Esaie 32 - La Sainte Bible en Langue Yipunu

Kaga ajivu na dusungu

¹ Mbana kaga oruma na dusungugu na barumitsi boruma na musuga.

² Mutu mutu oba nderi yisuemunu yipunga nesi yimungudi, nderi yidumbitsi yidimanyi dineni adivu va kumu.

³ Misu mogu magomueba na bundunga, matuji mogu moba limba.

⁴ Jogu abavu na mavovosa bosundila utsiyisa dujabu, jogu abavu na dugugama bovosa mbangu tsiri utsikadana.

⁵ Yiduka agomuenengulungu mutu muneni; mudesitsi agomuenengulungu mugabitsi.

⁶ Posulu tsiyiduka tsivu buduka na amakevega uvaganga mabi na amagaa mawelimina nesi usabula Fumu nesi upatula aguigulu tindi puila mamba.

⁷ Bitogulu bimudesitsi bivu na tindi mangolu; ekunsi kanu tsibi utsiemusa abamakambulu ne pa agumakambulu agaa na diambu.

⁸ Tumba aguvu mutu muneni ekunsi kanu tsiboti na etsiwarisingi.

Dilubu ulubusa bagetu baJerusalem

⁹ Jenu bagetu abavu sui, retsamanu, guluanu diufi diami! Jenu banumba abagekipi, liganu matuji ugulu mambu mami!

¹⁰ Yiotsu ayi yilima yimosi na mua bilumbu biuvioga jenu adugekipi duregama mu mbari dutsonsugu dumatsiemusu; dutsonsugu dugomueba.

¹¹ Jenu aduvu sui, regamanu! Jenu adugekipi, tsigumuganu! Vulanu matsanda, duaranu yifuila va malungu menu!

¹² Dumanu tulu tsienu ava duirangiminini manungi, nesi digumba dimfuga tsienu

¹³ nesi butamba bubatu bami abubendisa yika matsiendi na kengitsi, nesi mandagu amamaleba na nsangu.

¹⁴ Ndagu kaga jimasiala mududu na musiengi ukembu umalibunu; yiari yiOfel na mukongu na ndagu jisakama biukaluga malima; baburu bamusiru boyetsananga guna na migamba miuyejanganga.

Motsu mamavinsu

¹⁵ Yilumbu yimosi, Fumu otuwitilila Yinyunyi yiandi te no kumu jiukaluga nungi na nungi eni jiugengulungu nderi musiru.

¹⁶ Mbana amavu mawelimina motsananga o kumu na dusungugu dutsananga o nungi.

¹⁷ Dusungugu durombisa duvotsu na disukusulu diduonyi diuba duvotsu na murima usunda.

¹⁸ Batu bandi botsananga o mbura duvotsu; botsananga sui na bovumanga tsiri ulabanga maguga.

¹⁹ Ava mfula jiunoyila musiru urakuga na musiengi usulumuga.

²⁰ Ka muna ubueji gu ombu genu! Duvara bivaru mu migula mimijamba na bangombi na baburu boyenalinganga, bagogandusu.