tobu va mugula mamba mamuwigu.

⁵ Jandi egugu ovosa rie: Menu nyivu Fumu; jandi eguna okenengila na diina diJacob; ususu osona na dikaka diandi rie: AguFumu! Olaba ubueji unengulu na diina diIsrael.

Bansambi bangana

⁶ Fumu aguvu kaga jibaIsrael na Mugobutsi ogu, Fumu Mabadi evosi rie: Menu nyivu agutega na agusiia, vagaa Nsambi jisusu yika menu.

⁷ Ubanda va kala ava nyimasundila batu anyi amabiga nana menu? Aditubuli na adilasi kengili. Basamuni amoba o gusu nesi amolabana!

⁸ Jenu batu bami duyalaba goma na duyaregama. Nyisamadujabisa dionyi? Nyisamadusamunina dionyi kala? Jenu duvu bambeji bami. Va Nsambi jisusu na menu? Nesi vagaa Dimanyi disusu, ngedijabi.

Muvayitsi ubakosi

⁹ Jogu abevayi bakosi bavu kulini, yisalu yiogu yiboti yigaa na tsongu; bonyi bavu bambeji bogu; bagelabi na bagejabi diambu, bebarombisi yika yisonyi nayisonyi.

¹⁰ Ka muna buduka bu! Uvaga bevayi bansambi nesi bakosi abagaa na tsongu.

¹¹ Botsu abebisali bolasu yisonyi. Basalitsi beni bavu yika batu; botsu bagukimi va mosi nokelasa, jogu botsu bareyimi nolasu yisonyi va mosi.

¹² Mukuba etuli diumbi, esali na magala mbana ebudukisi na mutendi; ebudimbi na mangolu. Tumba yisalu yimurombisi nsala, elibini unu mamba, labatianu aka volongu.

¹³ Muvalitsi bakosi ebundi na diumbi na elengi na dukuetu na dibaga na eveyi yietsu nana erondili; epalisi yinsi yidibaala nesi yikebutsu yiboti yimutu uyikotisa o ndagu.

¹⁴ Diurungula uba uwanga ewangi musedera nesi musena nesi muterabeta agu amasola va gari miri mimusiru vo tanguji ovara mupina; mfula egutsatsi te na uibanguyi.

¹⁵ Mbana mutu ususu osalisa yibuku yimuiri eni ubangisa muji agu egori nesi ulambila biguji; na yibuku yisusu ovaga nsambi aji esambili na egudimi va gusu jionyi.

¹⁶ Etumi bibuku bimosi bimuiri eni ulambila nyama na biguji abiumugukurusu; egori muji na evosi rie: Ka yia! Ugora nyigori muji, ka muna mulutsu gu!

¹⁷ Na yibuku yisusu evayi nsambi ajivu kosi andi, egudimi va gusu jionyi, ejisambili na ejiyitsi na egamuyi rie: Kobuli! Guvu nsambi ami.

¹⁸ Batu beni bagejabi diambu. Bamatsimusu misu yiri bakelaba; bamatsiemusu matasa yiri baketsiyisa.

¹⁹ Ne mutu mosi agekeluli notasa rie: Nyimatuma yibuku yimosi o muji na nyimalambila biguji na nyama abi nyimaji. Na yibuku yisusu nyimavayila kosi jinsoruru!

²⁰ Bamakevega o dibufu, matasa mogu mamabarombisa buduka, nsambi ogu agebawaki kalala, tumba joʼ beni bagekewivula rie: Ajivu va dikaka diami jigaa mfurulu?

Duyalibana, duvu basatitsi bami

²¹ Aa baJacob, rangiminanu mambu memama! Aa baIsrael, duvu basalitsi bami; nyimadusumba, duvu basalitsi bami; baIsrael, ngodulibana, via!

²² Nyimatsiemusa nsimbulu tsienu nesi masumu menu. Bimatsindulu na bimatsiemuga nderi dimungi adivioyi. Gabuganu ombu gami, nyimaduwaka kalala.

²³ Bisi julu sangilanu mu mbari Fumu amasala! Ndonga jibutamba sangilanu na nsangu! Mikongu, gamuganu migamu minsangu! Nesi musiru na miri amivu muna wandi! Fumu amawaka baJacob kalala na amalasa baIsrael bundumba buandi.

Musunditsi bulongu avu Fumu wandi

²⁴ Fumu aguvu Mugobutsi enu, jandi agumadusunda kaia kala evosi rie: Menu Fumu nyimavaga bima biotsu, waʼ pinsa nyimawala butamba.

²⁵ Nyimapansa bilimba bibabiyitsi bamfurulu na nyimatabula rie: Bavanditsi bavu biduka. Nyimagabusa bango diela mansinsima, nyimakalusa dujabu duogu buduka.

²⁶ Nyimadugusu diambu dibasalitsi bami; nyimamanisila mbigulu tsibilumbi biami; nyimavosa mu diambu diJerusalem rie: Batu bomuetsananga muna na nyimavosa mu diambu dimisiengi miJuda rie: Miumuerungululu; na nyurangiga bivongu biogu.

²⁷ Nyimavosa na mbengi jimubu rie: Kamuga! Na nyimakamusa mijamba mienu wandi.

²⁸ Nyimavosa mu diambu diCyrus rie: Jandi avu mubungulitsi ami ubindombu. Odugusu kanu tsiami tsiotsu; mu diambu diJerusalem ovosa rie: Urungululu! Mu diambu diNdagu Nsambi ovosa rie: Jiumuerungululu!