Esaie 3 - La Sainte Bible en Langue Yipunu

Kumfu o bufumu buJuda

¹ O Jerusalem no bufumu buJuda Fumu aguvu Fumu Mabadi ugusula egusuli biotsu; nesi biguji nesi mamba

² nesi ngogaga nesi mutoyitsi umavita nesi nsonsi nesi mubiyitsi nesi muvanditsi nesi bivunda

³ nesi sefu jimagumaranu nesi murumitsi nesi mulonsi nesi mungo buketi nesi muresitsi.

⁴ Fumu amavosa rie: Nyubavega bafudu aboba basefu bogu abobaruma na bikumbu biogu.

⁵ Batu botsogasana; umosi okambisa ususu; mutu mutu okambisa mutu nandi; mufudu otumuna yinunu, yifufu otumuna aguiyitsu.

⁶ Mutu ogaanga muana taji andi, tindi muisi yifumba yiandi omutsingula rie: Ndeʼ gukivu na yijungi, ba sefu etu mu temu ejiji jimaguga.

⁷ Muna yilumbu yieni ususu owaka rie: Menu ngaa na biwelimina ukelisa ndagu ami, ugaa biguji nesi biduaru; duyapaga sefu!

⁸ Jerusalem ukunga uikungi, bufumu buJuda urakuga buirakuyi. Posulu tsiogu na bifu biogu binyongisi Fumu na begali bunsambi buandi.

⁹ Binsi biogu bibaveyi mbela, bavu dedi na bisi Sodome, bevayingi masumu mogu va gusu batu, bagemasueyi ne pesu. Ka muna maguga ma bolasu! Ukunsa bekunsi dubungu duogu!

¹⁰ Batubulilianu rie: Ka muna ubueji gu uvu na batu basigama; bolaba nsangu na abi bamasalanga.

¹¹ Ka muna maguga ma batu babi bolaba! Dubungu dubarasuna, bovagulu nana bamavayila basusu.

¹² Fumu amavosa rie: Batu bami botsogusu na baana, bagetu bobaruma; batubami, abeduwendisi bedupembusi na bedubeyi mu mansila amagaa mawelimina.

Mambu mabarumitsi

¹³ Fumu ebongi mbura andi o mulebi utabulila batu bunsonsi.

¹⁴ Fumu utabula etabuli bunsonsi bubivunda bibatu bandi na bubasefu bandi rie: Dumabivisa manungi mamfuga tsirayisan! Dumabasa mandagu menu na bima abi dumakinda bijaga!

¹⁵ Fumu aguvu Fumu Mabadi ewivuli rie: Na musuga yi duitsiarili batu bami? Na musuga yi duigesumuni bijaga?

Bagetu baboti baJerusalem

¹⁶ Fumu amavosa rie: Banumba baSion bavu na dunangu, beyenakegengila ava bewendili na mataka mageyi; bavu bamingitsi beduari milunga va pansi tsiogu.

¹⁷ Fumu obavaga mavencja miuru yika jalala.

¹⁸ Muna yilumbu yieni Fumu obagusula milunga nesi misuari nesi misanga

¹⁹ nesi bipunga nesi bapanga nesi badumbu

²⁰ nesi mifilila nesi milunga va pansi tsiogu nesi babeleeti nesi miyombu nesi mavanda;

²¹ nesi mioru nesi mioru mimbasu

²² nesi biduaru bidufunu duneni nesi bijungi bineni na bisakama nesi bakomi

²³ nesi mbuenu nesi basuti nesi mibati nesi kaba nesi bamfunga.

²⁴ Mbunga jimuyombu jigomueba, yika mbunga jibi; beleeti jigomueba, yika mukudu; mipanda migomueba, yika mavenda; bilinga bisakama bigomueba, yika basiela babama; kembu jigomueba, yika mabaka.

Bakuili baJerusalem

²⁵ Jerusalem, babaala bagu boboku na majenga; bangogaga bagu boboku o divita.

²⁶ Bisi Sion botsukama; bovongulu na botsana va tsi.