Esaie 43 - La Sainte Bible en Langue Yipunu

¹ Aa baIsrael, Fumu amadusunda, Aa baJacob, Fumu omadusunda uvosa emuevosa rie: Duyalaba keri: nyimaduwaka kalala. Nyidunengili mutu mutu na diina diandi duji abami!

² Pa dusabuga mijamba nyuba nenu; mijamba migodudiamisa via; pa duvioga va gari muji dugonyenga via, nesi milutsu mimuji migodusielasana.

³ Menu la Fumu Nsambi enu, menu la Nsambi baIsrael aguvu Mugobutsi enu. Nyimavega Egypte nyobu enu, Ethiopie na Seba va yivinga yienu.

⁴ Duvu abami bamurima mu mbari duvu duwelimina na nyidurondi kabogu nyuvega babaala nesi malongu va yivinga yienu.

⁵ Duyalaba keri menu nyiji nenu; nyugabusa baana benu abavu o yiari ayi wisi epalili na nyudugukiga o yiari ayi wisi ewendisini.

⁶ Nyuvosa na banda rie: Bapeyi! Nyuvosa na tandu rie: Bakuakisi! Gabusa baana bami bababaala abavu o malongu mavala, nesi baana bami babagetu abavu o masuka mabulongu;

⁷ botsu abenengulu na diina diami, botsu aba nyimasunda aba nyimavaga ulasa bundumba buami.

Jenu duvu bambeji bami

⁸ Bapalisi batu beni diuleba bana misu bavu bidunga, diuleba bana matuji bavu madiba.

⁹ Bisi malongu motsu bagukimi, batu botsu babenguni. Anyi va gari bansambi bogu amanyavisa mambu meni? Banyi bamatubiyila mbigulu tsitega? Bapalisi bambeji bogu abosingisila ndungulu tsiogu. Yiri basusu bogulu nosingisila rie: Divu dingensa!

¹⁰ Fumu amavosa rie: Jenu duvu bambeji bami, jenu na musalitsi ami agu nyimasola, yiri dunjaba nopayila yitu notsiyisa yiri la menu: vasamateyila Nsambi jisusu na vagoba jisusu ajiupinga.

¹¹ Menu nyivu Fumu na vagaa Mugobutsi ususu yika menu.

¹² Menu nyimanyavisa misamu, nyimagobula na nyimalubusa batu, menu tsiri bansambi bangana abetsani va gari enu. Fumu amavosa rie: Jenu duvu bambeji bami, menu nyivu Nsambi.

¹³ Nyivu Nsambi ubanda va dibandu, mutu agorungula upatula ayivu va dikaka diami; adinyivayi, anyi orungula ugubitsa?

Utinda nyidutindili mutu

¹⁴ Fumu aguvu Mugobutsi enu na Nsambi Israel evosi rie: Mu diambu dienu nyisindiyi mutu utoyisa bisi Babylone. Nyubasundusa, nesi bisi makumbi mamamba na makumbi mogu mamamba amamabarombisa diduma.

¹⁵ Menu nyivu Fumu Nsambi enu na Musunditsi uIsrael na Kaga enu.

Nsila jigona o kumu

¹⁶ Kala Fumu amavaga diviogulu na mubu nesi mu mijamba mineni,

¹⁷ kala amawendisa makalu na bakabala nesi batoyitsi bamavita na bangogaga; jogu bana bamasundila uberuga tsiri umuesimbuga nderi lambi ajiipudimi te na jiutsima. Fumujandirie:

¹⁸ Duyamuetasa amamavioga, duyamuekipa mambu magulu.

¹⁹ Guluanu, nyirondi uvaga diambu digona, diulabananamapapa. Dugodijaba? Nyuvaga nsila o mbura tsigumuga na nyuvaga mijamba o mbura atsigaa namamba.

²⁰ Bibulu bimusird biundodisa nesi makoju nesi otarisa mu mbari nyuvaga mamba o mbura tsigumuga nesi mijamba o mbura atsigaa na mamba. Mu mbari nyuvega aba nyimasola mambu monu.

²¹ Batu aba nyimasunda bosamuna duyitsu duami.

Bunsonsi buNsambi Israel

²² Fumu amavosa rie: BaIsrael dusamandengila, baJacob dumatogulu nami.

²³ Dusamapagulila bindombu bienu pagu tsiunyensa; dusamakitsa na pagu tsienu; nyisamadutsoyisa mu diambu dimiensili nesi mu diambu dibima bimbunga jiboti.

²⁴ Dusamansumbila muyombu, dusamakukurusu na matsi mapagu tsienu; tumba dumansoyisa na masumu, dumatogusu na mabi menu.

²⁵ La meau, menu aguitsinduli nsimbulu tsienu na durondu duami, ngomuerangimina masumu menu.

²⁶ Tangimisianu amenu magulu, tutsundanu va mosi; palisanu ndungulu tsienu.

²⁷ Taji enujitega amavaga masumu; bikambi bienu bamasumuna.

²⁸ La dibandu nyulasila bivunda biNdagu Nsambi yisonyi, nyuwakisa baJacob o dubungu na baIsrael bolensu.