Esaie 18 - La Sainte Bible en Langue Yipunu

Ulubusa belubusi bilumbi biEthiopie

¹ Ka muna bulongu bu abugulunu nduku tsibitogulu atsiutola nesi o masimu mamijamba miEthiopie!

² Buisindiyi bilumbi mu makumbi amamavagu na bilelenga mu mujamba uNil! Bilumbi lensanu nowenda o bulongu abuvu na mangolu na buwara nesi ombu batu beni baranga ubanda va dibandu diogu. Bulongu bumangolu abuigesumuni biotsu buvu na mandilu mamijamba.

³ Jenu batu botsu aduitsani mu butamba, jenu batu botsu o bulongu, gengilanu yilimbu ayimamatusu o julu tsimikongu; guluanu mumbanda uisigu!

⁴ Fumu amansingula rie: Nyuba sui va mbura ami; yiusila yinyangu yiubanganga na dimungi didisala diumatanga va yiusila yidutsonsugu

⁵ tumba ne dutsonsugu dukatola, bitayi binomana uwansa na bisaga birayisan binowela otabula birongula abigaa na tsongu nesi bitayi abimawala yiari na yiari.

⁶ Botsu boligulu nsima, batsoli bamikongu na bibulu bimusiru biubajanganga; batsoli bobadoda va mangala na bibulu biubaji va mfula.

⁷ Vana temu eni batu beni bobega miensili ombu Fumu Mabadi, batu abavu na mangolu na bawara nesi abavu baranga ubanda va dibandu diogu, abamagesumuna biotsu nesi biriongu abuvu na mandilu mamijamba. Miensili miubegu va mbura aji Fumu Mabadi avu: o mukongu uSion.