Esaie 25 - La Sainte Bible en Langue Yipunu

Fumu, yisuemunu yibasigama

¹ Aa Fumu, ndeʼ guvu Nsambi ami! Nyigukakisi na nyiyitsi diina diagu mu mbari na usigama uagu gumavaga mambu maneni ama gumagana kala.

² Gumakalusa musiengi yika diguki dimamanyi, musiengi ukandu yika utsiemuga; yivaga yibenyi yimapansu na yigomuerungululu via.

³ La dibandu batu abavu na mangolu begukakisi, misiengi mineni mimalongu migudumi.

⁴ Ndeʼ guvu yisuemunu yi-abadeda, yisuemunu yi-abamakambulu na yibango munyongu. Ndeʼ guvu yisuemunu yimungudi, guvu yivosi usuemina yiusila. Kimbu jibango dikasi jivu nderi mungudi aguisindili yibaga.

⁵ Jivu nderi yiusila yiwisi o yiari yigumuga, gumavotsa nduku jibenyi dedi mosi nana yiusila yivotsu na yidumbitsi yimamungi. Dedi mosi na nyimbu tsindungulu tsibango dikasi tsimavotsulu

Mulambu iibatu botsu

⁶ Fumu Mabadi ogabila batu botsu abavu va julu mukongu mulambu unyama tsivonga nesi malamu magulu, diwendi rie: nyama tsiviolila ubueji. Nesi malamu maviolila ubueji.

⁷ Va julu mukongu eni opansa dumbu aduidibiyi batu botsu nesi dimfunga adigumbi bisi malongu motsu.

⁸ Obunga dufu mutubu. Fumu Nsambi otsindula matsanga mu binsi biotsu, ogusula yisonyi yibatu bandi mu bulongu buotsu. Fumu agumadivosa odiwarisa.

Nsangu jibaIsrael, maguga mabisi Moab

⁹ Va temu eni bovosa rie: Labatianu, Nsambi etu agumatuvayila yitu oyitugobuli. Nyiina, Fumu agu tumavayila yitu. Sangilanu na labanu ubueji na Mugobutsi etu!

¹⁰ Dikaka diFumu divu va julu mukongu egugu. Tumba bisi Moab bamatsiarulu vana vana, dedi mosi na kobu atsimatsiarulu va dibumbu.

¹¹ Va gari dibumbu dieni bosamba makaka dedi mosi na mubuilitsi ava ebuilili; diuleba bejabi usala na makaka mogu Fumu odiamisa dunangu duogu.

¹² Moab, Fumu oberusa bivaga bienu bisakama; obibunga nobibuaga va tsi te na biukaluga difufundu.