Dutalu 8 - La Sainte Bible en Langue Yipunu

Dingasa

¹ Fumu amatsingula Moise rie:

² Tsingula Aaron rie: Ava guvakiyila yisambuali yibalambi mu dingasa, bamonitsi o gusu.

³ Anana Aaron amavayila; amavakiga balambi o gusu dingasa nana Fumu amarumina Moise.

⁴ Dingasa dimaba lora na lora ajimabaku; dimavagu nana Fumu amarumina Moise.

Dubiatsu dubisi Levi

⁵ Fumu amatsingula Moise rie:

⁶ Kakasana bisi Levi na baIsrael; gukaliomisa bisi Levi.

⁷ Gulu nana gubaliomisila: gukabatsatsa mamba maduliomusu amavu mawelimina utsindula dibumi; bakafuga nyuru tsiogu tsiotsu na basusi biduaru biogu; mbana bobalioma.

⁸ Va julu vana babongi mulumi ngombi na pagu jitsangu ajimasobunu na matsi; na ndeʼ beni gukabonga mulumi ngombi agumubeji upagu jiutsindula dibumi.

⁹ Gukabambasana bisi Levi va gusu Ndagu Yibenguna na gukanengila dibuli diotsu dibaIsrael.

¹⁰ Mbana gukabambasana bisi Levi va gusu Fumu; baIsrael bobasakiga miogu.

¹¹ Aaron oviosa bisi Levi yiari na yiari va gusu Fumu, boba nderi pagu ajimaviunsu na baIsrael; jogu bowakusu o yisalu yiFumu.

¹² Bisi Levi bosakiga miogu miogu va julu tsimiuru mibalumi babangombi; mbana Aaron ovagula umosi pagu jiutsindula dibumi na ususu pagu jiunyensa yiri otsindulila bisi Levi dibumi.

¹³ Gukareliga bisi Levi va gusu Aaron na baana bandi bababaala na gukabaviosa yiari na yiari nderi pagu ajimaviunsu va gusu Fumu.

¹⁴ Anana gulasila duviakusunu va gari bisi Levi na baIsrael basusu; bisi Levi boba abami.

¹⁵ Mbana bisi Levi bana musuga usala yisalu yiogu o Ndagu Yibenguna. Anana gubaliomisila na gukabaviosa yiari na yiari nderi pagu ajimaviunsu va gusu Fumu.

¹⁶ Va gari baIsrael, jogu bamapegu usala tindi yisalu yiami; menu nyimabadila nderi tsomi tsiami, tsomi tsiotsu tsibaIsrael.

¹⁷ Tsomi tsiotsu tsibaIsrael atsiami, nesi tsibatu nesi tsibibulu. Yilumbu ayi nyimabokila tsomi tsiotsu tsiEgypte tsimakwakusu.

¹⁸ Nyimabonga bisi Levi va yivinga yitsomi tsiotsu tsibaIsrael.

¹⁹ Nyimavega bisi Levi ombu Aaron na baana bandi bababaala va gari baIsrael yiri jogu bosala yisalu yibaIsrael o Ndagu Yibenguna; botsindula dibumi dibaIsrael yiri baIsrael bagogaangu ne na yivunga yimosi ava bobambinina na Mbura Nsambi.

²⁰ Moise na Aaron na dibuli diotsu dibaIsrael bamavayila bisi Levi motsu ama Fumu amaruma Moise mu diambu diogu.

²¹ Bisi Levi bamakeliomisa na bamasusa biduaru biogu. Aaron amabaviosa yiari na yiari va gusu Fumu nderi pagu jiuviunsa na amabatsindulila dibumi ubaliomisa.

²² Mbana bisi Levi bamayesala yisalu yiogu o Ndagu Yibenguna o tsi durumu duAaron na baana bandi bababaala. BaAaron bamavayila bisi Levi motsu ama Fumu amaruma Moise.

²³ Fumu amatsingula Moise rie:

²⁴ Bisi Levi, ubanda na abakavu magumabeji na bilima biranu: bokota o yisalu yiNdagu Yibenguna.

²⁵ Ubanda na magumaranu mabilima bovuma, bagomuebisala.

²⁶ Bowamusa bu-uwamusa baana bataji bogu o Ndagu Yibenguna ukipa abimabavegu ukelisa. Anana duvayila mu diambu dibisi Levi na bisalu biogu.