Esaie 13 - La Sainte Bible en Langue Yipunu

Disukusulu diBabylone

¹ Mbigulu mu diambu diBabylone atsimalasu ombu Esaie muana dibaala uAmots.

² Fumu amavosa rie: va julu mukongu agugaa na biriri religa yilimbu, nengilanganu batu, bagebuli na makaka; bakakotila o miunu mindagu mibatu baneni.

³ Nyimaruma aba nyimasola; nyimanengila bangogaga bami abamasangila ndungulu ami, uyenalasa kabu ami.

⁴ Begulu mangunguri o julu tsimikongu nderi nduku jibatu bapuela. Begulu kumfu jibufumu nderi malongu amamagukama. Fumu Mabadi egukiyi bagora utoga divita diandi.

⁵ Beruyili o bulongu buvala o masuka mabulongu; Fumu na bitogulu biandi obunga butamba buotsu.

⁶ Lilanu mu mbari yilumbu yiFumu yika bebeli, yiuruga nderi dubungu duMungo Mangolu Motsu.

⁷ La dibandu makaka motsu mavu volongu na mirima mibatu botsu mimadeda.

⁸ Bamalaba goma na bamagaangu na buali nesi keri. Ubuka bebuki nderi mugetu aguvu na misongu. Bamagengasana ava bamagaangulu na goma, yika yisonyi belabi.

⁹ Guluanu, yilumbu yiFumu uruga yiruyi yilumbu yimukilu ukabu na fuiri andi. Ogumusa butamba buotsu nesi ubokisa bavayitsi bamasumu.

¹⁰ Bambuelili na maguki mogu bagomuelasa yijalala. Wisi upinda vana matebugulu. Tsungi jigomuebatsa muetsa.

¹¹ Fumu amavosa rie: Nyukilisa bisi bulongu na ndunsulu tsiogu nesi batu babi na mabi mogu. Nyutsiemusa dunangu dujogu abavu tsamanga na nyusundusa bango dikasi na ukematisa uogu.

¹² Nana divu divura udila tindi lora nesi lora jiOfir, dedi mosi diuba uvura umuelaba babaala bapuela.

¹³ La dibandu julu jiuregama ne mabandu mabutamba mopupusu mu yilumbu yikabu jineni jiFumu Mabadi.

¹⁴ Nana tsiesi obumbuyila, nana mugamba bindombu agugaa na mubungulitsi uipansiyili, dedi mosi na batu; mutu mutu ogabuga ombu batu bandi.

¹⁵ Botsu abojasunu bonongu; botsu abogaangu boboku na dijenga.

¹⁶ Baana bogu bogesumunu va misu mogu, mandagu mogu mokindu na bobivisa bagatsi bogu.

¹⁷ Guluanu nyusibisa bisi Medes ubatoyisa bagekipi lora jivema na bagenyungili lora.

¹⁸ Na pita tsiogu boboka bafudu na bagolasa baana bakali yingeba na bagokipa matambara.

¹⁹ Babylone bufumu bunsangu abumarombisa bisi Babylone dunangu buba nderi Sodome na Gomorrhe ami Nsambi amabunga.

²⁰ Busiala mududu; batu bagomuetsananga muna; bilayilayi bagomuerangiga mandagu mamatsanda muna, na babungulitsi babindombu bagomuekelisa migamba miogu muna.

²¹ Bambala bobialila mandagu mogu nesi bibidu na ba-otarisa na bakombu boyenalinganga muna.

²² Makoju molilanga o mandagu makandu na migengi o mandagu mabakaga. Disukusulu diBabylone dika bebeli na bilumbu bi-uonyi bimasuka!