Esaie 14 - La Sainte Bible en Langue Yipunu

Abamaruyila o buviga

¹ Fumu olasa bategula baJacob yingeba, omuelasa yiri amasola Israel. Omuebagabusa o bulongu buogu; benyi bofubana nogu mbana bogukama o ndagu Jacob.

² Benyi bobabega nobagabusa o dilongu diogu. BaIsrael bobadila nana basalitsi bababaala na babagetu o dilongu diFumu. Bovaga abamabavaga baviga, baviga na borumanga abamabakuananga.

Disukusulu dikaga jiBabylone

³ BaIsrael ava Fumu oduveyila yivumu: yimaali nesi yigoma nesi yibuviga

⁴ duwimbilila kaga jiBabylone duimbu duedudu rie: Ka yia! Mungo dikasi asatsi! Mukuanitsi agemuekuana!

⁵ Fumu amabogula nguangu jibatu babi nesi muansu ubarumitsi

⁶ abamadimbisanga batu na fuiri makuba amagaa yilosi; abamarumanga batu na dikuana adigaa yilosi.

⁷ Batu botsu bamasangila yivumu na duvotsu; bamawimbila nyimbu tsinsangu.

⁸ Miri misipara na misedera miLiban misangili rie: Yiotsu ayi gumabondusu mutu ageruyi uyituwanga.

⁹ Mbura jiabafu te na ndonga tsijionyi bimapupusu ugubengusana. Mu diambu diagu bamarambusa abamafu kala nesi botsu abamaba barumitsi nesi abamatsana va bitsiga biogu bibufumu urumanga malongu.

¹⁰ Botsu bevosi rie: Ndeʼ wagu gugaa na mangolu guvu nderijetu, nyiina gumabagunu netu.

¹¹ Bundumba buagu bumasunduga o mbura jiabafu va mosi na bangomfi bagu; o tsi agu uvu diguki dibayinyi na bayinyi bavu dimfunga diagu.

¹² Labati gumabonduga o julu! Mbuelili ajiluli, muana dibaala umatebugulu! Ndeʼ gumabetu va tsi, ndeʼ agumabelisa malongu!

¹³ Gumavosanga rie: Nyumataojulu, nyurunga yitsiga yiami yibufumu o julu nesi bambuelili baNsambi; nyutsana va julu mukongu agu bansambi bebenguni o tindi banda.

¹⁴ Nyumata o julu mamungi, nyuba dedi na Nsambi Aguvu Uneni.

¹⁵ Tumba gumabondusu o mbura jiabafu o gari ndonga tsiotsu.

¹⁶ Jogu abegulabi begugengili yisuisu na nbeguwiji. Bewivuli rie: Tsiri dibaala dieni agutsireyimisanga batu nesi upupisa bufumu?

¹⁷ Tsiri jandi agumakalusa bulongu kumu? Tsiri jandi agumabunga misiengi? Tsiri jandi agumabusa ujeyisa bakoli bandi?

¹⁸ Bakaga botsu bamalongu, nyiina, botsu bana duyitsu, mutu mutu avu o ngila andi.

¹⁹ Tumba ndeʼ gumabuagu kulini, gusamatsigu, nderi muana agumaburu ufu kala nderi mutu agumaboku o divita na agumabuagu o mbengi jimamanyi nderi mfumbi ajitsiarulu.

²⁰ Tumba gusakabuagu nogu o mangila mu mbari gumabunga bulongu buagu na gumabokisa batu bagu. Bayamueranguna diina dibatu bagu via!

²¹ Kunsanu dubungu dubaana bababaala mu diambu dimabi mabataji bogu! Mu mbari baana bogu bobialila bulongu nobasa butamba na misiengi miogu.

²² Fumu Mabadi amavosa rie: Nyutoga nogu nobunga diina dibufumu buBabylone notsiemusa yirangumunu yibuonyi, nesi bategula.

²³ Fumu Mabadi amavosa rie: Nyubuvaga yitsanunu yibatsibitsi nesi dianga, nyiina, nyububunga tindi ubunga.

Disukusulu dimakuana

²⁴ Fumu Mabadi amagana kaka rie: nyiina, adi nyimatabula diulabana, nana nyimatabulila na murima ami anana diubila.

²⁵ Nyugesumuna muisi Assyrie mu bulongu buami, nyumutsiarila va julu tsimikongu miami; yilala yiami yiubagusulu nesi mufuna ugusulu.

²⁶ Adina Fumu amatabulila batu botsu na nsiembu atsi esiembi bisi malongu motsu.

²⁷ Fumu Mabadi amatabula diambu. Anyi otumuna pagu nandi? Mangolu mandi mamalabana. Anyi orungula uvinsa kingu andi?

Dilubu ombu baPhilistin

²⁸ Mbigulu ejiji jimabigulu mu yilima yidufu dukaga Ahaz.

²⁹ Jenu baPhilistin duyasangila mu mbari mukasa agu dumadimbulungu umatabulu! Mu yifumba yibanyoga mupalila muemfu; mu dikeji di-uonyi mupalila mukuimbi-nyoga.

³⁰ Tindi bijaga bodilanga biguji, abamakambulu botsana na mirima misunda; nyubokisa bategula benu na nsala nesi bansialutsu benu boboku.

³¹ Maguyi, lilanu! Misiengi, gamuganu! Jenu bisi bulongu buotsu bubaPhilistin regamanu! Mu mbari nsumbili jiruyili o banda milonga mibavinitsi mivu fikafika.

³² Diambu yi bowagula jogu abamasindugu? Fumu amawarisa Sion na batu bandi; abamakambulu bodila yisuemunu muna.