Esaie 10 - La Sainte Bible en Langue Yipunu

Aberombisi kabu jiFumu

¹ Ka muna maguga ma ombu jogu abevosi migaga amigaa misungama nombu abetubuli migaga amitsoyisingi!

² Na mionyi bewimini bijaga dusungugu na bepatuli batu bami abamakambulu musuga ogu; bekindi bakuili na mionyi, na bedayi bisiana na mionyi wandi.

³ Yi duvaga mu yilumbu yimukilu ava mungudi udubungu uruyila o vala? Ombu nyi durina udila duwamusu? Agunyi dusila busina buenu?

⁴ Jenu bamosi dubandama va gari bakoli jenu basusu duberuga va mosi na bamfumbi. Ne nana kabu Fumu jigosaguga, via, nguagu jikivu va dikaka diandi.

Muisi Assyrie amalobuga mandilu

⁵ Ka muna maguga ma ombu muisi Assyrie aguvu nderi nguangu ajilasi kabu ami! Nguangu ajivu va dikaka diandi jivu kabu ami.

⁶ Nyumusindiga utumuna batu babi nesi ubakinda nesi uvula batu abetombisi unyoga nobatsiarila dedi mosi na diobu.

⁷ Tumba tsiri nana muisi Assyrie edigululu; adina tsiri ditasa diandi; ditasa diandi divu yika utsungula nesi ugudisa bisi malongu mapuela mapuela.

⁸ Ewivuli rie: Baana bami babakaga bagaa dedi na bakaga?

⁹ Kalne usamaba dedi na Karkemich? Hamat usamaba dedi na Damas?

¹⁰ Mbe nyimadimba bufumu abumaba na bansambi abamaviolila baJerusalem na baSamarie.

¹¹ Ngovayila Jerusalem na bansambi bandi adi nyimavayila Samarie na bansambi bandi?

¹² Tumba ava Fumu omanina bisalu biandi biotsu o mukongu uSion no Jerusalem mbana okilisa kaga jiAssyrie mu diambu didunangu duandi nesi mu diambu ditsamanga andi.

¹³ Tumba evosi rie: Nyimavaga motsu mana na mangolu mami na nyimamavaga na diela diami mu mbari nyina dujabu. Nyimakuekisa mandilu mabatu na nyimakinda bilundulu biogu; nyimasundusa bakaga abamatsana va bitsiga bibufumu.

¹⁴ Nana bebongili diuva nyimabonga busina bubisi butamba; nana bebolili makeji amamasiala mafilila, nyimabola biotsu va butamba; vasamamueba batu abamaweliga upupa nesi udibula miunu nesi utata.

¹⁵ Divu diwelimina yiri diumbi diukedodisa ombu jandi oyidisalisi? Yiwasu yiukematisa ombu jandi oyiyisalisi? Nguangu jigegaangi mutu, mutu egaangi nguangu; dedi mosi mutu esalisi mukasa, mukasa ugesalisi mutu.

¹⁶ La dibandu Fumu aguvu Fumu Mabadi osingisa dubungu dubagora baAssyrie.

¹⁷ Fumu aguvu Yijalala yiIsrael yiukaluga muji agusielasana kengitsi nesi matsiendi; odivaga yilumbu yimosi;

¹⁸ osielasana dunyuru na muvumu dedi mosi nana esielisini bundumba bumusiru nesi nungi. Diulabana nderi mutu agumasielusunu na buali.

¹⁹ Miri amimasiala o musiru miurungula utalu ne na muana.

Bansialutsu baIsrael

²⁰ Va temu eni bansialutsu baIsrael nesi babaJacob bogomuegengila abamabadimbanga tumba bogengila Fumu novayila Nsambi Israel yitu.

²¹ Bansialutsu bogabuga, nyiina, bansialutsu babaIsrael bogabuga ombu Nsambi Mangolu.

²² Diuleba jenu baIsrael dumaba nderi yisieyi yimubu yika bansialutsu bogabuga; dubungu dumatubulu, duonyi dubanganga na dusungugu.

²³ Dubungu dueni adumatubulu, Fumu aguvu Fumu Mabadi odudugusu mu malongu motsu.

Duyaduma muisi Assyrie

²⁴ La dibandu Fumu aguvu Fumu Mabadi evosili rie: Jenu batu bami aduitsanini o Sion duyaduma muisi Assyrie! Diuleba dudimbu na nguangu na enanguli mukasa andi ududimba dedi mosi nana bisi Egypte bamaduvayilanga.

²⁵ Mua pesu temu mukilu ami usuka mbana kabu ami jiumubunga.

²⁶ Fumu Mabadi omufuitsa mukasa dedi mosi nana amadimbila bisi Madian va dimanyi diOreb; onangula nguangu andi mu mubu dedi mosi nana amajinangulila bisi Egypte.

²⁷ Va temu eni Mufuna andi ugusuga va disambaka diagu nesi yilala yiandi va julu disambaka diagu; diroga diagu diubogula yilala. Muvinitsi umata emati o Samarie

Muvinitsi ubambana ebambini na Jerusalem

²⁸ amananga Ayat na amavioga Migron amasila mifuna miandi va Mikmas.

²⁹ Bevioyi diviogulu na bevosi rie: Tusilama na mukolu o Gueba; bisi Rama bereyimi, bisi Guibea, musiengi uSalu bamarina.

³⁰ Numba jiGallim gamuga mugamu agu! Laicha kebana! Anatot, ka muna maguga ma gulaba!

³¹ Bisi Madmen bamapansiga, bisi Guebim bamarina.

³² Bamasikama yilumbu yimosi o Nob, bamasovisa numba jiSion o yikundubuga yiJerusalem.

³³ Gulu, Fumu aguvu Fumu Mabadi ubogula eboguli bitayi na dikasi; miri misakama mimatabuga amineni mimaberuga.

³⁴ Owanga miri miotsu nesi misedera miLiban miuberuga.