Esaie 28 - La Sainte Bible en Langue Yipunu

Dubungu duEfraim

¹ Ka muna maguga ma Samarie gulaba, ndeʼ aguvu dunangu du balangitsi baEfraim! Ndeʼ aguvu nderi dugaba dubafelera banengana adui betsani ugengila yibususu ayivu na digumba.

² Labatianu mutu aguvu na mangolu maneni eruyili ombu Fumu nderi mungundi umfula jimamanyi na nderi punga ajirakulingi nderi mfula ajibasi mujamba nyidu. Na kabu Fumu obuaga dugaba dueni va tsi.

³ Dugaba aduilasi dunangu dubalangitsi baEfraim dutsiarulu;

⁴ bafelera abamanengana abelasi kembu jiyibususu ayivu na digumba bamatsiarulu. Bavu nderi mufiga agumawela mbe ne temu dutsonsugu jisakatola yika begudokuli besundili uji.

⁵ O gusu Fumu Mabadi oba nderi dugaba aduiluli nesi kembu ajiviolili ubueji ombu bansialutsu babatu bandi.

⁶ Ovega Yinyunyi yidusungugu ombu jandi aguvu va yitsiga yibunsonsi nesi mangolu ombu jogu abebingisi bavinitsi te no makotulu mamusiengi.

Balangitsi udesa bedesi mubiyitsi

⁷ Malamu mepepilisini, malamu mamangolu mabatsiengisi misu; bavagulitsi bapagu na babiyitsi bepepilini na malamu mamangolu, berumu na malamu, betsiengili misu na malamu mamangolu bepepilini ava bebiyili na bevinsi kingu ava betabulili bunsonsi.

⁸ Tavula tsiogu tsimabasa de na bilusi na bilusi bimuinsi ogu. Bagaa ne mbura jimosi jilioma.

⁹ Bewivuli rie: Anyi erondi ulonsa diela? Anyi erondi uvindiyili malongi? Je ombu baana ababanobanguga ababanobusa mabenyi?

¹⁰ Ebalansi pesu pesu va julu pesu pesu na mambu va julu mambu.

¹¹ Ka yia! Bango dugugama nesi benyi bovosila Fumu.

¹² Diuleba amabatsingula rie: Yivumu ayiyi, silanu abamatogulu, balevuma; mbura jiyivumu ajiji! Tumba basamagaru.

¹³ Ombu gogu Mbembu Fumu jiuba: Pesu va julu, pesu na mambu va julu mambu. Va julu vana boberuga ava bewendili na botsungugu nowakululu mu murambu.

Dimanyi diyibuga

¹⁴ Badesitsi najenu aduirumi bisi Jerusalem guluanu Mbembu Fumu!

¹⁵ Jenu duivosi rie: Tumavangana pangini na dufu, tumagana kaka na mbura jiabafu. Duivosi rie: Yidungu yiuvioga yigotubemba mu mbari duisalisi ndunsulu nderi yisuemunu na mfurulu nderi yivosi.

¹⁶ La dibandu Fumu Nsambi evosili rie: Guluanu nyimasunda dimanyi o Sion adivu yibuga, dimanyi adimasolu, divu na tsongu na divu diwara; jandi agudivayila yitu agosundila urina.

¹⁷ Nyubonga musuga nderi yietsu na dusungugu nderi yidesi; mfula jimamanyi jiuvevula yisuemunu yindunsulu na mamba modiamisa yivosi yimfurulu.

¹⁸ Pangini eni na dufu jiubungu, kaka eni na mbura jiabafu jiukubuga ava yidungu yiuvioyila na jenu dutsiarulu.

¹⁹ Ava yiuvioyila temu na temu yiudugaanganga mu mbari yiuvioganga kadi kedi na nyangu na mukolu. Oyitsiyisi diambu diedidi obasu na goma.

²⁰ Nyiina, nana nongu jimabuagulu rie: Tangi jiuba jigufi ukewala vana, dimfunga diuba digeyi ukepieta.

²¹ Fumu olabana nana amalabinina o mukongu uPerassim, onyoga nana amanyoyila o yibususu yiGabaon, usala esali bisalu biandi abivu bineni na bigorungula utsigusu.

²² Duyamuekevega o mudesu mu mbarii mikudu mienu mikebatama; dubungu dubulongu buotsu dumatabulu; nyimadugulu.

Diela dimuvaritsi, diela diNsambi

²³ Liganu matuji na guluanu diufi diami! Banu limba na guluanu adi nyuvosa rie:

²⁴ Je oyifutsi uvara efutsingi temu tsiotsu? Je efutsulili mbura andi temu ajimubeji?

²⁵ Tsia banomana usiepula butamba mbana bagekuki tsangu tsinigela nesi tsikumina? Mbana bagebuayi tsangu tsible mu bilonga nesi tsiorsa va mbura jiwelimina, nesi tsiputera va panga nungi?

²⁶ Nsambi andi amamulonsa uduka motsu mana, amamulonsa malongi meni.

²⁷ Bagetsiarili nigela nesi kumina na dikulu didikalu, tumba beliomisi nigela na nguangu nesi kumina na mukasa.

²⁸ Bebuli tsangu tsible: beviosi dikulu didikalu adibegu na kabala vajulu tsionyi tumba bagetsigesumuni.

²⁹ Adina wandi diruyili ombu Fumu Mabadi aguilasi kanu tsiandi nesi diela diandi diviolila motsu ombu FumuMabadi.