Esaie 23 - La Sainte Bible en Langue Yipunu

Dubungu duPhenicie

¹ Mbigulu mu diambu diTyr. Jenu bisi makumbi mamamba maTarsis, lilanu! Mu mbari yisuemunu yienu yimapansu: Misamu mieni mimaruyila o bulongu buKittim.

² Banu sui, jenu bisi disimu dimubu, banu sui, batiyitsi bamuteti baSidon. Jenu adumasabuganga mubu.

³ Dumasabuga mamba maneni wandi muna mamaruyila tsangu tsible tsiNil, mujamba umaba tsongu ji-uonyi agumaba dikasa dibisi malongu.

⁴ Aa Sidon laba yisonyi ndeʼ aguvu yivaga yimubu! Mubu umavosa rie: Nyisamagulu misongu na nyisamabura via; nyisamabungula baana bababaala nyisamabangusa baana babagetu.

⁵ Ava bisi Egypte bogululu misamu midubugu duTyr boregama.

⁶ Wendanu o Tarsis jenu bisi disimu dimubu, lilanu!

⁷ Aguna tsiri musiengi enu agumabasanga na nsangu? Musiengi ukala kala agumapalisa malongu mapuela?

⁸ Anyi amatabulila Tyr diambu diedidi? Tsiri musiengi eni agumagabila basusu kaba? Tsiri batiyitsi bamuteti bandi abamaba barumitsi? Tsiri basumbisitsi bandi babima abamaba bisina uviolila biotsu bibutamba?

⁹ Fumu Mabadi amatabula diambu diedidi usundusa bango dunangu nosundusa baneni botsu babutamba.

¹⁰ Numba jiTarsis linga nana guirondili o bulongu buagu nesi o mujamba uNil!

¹¹ Fumu amalasa mangolu mandi mu mubu; amareyimisa bufumu; amarumisa dubungu dubivaga biCanaan.

¹² Amavosa rie: Numba jiSidon, ndeʼ aguvu tsiemi ajimabivusu, gugomuelabanga nsangu! Relama, wenda o yiari yiKittim! Avana wandi gugoba na yivumu.

¹³ Labatianu bisi Babylone basatsi. Bisi kumu beni gaba muisi Assyrie amavaga dilongu, jogu berungi mandagu masakama na bepansi mandagu mabakaga baTyr yika dibumbu na dibumbu.

¹⁴ Jenu bisi makumbi mamamba maTarsis, lilanu! Mu mbari mbura enu jimapansu.

¹⁵ Kabogu Tyr ulibunu ne magumidusambuali mabilima abivu yitsingu yikaga. Magumidusambuali mabilima manovioga, diulabana o Tyr adi duimbu duyimbembu dumasonugu rie:

¹⁶ Bonga yitara yiagu linga mu musiengi! Numba jilibunu, siga na buranga, wimbulila nyimbu tsiagu yiri bogurangimina!

¹⁷ Magumidusambuali mabilima manovioga Fumu olingula Tyr; umuedila futa tsinsoruru tsiuonyi; umuevaga bumbembu na bufumu buotsu bubutamba.

¹⁸ Tumba futa andi na mbika andi biuwakusu ombu Fumu, bigogukugu na bigosuegu mu mbari futa andi jiuvegu ombu jogu abetsani va gusu Fumu ubalisila nobaduisa.