Esaie 36 - La Sainte Bible en Langue Yipunu

Kaga jiAssyrie utumuna etumuni Jerusalem

¹ Yilima yidigumi na bina bidurumu dukaga Ezekias, Sennakerib kaga jiAssyrie amayetumuna misiengi miotsu mikandu miJuda na amamigaanga.

² Kaga jiAssyrie agumaba o Lakich amasindiga Rabschake na bagora bamangolu o Jerusalem ombu kaga Ezekias. Rabschake amasikama va ditanga va dianga dineni mu nsila va mbura aji besusili.

³ Mbana Elaiquim muana dibaala uHilquia agumaba sefu jindagu kaga amawenda ombu gandi jogu na Chebna agumaba musonitsi na Yoa muana dibaala uAssaf musonitsi ususu.

⁴ Rabschake amabatsingula rie: Tsingulanu Ezekias rie: Kaga jiAssyrie jandi rie: Yitu yimunongu yi yivu nagu?

⁵ Guitasi yiri posulu na posulu tsiuvinga bukidi nesi ukunsama utoga divita? Kabogu ama gumavosa yika waʼ mapopopu! Anyi eguveyi mangolu umbusa?

⁶ Aa nyijabi Egypte guivayili yitu, guiwarih dupangu dueni dutabuga aduitobi dikaka dijandi aguiduwarili. Anana Pharaon kaga jiEgypte avu ombu botsu abemuvayili yitu.

⁷ Tanguji gunsingula rie: Tuivayili Fumu Nsambi etu yitu. Tumba tsiri ndeʼ Ezekias agumatsiemusa, mbura tsiandi tsiduyitsu na binyensulu biandi bipagu na agumaruma bisi Juda na bisi Jerusalem rie: Duvagulanga pagu yika va gusu yinyensulu yipagu o Jerusalem.

⁸ Leguluati! Singa adi fumu ami kaga jiAssyrie egutsinguli. Nyuguvega tosini beji tsibakabala pa gurungula udila babeyitsi batsionyi.

⁹ Je gurungula ubingisa ne gora mosi va gari bagora bageyi bafumu ami? Tsia bisi Egypte gumavayila yitu uguvega makalu na babeyitsi bamonyi?

¹⁰ Je nyimaruga uyipansa mbura ejiji tsiri na musuga uFumu? Fumu amatuma rie: Yepansa bulongu bueni nobubunga.

¹¹ Eliaquim na Chebna na Yoa bamatsingula Rabschake rie: Kokolu vosa netu mu mbembu Arameen mu mbari tuijigulu; guyavosa netu na mbembu Hebreu yiri batu abavu va julu yivaga bakegulu.

¹² Rabschake amabawaka rie: Je fumu ami amansindiga yika ombu genu udutsingula mambu memama? Tsia amansindiga nesi ombu batu bebaba abavu va julu yivaga aboji mambi mogu nonu masuba mogu va mosi nenu?

¹³ Mbana Rabschake amakueka na amagamuga mu mbembu Hebreu rie: Guluanu mambu makaga ajineni, kaga jiAssyrie!

¹⁴ Kaga jandi rie: Ezekias ayadutsimbusu mu mbari agorungula uduwka kalala ombu gami.

¹⁵ Ezekias ayadutsotsa ukevega ombu Fumu ava evosili rie: Fumu otuwaka kalala na musiengi egugu ugowakusu ombu kaga jiAssyrie.

¹⁶ Duyagulu Ezekias; guluanu adi menu kaga jiAssyrie nyivosi rie: Nonganu nami, keveganu ombu gami na mutu mutu oji biguji binungi andi noji milunda miandi mifiga na mutu mutu onuanganga mamba mayileka yijaʼ beni.

¹⁷ Namapapa nyuruga nodubega o bulongu abuba nderi bujenu beni o bulongu abuvu na ble na malamu na mapa na mirayisan.

¹⁸ Kabogu duyagululu Ezekias; edudunsi ava evosih rie: Fumu otuwaka kalala. Bansambi bamalongu masusu bamaba na mangolu ukubitsa? Menu aguvu kaga jiAssyrie?

¹⁹ Bansambi baHamat na baArpad baka? Jogu bamawaka bisi Samarie kalala ombu gami?

²⁰ Bansambi bamalongu meni motsu abamawaka bisi bulongu kalala ombu gami baka? Yika Jerusalem buandi agu Fumu okubitsa ubonga?

²¹ Batu bamavola sui! Basamamuwaka ne diambu dimosi mu mbari Ezekias amabavega diruma diedidi rie: Duyamuwaka.

²² Eliaquim muana dibaala uHilquia agumaba yivunda yindagu kaga na Chebna musonitsi na Yoa muana dibaala uAssaf musonitsi ususu bamawenda ombu Ezekias na biduaru bipasiga na bamayemutsingula misamu miRabschake.