Esaie 33 - La Sainte Bible en Langue Yipunu

Ka muna maguga ma ombu babungitsi!

¹ Ka muna maguga ma ombu aguibungi! Ndeʼ wagu gusakabungu! Ka muna maguga ma ombu aguikindi! Ndeʼ wagu gusakakindu! Ava gumanina ubunga, ndeʼ wagu gubungu; ava gumanina ukinda, ndeʼ wagu gukindu.

² Fumu tulasi yingeba! Jetu tuigutasili. Ba muwamusi etu kedi tsiotsu; tuwaki kalala ava tuilabili munyongu!

³ Ava diufi diagu digulununu batu berini; ava guiretsimini bisi malongu bepansiyi.

⁴ Bamawitimina abi mbe bamakinda dedi mosi nana makokoku mewetimini; bamavikana muna dedi mosi nana makokoku.

⁵ Fumu erumi motsu, etsani o julu; ebasi Sion na musuga na dusungugu.

⁶ Bilumbu biagu bigoba na diambu; diela na dujabu bibeyi dugobutsu; uduma Fumu uvu nderi bungunu buSion.

Duwamusu duFumu

⁷ Guluanu, bangogaga ugamuga begamuyi va gusu kana; bilumbi abimasamuna duvotsu unyonga benyongi.

⁸ Mansila mamasiala mududu; batu bagemuevioga muna; mungo dikasi amakubula pangini, elensi bisi misiengi, agekipi ne mutu mosi.

⁹ Bisi bulongu bamaduara yifuila na bana munyongu; bisi Liban belabi yisonyi na bamakambulu; Saron jimakaluga nderi kumu; Bachan na Carmel besiali nderi miri amigaa na magaji.

¹⁰ Fumu amavosa rie: Mbana nyuretsama, nyukelasa na nyulasa buneni buami.

¹¹ Dumadila mimi mabilonga dumabura kobu, punga enu jivu nderi muji agudusielasana.

¹² Batu bonyensu nana benyesili duso nesi matsiendi amamanyensu o muji.

¹³ Jenu aduvu vala guluanu adi nyimavaga! Jenu aduvu bebeli jabanu yiri mangolu mami mavu!

¹⁴ Bavayitsi bamasumu baSion bamagaangu na goma. Batu babi uregama bereyimi; bewivuli rie: Anyi va gari etu orungula ubambana na muji eni aguisielisini? Anyi va gari etu orungula ubambana na milutsu mieni amigetsimi?

¹⁵ La jandi oyiduki dusungugu na oyivosi ngensa, na oyibusi ufutisa batu yimbabu, na oyigubuli makaka ava ebusili milendu na oyidibiyi matuji ubusa ugulu posulu tsibukongu nesi jandi oyibusi ugengila mabi.

¹⁶ Jandi guna otsananga o julu; yivaga ayimarungu va julu dimanyi yiuba yisuemunu yiandi, ovegungu biguji na odilanga mamba.

Jerusalem umawaku kalala

¹⁷ Gulaba bundumba bukaga; gulaba yiavu yibulongu buotsu.

¹⁸ Gurangimina dunsiensi adumavioga na guwivula rie: Musonitsi aka? Mubongitsi lepu aka? Oyitali mandagu masakama maJerusalem aka?

¹⁹ Gugomuelaba bango dunangu, abevosi mbembu jingana aji gugejabi na ajigegulunu.

²⁰ Gengila Sion, musiengi agu tumajanganga bafeta betu! Gulaba Jerusalem mbura ajigepupusu, ndagu jitsanda ajigomuenangulu, makutu majionyi magomuerubulu, na mikudu mijionyi migomuenyangulu.

²¹ Avana Fumu bundumba oba aguetu: oba nderi mijamba mineni nesi migeyi ami makumbi amedugu na bakafi nesi amewendusu na makuku magorungula uvioga muna.

²² Fumu avu nsonsi etu, Fumu avu mulonsi etu nsila, Fumu avu kaga etu; jandi oyitugobuli.

²³ Mikudu miagu mimasuruga; migemuewarisa dikutu didikuku nesi udimatisa. Mbana bamagabana bipuela abimakindu; nesi bitsondu bamadila dikabu diogu.

²⁴ Ne mutu mosi agevosi rie: Ubela nyibeli! Bisi Jerusalem botandu mabi mogu.