Esaie 27 - La Sainte Bible en Langue Yipunu

Mbetsulu j imukuimbi-ny oga

¹ Va temu eni Fumu obonga dijenga diandi dineni adivu mengu nodimba mukuimbi-nyoga ajiriningi mbangu. Mukuimbi-nyoga aguiwendi va tulu andi diwendi rie: Leviatan.

Fumu na mfuga andi

² Va temu eni dukawimbila duimbu dumfuga tsirayisan.

³ Menu Fumu nyitsikelisi, nyitsitsatsingi temu na temu; nyutsikelisanga nyangu na mukolu yiri mutu agotsibivisa.

⁴ Ngaa na kabu tumba pa nyilabi kengitsi na matsiendi nyubirubula, nyimyensa biotsu va mosi.

⁵ Pa tsi nana bayisuema ombu gami; bavayi duvotsu nami nyiina, bavayi duvotsu nami!

Dutandulu dubaIsrael, musiengi agumasiala mududu

⁶ O gusu baJacob bobendisa ngansi, baIsrael bowansa nobasa butamba tsangu atsivu abandi.

⁷ Je Fumu amadimba batu bandi nana amadimbila bavinitsi bandi? Je amababoka nana amabokila abamababoka?

⁸ Nesi amabakilisa uwelimina ava amabasindiyila vala ava amabavembulila na mungudi uneni agumaruyila yilumbu yimosi o yiari ayi wisi epalili.

⁹ Anana mbela jibaIsrael jiugusululu, aduna duba dutandulu dumabi mogu; Fumu uvaga evayi mamanyi motsu mayinyensulu yipagu nderi mabungili mapembi amorungulu unyigu; bakosi baAstarte na bitumba biwisi bigomueba.

¹⁰ Musiengi ukandu umasiala mududu; usiala yika nana; avana baana babangombi bojanganga nosiliminanga notabulanga bitayi.

¹¹ Pa bitayi bimagumuga bibonduyi; bagetu beruyi uyibinyensa. Batu beni bagejabi diambu. La dibandu agumabavaga agebalasi yingeba, agumabasunda agebavayili maboti.

Dugabugu dubaviga

¹² Va temu eni Fumu ovaga dutsonsugu ubanda o mujamba uEuphrate te no mijamba migeyi miEgypte; jenu baIsrael dubolungu umoʼ umosi!

¹³ Va temu eni bosiga mumbanda uneni mbana abamabegu baviga o Assyrie bogabuga nesi abamarina o bulongu buEgypte; jogu botsu bogudama va gusu Fumu va julu mukongu Nsambi o Jerusalem.