Esaie 37 - La Sainte Bible en Langue Yipunu

Ezekias na Esaie

¹ Kaga Ezekias anogulu motsu mana amapasa biduaru biandi na amaduara siela mbana amagabuga o Ndagu Nsambi.

² Amasindiga Eliaquim yivunda yindagu kaga na Chebna musonitsi na bivunda bivagulitsi bapagu, jogu botsu bamaduara basiela na bamawenda ombu Esaie muana dibaala uAmots agumaba mubiyitsi.

³ Bamamutsingula rie: Ezekias jandi rie: Yilumbu yieyiyi yivu yidiguga na yimukilu na yiyisonyi; baana baka o mburu tumba mangolu ubura masatsi.

⁴ Tanguji Fumu Nsambi agu amagulu posulu tsiotsu tsiRabschake atsi fumu andi kaga jiAssyrie amamusindiga uyesienga Nsambi monyu na tanguji Fumu Nsambi agu otsiemusa purulu tsieni tsiotsu atsi amagulu. Kabogu sambila mu diambu dijetu atuisiali.

⁵ Bilumbi bikaga Ezekias bimawenda ombu Esaie.

⁶ Esaie amabatsingula rie: Guluanu adi duyetsingula fumu enu rie: Fumu jandi rie: Guyaregama na mambu ama basalitsi bakaga jiAssyrie bamansiengila.

⁷ Kaga ogulu misamu amiumugabusa o bulongu buandi; aguna nyumusingisa uboku.

Mapemi masusu maSennakerib

⁸ Rabschake amagabuga, amarasuna kaga jiAssyrie utumuna etumuni bisi Libna mu mbari amagulu yiri amarambuga va Lakich.

⁹ Kaga jiAssyrie amagulu musamu uTirca kaga jiEthiopie agu bamamutsingula rie: Gulu uruga eruyi uyitoga nagu. Kaga jiAssyrie amamuetinda bilumbi uyetsingula Ezekias rie:

¹⁰ Gukatsingula Ezekias kaga jiJuda rie: Guyamuevayila Nsambi yitu! Okubitsa ubonga Jerusalem?

¹¹ Ndeʼ gumagulu ama bakaga baAssyrie bamavayila malongu motsu na nana bamamabungila; yika ndeʼ aguwaku kalala.

¹² Je bansambi bainalongu ama bataji bami bamabunga, bamabawaka kalala? Malongu meni amama: Goan na Haran na Ressef na Telassar musiengi ubaEden.

¹³ Bakaga baHamat na baArpad na baLair na baSefarvaim na baHena na baAva baka?

Dusambu duEzekias

¹⁴ Ezekias amabonga muganda agu bisi Assyrie bamabega na amaguranga. Mbana amawenda o Ndagu Nsambi na amawala muganda eni va gusu Fumu.

¹⁵ Mbana amasambila dusambu duedudu rie:

¹⁶ Fumu Nsambi Israel aguitsani va gari biansa! Ndeʼ guvu Nsambi mosi buandi jibufumu buotsu bubutamba, ndeʼ gumavaga julu na tsi.

¹⁷ Fumu, liga dituji diagu nogulu. Fumu, dibula misu magu na gengilati. Guluati bisiengu biSennakerib agumasindiga Rabschake uyisienga ndeʼ aguvu Nsambi monyu.

¹⁸ Dingensa Fumu! Bakaga baAssyrie bamabunga tindi ubunga malongu masusu.

¹⁹ Bamanyensa bansambi bogu abasamaba tindi bansambi, bavu bima abi batu bamavaga na miri na mamanyi kabogu abina jogu bamabunga.

²⁰ Aa Fumu Nsambi etu, tuwaki kalala namunyi ombu Sennakerib yiri bisi malongu motsu bajabi ndeʼ guvu Nsambi mosi!

Esaie uvega eveyi kabusulu tsiFumu

²¹ Mbana Esaie muana dibaala uAmots amatinda yilumbi uyetsingula Ezekias rie: Fumu Nsambi Israel jandi rie: Nyimagulu dusambu adu gumansambila mu diambu diSennakerib kaga jiAssyrie.

²² Gulu mamba ama Fumu evosi mu diambu diSennakerib: Tsiemi, muana mugetu uSion. Egulensi, egudesi. Muana mugetu uJerusalem!

²³ Anyi gumasienga? Anyi gumalensa? Anyi gumalutsila misu? Menu Nsambi Israel!

²⁴ Gumasalisa basalitsi bagu, gumasienga menu Fumu. Gumavosa rie: Yiesa yi makalu mami mapuela mapuela nyimabinduga nesi o julu tsimikongu te no masuka maLiban uyetabula misedera miandi amiviolila usakama nesi misipara miandi amiviolila ubueji. Nyutola nesi te no mandeka mandi nyusita utola o pari ajitsiesiaa!

²⁵ Menu nyimatima biduna bimamba nyimanu mamba mamalongu masusu. Nyukamusa baana bamujamba uNil yika na matambi mami ava nyutsiarilila butamba buEgypte.

²⁶ Ndeʼ Sennakerib, gusamagulu? Nyimakunsa mambu meni kala, nyimamalaba mawelimina. Nyimagana duganu mbana nyimadudugusu. Nyimagusola ukalusa misiengi mikandu yika dibumbu dimosi.

²⁷ Bisi misiengi bagaa na mangolu, bamabasa na goma, bamasutu. Bavu nderi bisinga bimanungi, nesi biriri binyelili nesi nana kunsa atsimagumuga atsigobueji uneku.

²⁸ Nyigujabi, nyijabi agu guitsanini. Nesi ava guipalili nesi ava guikotili nesi ava guindoyili.

²⁹ Ava guindoyili nyilabi dunangu duagu. La dibandu nyugukilisila; nyukobiga mulunga mu miunu miagu mimbasu nyusunsa budilu mu munu agu nyugugabusa o ndagu muna nsila aji gumaruyila.

³⁰ Mbe ka ndeʼ Ezekias, abibi biuba bilimba biagu: yilima yitega guji mimbendila mimanungi; yilima ayimubeji dedi mosi; tumba yilima ayimurieru duvaranga na dutsonsiganga na duvaranga mfuga tsirayisan na dujanganga mirayisan.

³¹ Bansialutsu baJuda boba nderi muiri aguibendisi ngansi aguburanga milunda.

³² O Jerusalem upalila bansialutsu na o mukongu uSion upalila abamalerina. Esaie amabuela rie: Fumu ovaga motsu mana na durondu duneni.

³³ Guluanu adi Fumu evosi mu diambu dikaga jiAssyrie rie: Agomuekota o musiengi egugu, agomuenonga mbansa, agomuelasa ngubu tsiandi na agomuegukanda.

³⁴ Menu Fumu nyivosi rie: Oga-buyila mu nsila aji amaruyila, agomuekota o musiengi egugu.

³⁵ Menu Nsambi nyivu, nyugaga Jerusalem yiri ugobungu mu diambu dimeʼ beni na dimusalitsi ami David.

Bisi Assyrie uweʼ bewendi; dufu duSennakerib

³⁶ Vana mukolu eni yiansa yiFumu yimapala, yimaboka kama na magumidunana na tosini yiranu tsibagora o milaku miAssyrie. Ava kedi bamalaba yika bamfumbi na bamfumbi.

³⁷ Mbana Sennakerib kaga jiAssyrie amagusuga va milaku miandi, amayenagabuga o Ninive uyetsana.

³⁸ Kabogu ava amagudimina o ndagu nsambi andi Nisrok, baana bandi bababaala: Adrammelek na Saresser bamamuboka mbana bamarina o bulongu buArarat. Assarhaddon muana andi udibaala amaruma va yivinga yiandi.