Ephesiens 5 - La Sainte Bible en Langue Yipunu

Nsanunu o yijalala

¹ Duji baana badurondu duNsambi kabogu mugukulilianu na wendanganu nana jandi amawendanga.

² Nana Christamadurondila na amakevega muensili aguvu nderi pagu ajivu na mbunga jiboti kabogu jenu wenu rondasananu munongu mosi.

³ Buvuyisa na munongu uotsu umuinsi na ngusu biyarangunu ne temu mosi va gari enu, jenu batu baNsambi.

⁴ Duyaba na posulu tsindunsulu nesi tsibuduka nesi tsimakeki. Tumba gabusilanga Nsambi diboti.

⁵ Jabanu rie: Yimbembu vo mutu mubi vo mungo ngusu bagojaba Durumu duChrist na duNsambi.

⁶ Duyagulu posulu tsibuduka atsirunguli udunsa mu mbari botsu abetsigulu bolaba kabu Nsambi.

⁷ Kabogu duyaba na yimbatsi na jogu abetsivosi.

⁸ Jenu beni dumaletsana nderi duvu o tsi pisama jimasumu tumba yiotsu ayi dumakaluga batu baFumu duitsani o yijalala. Kabogu nsanunu tsienu tsibi nderi tsibatu abavu o yijalala.

⁹ Mu mbari yijalala yilasi maboti na masungama na mangensa.

¹⁰ Wijianu amavu mawelimina na Fumu.

¹¹ Duyabambana na batu abevayi mambu makulini o tsi pisama jimasumu tumba matubulianu.

¹² (Tuilabi yisonyi uvosa ama jogu bevayi o musuega.)

¹³ Ava motsu mamatubululu va yijalala mirima miujabunu

¹⁴ mu mbari yijalala yimonitsi motsu. La dibandu dimasonugulu rie: Ndeʼ aguiwendi yilu, rambuga! Simbuga va gari abafu na Christ ogumonitsa nsila.

¹⁵ Kabogu kebananu na kwenditsi enu. Duyaba biduka tumba banu bango diela.

¹⁶ Duyaviosa temu kulini mu mbari bilumbu bimabiva.

¹⁷ Kabogu duyaba biduka tumba tsiyisanu duganu duFumu.

¹⁸ Duyalanga; dionyi la nsoruru. Tumba banu dubasu na Yinyunyi yiNsambi.

¹⁹ Warasananu na Nyimbu na tsavu na nyimbu tsibunyunyi; wimbilanganu na yitsanganu Fumu na mirima mienu miotsu.

²⁰ Gabusilanganu Nsambi Tata diboti temu na temu mu diina diFumu etu Jesus Christ.

Bagatsi na balumi

²¹ Kesunsanu bamosi va gusu basusu mu diambu diChrist.

²² Bagetu kesunsanu ombu balumi benu munongu mosi nana ombu Fumu.

²³ Mulumi aji muni umugatsi nana Christ avu mum udibundu adivu dunyuru duandi na jaʼ beni aji Mugobutsi.

²⁴ Kabogu bagetu bakesunsa ombu balumi bogu mu motsu nana dibundu dikesunsila ombu Christ.

²⁵ Balumi, rondanu bagatsi benu munongu mosi nana Christ amarondila dibundu na amakevega mu dionyi.

²⁶ Amadiliomisa na mamba na mambu mandi yiri orungula udiwakisa ombu Nsambi.

²⁷ Mbana ava diubila mbura jimosi nandi digoba na muinsi uotsu tumba diuba diNsambi na disungama.

²⁸ Balumi barondi bagatsi bogu nana tindi nyuru tsiogu. Jandi oyirondi mugatsi andi ekeronda jandi beni.

²⁹ Na kala mutu asakavina dunyuru duandi; tumba edulisili nodukelisa na buranga nana Christ edivayili dibundu

³⁰ mu mbari jetu tuji bilema bidunyuru duandi.

³¹ Bisonu bisonugu rie: La dibandu dibaala osila taji andi na nguji na onamana na mugatsi andi na jogu babeji boba yika dunyuru dumosi.

³² Yisuegu yieni yivu yineni; nyivosili dionyi mu diambu diChrist na dibundu.

³³ Tumba yivu yiwelimina ombu genu wandi. Mulumi mulumi arondi mugatsi andi nana ekerondila na mugatsi mugatsi ayitsi mulumi andi.