Esaie 42 - La Sainte Bible en Langue Yipunu

Musalitsi uFumu Duimbu dutega

¹ Fumu amavosa rie: Agugu la musalitsi ami agu nyimawarisanga, aguami agu nyimasola agu nyirondi na murima ami uotsu. Nyimamugabila Yinyunyi yiami; jandi onyavisa dusungugu ombu bisi malongu.

² Agogamuga, agomatisa diufi diandi na agoyenawansanga muansu.

³ Agotabula yilelenga ayimadekama na agotsimisa yijalala ayipudimi. Onyavisa dusungugu te na dulabana.

⁴ Agotsikadana na agodeda te na dusungugu dulabana vava tsi nesi te na bisi banyingi bogulu malongi mandi.

Yijalala yibisi malongu

⁵ Anana Fumu Nsambi evosili agumasundajulu na amajisimbula na agumavaga butamba na biotsu abivu muna na agumavega punga ombu biotsu abibubasi na agumavega muvumu ombu abavu mund.

⁶ Menu Fumu, nyimagunengila ugugobula; nyuguwarisa. Nyugusunda uguvaga tuga jipangini ami va gari batu nesi yijalala yibisi malongu,

⁷ yiri gutiemusanga bidunga, nopalisanga bakoli o buviga, nopalisanga bisi tsugu abetsani o pisama.

⁸ Menu la Fumu, adina la diina diami; ngovega bundumba buami ombu mutu susu, nesi duyitsu duami ombu bakosi.

⁹ Labanu mambu matega mamadugusu, nyudunyavisila amagona ne makalabana nyimamabiga.

Fumu uwamusa ewamusi

¹⁰ Wimbilanu Fumu duimbu dugona, Wimbilanu duyitsu duandi o masuka mabulongu. Jenu aduilingi mu mubu nesi jenu aduigubasi, nesi banyingi na bisi banyingi!

¹¹ Bisi misiengi abavu o mbura tsigumuga tubanu nyimbu! Bisi milaku miQuedar, tubanu nyimbu! Abetsani o gari tsimamanyi basangili na nsangu! Migamu minsangu migulunu o julu tsimikongu!

¹² Bisi banyingi bakakisi Fumu, banyavisi duyitsu duandi.

¹³ Fumu olabana nana ngogaga owenda o gusu nana mutoyitsi umavita; omatisa diufi na ogamuga olasa mangolu mandi ombu bavinitsi bandi.

Duganu duFumu

¹⁴ Fumu amavosa rie: nyimaba sui yitsingu yineni nyimavola sui, na nyimakegandisa uvosa; tumba namapapa nyugamuga nderi mugetu aguvu na misongu, nyubima na nyuba duyilini na yikiba.

¹⁵ Nyurakula mikongu na bikundubiiga na nyugumusa bisinga biotsu nyukalusa mijamba banyingi na nyukamusa manga.

¹⁶ Nyuwendisa bidunga mu nsila aji bagejabi, nyubaviosa mu mansila ama basakavioga na kala; va misu mogu nyukalusa pisama yijalala, mbura tsibitsutsudi tsiukaluga yidesi. Adina duganu duami na ngotamba nodidugusu.

¹⁷ Jogu abekevega ombu bakosi, bogabuga mansinsima na bolaba yisonyi nesi jogu abevosi na bakosi rie: Jenu duvu bansambi betu!

Bidunga na madiba

¹⁸ Madiba, guluanu! Bidunga, gengilanu na labanu.

¹⁹ Anyi avu yidunga? Tsiri musalitsi ami? Anyi avu madiba? Tsiri yilumbi ayi nyitindi? Anyi avu yidunga nderi mbatsi Nsambi? Anyi avu yidunga nderi musalitsi uFumu?

²⁰ Ndeʼ gumalaba mambu mapuela tumba gusamamakipa; gumaliga matuji tumba gusamagulu diambu.

²¹ Fumu amaronda uroyisa usigama uandi nesi uroyisa migaga miandi nomibuejisa.

²² Tumba baIsrael bavu batu abamakindu na abamasiala penyi! Botsu bamatungu na bapanga o gari tsimalima na bamadibugu o tsugu. Bamabakinda, mutu asamabawaka kalala; bamabasila penyi na mutu asamavosa rie: Bakabusilianu!

²³ Anyi va gari enu oliga matuji notsiyisa mambu nesi amoba o gusu?

²⁴ Anyi amawakisa baJacob yiri bovulu? Tsiri Fumu? Jetu tumavaga masumu va gusu andi. Jogu basamaronda uduka mansila mandi na basamadedila migaga miandi.

²⁵ La dibandu Fumu amalasila baIsrael tindi kabu andi nesi kabu jidivita; divita dimabakambisa o biari biotsu ne nana basamatsiyisa diambu; dimabatsoyisa ne nana basamakipa.