Esaie 22 - La Sainte Bible en Langue Yipunu

Dilubu ombu bisi Jerusalem

¹ Mbigulu mu diambu diyibususu yi biriariamu. Jerusalem diambu yi divu nagu? Dibandu yi batu bematili o julu tsimiansa?

² Aa musiengi ukumfu ubasa de na nduku! Aa musiengi ubasa na nsangu! Bamfumbi bagu basamaboku na majenga, basamaboku o divita.

³ Basefu bagu botsu berini va mosi, banongitsi bambansa bamabakotisa o tsugu; botsu bamagaangu baviga, diuleba bamarina vala.

⁴ La dibandu nyivosili rie: Duyakengila, nsingisianu ulila na munyongu nana nyirondili; duyaromba umbembiga mu diambu didubungu dubatu bami.

⁵ Yivu yilumbu yikimbu nogesumuna na kumfu ayi Fumu aguvu Fumu Mabadi amatinda o yibususu yibiriariamu. Upansa bepansi baviga, mugamu umunyongu umagulunu o yiari yimukongu.

⁶ Bagora baElam bamabonga bapalu bogu; makalu mamabasa na batoyitsi na bebeyitsi babakabala uweʼ bewendi mambangu; bagora baQuir bamanangula ngubu tsiogu.

⁷ Jerusalem, bibususu biagu abiviolila ubueji bivu bibasa de na makalu ukunsama bekunsimi utoga divita va makotulu magu.

⁸ Dugagu duJuda dumagusulu. Va temu eni dutasila bitogulu abivu o ndagu jinengulungu Musiru.

⁹ Dugengila maluta mapuela amatobu o bivaga bimusiengi uDavid, na dulunda mamba o ditanga adivu o tsi.

¹⁰ Dutala mandagu maJerusalem na dupansa mamosi uwarisa yivaga.

¹¹ Duvaga ditanga dimamba va gari bibaga bibeji ubasisa ditanga digulu tumba dugetasili agumamavaga nesi agumamakunsa kala.

¹² Fumu aguvu Fumu Mabadi odunengila va temu eni ulilanga nodumanga tulu tsienu, nesi ufuga maviolu noduara basiela.

¹³ Ka muna nsangu ji duilabi! Uboka beboki bangombi, uboka beboki bindombu, uji beji banyama na unu benu malamu! Jogu rie: Tujianu na tunuanu, mugesa tufuanu!

¹⁴ Fumu Mabadi amansingula bulumbi buebubu rie: Viaga, dugotandu dibi diedidi te na dufu. Fumu aguvu Fumu Mabadi amadiwarisa.

Chebna amatsiemusa mbura andi

¹⁵ Fumu aguvu Fumu Mabadi jandi rie: Wenda ombu Chebna musalitsi ukaga aguvu murumitsi o ndagu kaga, gukamuwivula rie:

¹⁶ Yi guivayi vava? Anyi atsiguvega musuga? Na musuga yi guitimini ngila? Nyiina, utima etimi ngila andi ajiuba o julu; yivumunu yiandi yiuba o gari mamanyi!

¹⁷ Fumu na mangolu mandi ogubuaga vala. Ogutinda nderi ndeela jigeyi.

¹⁸ Ogubungasana nderi ndeela va mburajineni. Va mbura eni gufuila avana makalu magu maboti mosialila. Gulasa ndagu fumu agu yisonyi!

¹⁹ Fumu amavosa rie: Nyugupatula bisalu biagu, mbura agu jiugupatulu wandi.

²⁰ Va temu eni nyunengila musalitsi ami Eliaquim muana dibaala uHilquia.

²¹ Nyumuduisa yijungi yiagu nesi beleeti agu na nyumuwakisa musuga agu; jandi oba taji jibisi Jerusalem na bisi ndagu Juda.

²² Nyumuvega tsafi jindagu David; ava odibulila yiabutsu mutu agodibiga; ava odibiyila mutu agodibula.

²³ Nyumuwarisa nderj dusongu adumagomunu va mbura jiwara, jandi obanganga va yitsiga yibundumba yindagu taji andi.

²⁴ Jandi aguvakugulu bundumba buotsu butaji andi, na bategula bandi boba nderi bisalulu bigeyi na bansienga na bisanga abiuvakugulu mu dusongu.

²⁵ Fumu Mabadi amavosa rie: Yilumbu yimosi dusongu adumagomunu va mbura jiwara dugusulu; dudimbu na dutabuga na mufuna uotsu agumavakugu muna ubuliga. Fumu agumadivosa odiwarisa.