Esaie 31 - La Sainte Bible en Langue Yipunu

Bisi Egypte

¹ Ka muna maguga ma ombu jogu abewendi o Egypte uyevonda duwamusu, abevayili bakabala yitu nesi makalu mapuela mapuela, nesi babeyitsi babakabala bamangolu abagekipi Nsambi Israel na abageduki Fumu!

² Tumba jaʼ wandi ejabi adi evayi; ebeyingi maguga na mambu mandi, magegabuyi mansinsima! Oba na kueru na batu babi nesi jogu abebawamusi uvaga mabi.

³ Bisi Egypte bavu batu tsiri bansambi; bakabala bogu bavu bakabala tsiri binyunyi. Ava Fumu osambila gogu andi muwamusitsi oduku dibaku, agumawamusu oberuga; botsu babeji bofu va mosi.

Fumu muwamusitsi uJerusalem

⁴ Fumu amansingula rie: Nana yimbungu na baana bandi begumbili ayi boji, diuleba babungulitsi botsu babindombu bamagukama ubisiamina, bigedumi mufi mogu nesi dutalu duogu, dedi mosi Fumu Mabadi osunduga va julu mukongu usakama uSion nesi va julu bikundubuga uyetoga.

⁵ Nana batsoli besalisi mapapi ubandimina baana anana Fumu Mabadi obandimina Jerusalem. Osundila uguwaka kalala, nogurinisa dubungu.

⁶ BaIsrael gabuganu ombu jandi agu dumaliyila nsima.

⁷ Va temu eni batu botsu bobusa bakosi balora jivema na batindi lora aba jenu beni dumavaga na makaka menu mabukongu.

⁸ Bisi Assyrie boboku na dijenga adigaa didibaala, dijenga adigaa dimutu diubamina. Bodirina; bangogaga bogaangu baviga.

⁹ Fumu aguvu na muji o Sion na kangi o Jerusalem evosi rie: Yivaga yiurakuga na borina na goma; bivunda bibagora bosila yilimbu.