Esaie 39 - La Sainte Bible en Langue YipunuEzekias udila edili bilumbi abimaruyila o Babylone (Gengila 2 Baka 20.12-19 ) 1 Va temu eni wandi Merodac-Baladan muana dibaala uBaladan agumaba kaga jiBabylone amatinda muganda na musangulu ombu kaga Ezekias mu mbari amagulu ubela ebeli. 2 Ezekias amadila bilumbi na amabalasa yilundulu yiandi yilora jivema na bima bimbunga jiboti na matsi madufunu duneni na yilundulu yibitogulu na biotsu abimaba o bilundulu biandi; Ezekias amabalasa biotsu nesi bindagu andi nesi bibufumu buandi buotsu. 3 Esaie mubiyitsi amamuewenda ombu kaga Ezekias uyemuwivula rie: Diambu yi batu bebaba batsigutsingula na agunyi batsirugasana? Ezekias amawaka rie: Bamarambuyila vala o Babylone uyindaba. 4 Esaie amamuewivula rie: Yi batsilaba o ndagu agu? Ezekias amawaka rie: Batsilaba biotsu abivu o ndagu ami: vagaa ne yima yimosi mu bilundulu biami ayi ngaabalasa. 5 Mbana Esaie amatsingula Ezekias rie: Leguluati diambu diFumu Mabadi! 6 Yilumbu yimosi bosuvila biagu biotsu o Babylone ubandila na abi bataji bagu bamagukiga te na binamunyi. Fumu jandi rie: Vagosiala ne yima yimosi. 7 Na bobonga baana bagu bababaala aba ndeʼ beni gumabura ubavaga mivangu o ndagu kaga jiBabylone. 8 Ezekias amawaka Esaie rie: Diambu diFumu adi gutsivosa divu diboti. Adi amatasa rie: Voba duvotsu na tuba sui yitsingu yiami yiotsu. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon