Esaie 26 - La Sainte Bible en Langue Yipunu

Musiengi ukandu

¹ Wa temu eni bowimbila duimbu duedudu o bulongu buJuda rie: Jetu tuna musiengi ukandu agu Fumu ekelisi.

² Dibulanu maguyi yiri bisi malongu abavu basungama na basigama bokotanga.

³ Matasa mogu mavu sikiri, guvega duvotsu ombu jogu abamakevega ombu gagu.

⁴ Keveganu mutubu ombu Fumu, nyiina, Fumu avu Dimanyi dikula tsiotsu.

⁵ Amagudiga abamatsananga o julu tsimikongu na dunanga duogu; amasundusa musiengi agumaba o julu mukongu; amagubuaga o tsi dufudundu,

⁶ umatsiarulu na bijaga nesi abamakambulu.

Dusambu dutemu ajiusita

⁷ Nsila jimutu usungama jivu jidesama; ndeʼ Fumu gukamusiepulila nsila.

⁸ Aa Fumu, jetu wetu tuiguvivi! Nyiina, Fumu, uduka tuiduki migaga miagu, tuvu nsumbumbu ava tuiguvivili. Diina diagu nesi yirangumunu yiagu biudugusu nsala tsimirima mietu.

⁹ Mukolu nyina nsala agu, nyigurombi na murima ami uotsu. Ava kaka tsiagu tsidugusulu avaria bisi bulongu bewijili dusungugu.

¹⁰ Diuleba yingeba yiulasu ombu batu babi bagewiji dusungugu, bekevega uvaganga mabi mu bulongu abuvu na dusungugu na bagekipi buneni buFumu.

¹¹ Fumu, ndeʼ guvu na tindi mangolu, bagedijabi. Balabi yiusila yiagu ombu batu bagu na balabi yisonyi. Muji uisielisini bavinitsi bagu!

¹² Fumu, ndeʼ guituveyi duvotsu, ndeʼ guitudugusulu motsu ama tuivayi.

¹³ Fumu Nsambi etu, bafumu basusu bamaturuma, tumba jetu tuiyitsi yika diina diagu.

¹⁴ Jogu abamafu bagomueba na monyu, bamfumbi bagomuerambuga mu mbari ndeʼ gumabakilisa na gumababungu na bagomuerangumunu.

¹⁵ Aa Fumu, funisa batu! Funisa batu, lasa bundumbu buagu; kuekisa mandilu motsu mabulongu.

¹⁶ Fumu, tumaguromba ava tumalabila munyongu, tumasambila ava gumatukilisila.

¹⁷ Aa Fumu nana mugetu aguvu na dimi avu bebeli nobura ekenyungasana na egamuyi ava egululu misongu, anana tumaba ava tumabila vala nagu!

¹⁸ Tumadila mimi, tumagulu misongu tumabura yika punga. Tusamajaba uwakisa bisi butamba kalala, nesi ubuesa batu bagona o bulongu.

Dusambu duabafu, mukilu ubukongu

¹⁹ Batu bami, abenu abamafu bomueba na monyu, bamfumbi bami barambuyi, jenu bisi difufundu, rambuganu na labanu ubueji! Fumu ogunoyisila disala adivu nderi dinogu dikedi, butamba bugabusa bamfumbi.

²⁰ Batu bami wendanu, kotanu o mandagu menu na dibiganu maguyi; yesuemanu mua pesu temu te na kabu jiFumu jiusaguga.

²¹ Labatianu Fumu upala epali o mbura andi uyikilisa bisi butamba mu diambu dimabi mogu. Butamba bulasa malungu amamatsatsu muna, bugomuedibiga abamafu.