Dutalu 5 - La Sainte Bible en Langue Yipunu

Abamabusu mu diambu dimuinsi

¹ Fumu amatsingula Moise rie:

² Ruma baIsrael ugusula bango nyambi botsu va milaku na uotsu aguvu na suta vo agumanamu muinsi umfumbi.

³ Nesi dibaala nesi mugetu, gukabagusula va milaku yiri bagobivisa milaku mu mbari nyitsani va gari ogu.

⁴ BaIsrael bamadedila na bamabagusula va milaku nana Fumu amarumina Moise.

Nsindululu jidibumi

⁵ Fumu amatsingula Moise rie:

⁶ Tsingula baIsrael rie: Ava mugetu vo dibaala ovayila mutu nandi dibi ana mbela va gusu Fumu.

⁷ Otubula disumu diandi na ogabusa yima yiotsu ayi amadaga ombu fumu yionyi va julu vana osakiga yimosi mu biranu.

⁸ Pa fumu yionyi amafu na vagaa tindi yiburu yiandi, yima yieni ayimadagu yiuba yiFumu, diwendi rie: yiuvegu ombu muvagulitsi upagu. Aguvu na mbela ovagulila Fumu mulumi yindombu utsindula dibumi didisumu diandi.

⁹ Pagu tsiotsu tsibaIsrael tsiuba tsimuvagulitsi upagu agumawakusu tsionyi.

¹⁰ Bima biyingitsi abi bovagulila Fumu biuba bimuvagulitsi upagu na abi bomuvega biuba abiandi wandi.

Mugaga udiwavi vo ubuvuyisa

¹¹ Fumu amatsingula Moise rie:

¹² Tsingula baIsrael rie: Pa mugetu obusa mulumi andi na ewendi kulini;

¹³ na pa mutu ususu ovaga buvuyisa nandi nesi pa mulumi andi agodijaba, diwendi rie: pa okebivisa o musuega na pa bambeji basatsi na pa agotsukugu,

¹⁴ yiotsu ayi mulumi ogaangu na diwavi na etsokili mugatsi andi agumakebivisa vo pa ogaangu na diwavi na etsokili mugatsi andi agumakebivisa vo pa ogaangu na diwavi na etsokili mugatsi andi agusakavaga dibi,

¹⁵ yeri amakebivisa vo asakakebivisa omubega ombu muvagulitsi upagu va mosi na pagu jiyimosi mu digumi yiorsa, agotsatsa matsi muna na agovagula yima yimbunga jiboti mu mbari yivu pagu jidiwavi, diwendi rie: pagu jitsangu ajirangimisi dibi.

¹⁶ Muvagulitsi upagu obega mugetu eni o Ndagu Nsambi nomureliga va gusu Fumu.

¹⁷ Muvagulitsi upagu obonga mamba mayingitsi amavu mu yisanga, obonga difufundu adi ogomba o Mbura Nsambi na odipodula mu mamba.

¹⁸ Muvagulitsi upagu oreliga mugetu eni va gusu Fumu; opusula muru umugetu eni mbana omuwakisa pagu jiyirangumunu, diwendi rie: pagu jidiwavi. Mbana muvagulitsi upagu ogaanga yisanga yimamba manduli va dikaka diandi amerombisi mulogu.

¹⁹ Muvagulitsi upagu olevisa mugetu eni pesi nomutsingula rie: Pa ne dibaala dimosi agaafubana yitsiga nagu, diwendi rie: guisingini yika na mulumi agu, gusakakebivisa; kabogu mamba meni manduli amerombisi mulogu mayagunamusu mulogu.

²⁰ Tumba pa gugesingini yika na mulumi agu, gumakebivisa na guka muinsi na pa dibaala disusu adigaa mulumi agu amafubana yitsiga nagu,

²¹ mbana muvagulitsi upagu olevisa mugetu eni pesi jimulogu na omutsingula rie: Fumu jaʼ beni aguloyi na aguvayi yilogulu va gari batu bagu nosiesisa yiburutsu yiagu norandisa moji agu,

²² yiotsu ayi gunuina mamba memama amerombisi mulogu, moji agu uranda na yiburutsu yiagu yiusiesa! Mbana mugetu ovosa rie: Dibi nana! Dibi nana!

²³ Muvagulitsi upagu osona milogu mieni mu dibuku mbana omitsindula na mamba manduli.

²⁴ Onuisa mugetu eni mamba meni manduli amerombisi mulogu na yiotsu yina momurombisa yika maguga.

²⁵ Muvagulitsi upagu obonga pagu jidiwavi va makaka mamugetu eni mbana oviunsa pagu eni yiari na yiari va gusu Fumu na jiuvagulu va yinyensulu yipagu;

²⁶ muvagulitsi upagu ogusula dikaka dimosi dipagu tsieni adiuba yirangumunu na odinyensa va yinyensulu yipagu va julu vana onuisa mugetu eni mamba.

²⁷ Yiotsu ayi emunuisi mamba meni diulabana yeri mugetu eni amakebivisa na asamasingana yika na mulumi andi; anonu mamba amerombisi mulogu alabingi yika maguga; moji andi uranda, yiburutsu yiandi yiusiesa te na mugetu eni oba yilogulu va gari batu bandi.

²⁸ Tumba pa mugetu eni asamakebivisa na amasingana na mulumi andi, avu alioma, diujabunu yiri ana ndunga na oburanga baana.

²⁹ Aguna la mugaga udiwavi mu diambu dimugetu agugesingini yika na mulumi andi agumakebivisa na buvuyisa,

³⁰ na mu diambu didibaala adimagaangu na diwavi vo aditsokili mugatsi andi; mulumi obega mugetu eni va gusu Fumu na muvagulitsi upagu omudugusulu mugaga eni uotsu.

³¹ Mulumi agoba na mbela mu diambu adiulabana na mugetu; mugetu jaʼ beni owarila mukilu udibi diandi.