Esaie 21 - La Sainte Bible en Langue Yipunu

Duberugu duBabylone

¹ Mbigulu mu diambu dikumu tsi Mubu. Nana mungudi uiruyili o tandu anana muvinitsi eruyili o kumu tsibulongu abuidumu.

² Nyimalaba yiriariamu yineni. Mukuanitsi amakambisa mubungitsi oyibungingi. Bisi Elam wendanu! Bisi Medes kandanu musiengi! Nyuvotsa minyinga miotsu.

³ Nyuru tsiami tsibangingi buali; misongu mikaangi nderi mugetu aguiburi. Nyimakambulu na adi nyigulu na nyireyimi mu adi nyilabi.

⁴ Murima ami uvu o julu, goma jimakaanga; nyimaviva mukolu uba sui, kondini; mukolu nyimalaba tindi goma.

⁵ Ukunsa bekunsi tavula, usunsa besunsi watsi, uji beji, unu benu … Mugamu umasundila ugulunu rie: Bivunda bibagora relamanu! Singanu matsi mu bangubu!

⁶ Fumu amatuma rie: Wenda yesunsa bawatsi; bakatubula adi bolaba.

⁷ Bamalaba babeyitsi babakabala banangama va julu bakabala bogu, babeʼ babeji, bebeyitsi bababuru va julu baburu, babeyitsi babasamo va julu basamo.

⁸ Mbana amagamuga rie: Fumu nyivu diteli o julu ndagu jisakama yilumbu yimfuimbila nesi mikolu miotsu.

⁹ Laba babeyitsi babakabala uruga beruyi babeʼ babeji mu bakabala! Ugamuga begamuyi rie: Babylone umaberuga! Babylone umaberuga! Bitumba biotsu bibansambi bandi bimabubuliga va tsi!

¹⁰ Jenu batu bami dumatsiarulu na dumagesumunu va yisagulu nderi tsangu tsible; adina nyimadigulu ombu Fumu Mabadi aguvu Nsambi Israel adina nyidutsinguli.

Diweru yi tukivu?

¹¹ Mbigulu mu diambu diDouma. Bamakamuyila o Seir rie: Watsi diweru yi tukivu? Watsi diweru yi tukivu?

¹² Watsi amawagula rie: Wisi yika utebuga tumba pisama jikivu. Pa duirondi umuekwivula, ka kwivulianu! Dukamueruga temu jisusu.

Barinitsi baDedan na baQuedar

¹³ Mbigulu mu diambu diArabie. Jenu balinsi baDedan, silamanu mu musiru uArabie.

¹⁴ Jenu bisi Tema, baveyianu mamba, jogu abavu na puila; veganu biguji ombu barinitsi.

¹⁵ Urina berini majenga, majenga amamapalusu nesi bapita; berini divita adimaranga.

¹⁶ Fumu amansingulila rie: Nana bengasisili musalitsi yilima yimosi dedi mosi vaki yika yilima yimosi na bundumba buQuedar busuka.

¹⁷ Fumu Nsambi Israel amavosa rie: Vosiala yika mua dutalu dugeyi dubanongitsi bambansa na bagora baQuedar.