Dutalu 35 - La Sainte Bible en Langue Yipunu

Misiengi mibisi Levi

¹ Fumu amavosa na Moise o kumu tsiMoab bebeli na mujamba uJourdain va nsungisini na Jericho. Amavosa rie:

² Ruma baIsrael ugabila bisi Levi misiengi ami jogu borungula utsanina na mbura tsiukelisila bibulu yiari na yiari bimisiengi mieni.

³ Bisi Levi na bategula bogu bodilanga misiengi ami botsaninangana mbura tsiukelisilanga biruitsi biogu, nesi bibulu biotsu bisusu.

⁴ Mbura tsiukelisila bibulu tsimisiengi ami duvega bisi Levi tsiubandila va yivaga yimusiengi te no gusu, tsiuba yibuku yikilumetera.

⁵ Dukaweliga va gusu kana musiengi, kilumetera mosi o yiari ayi wisi epalili, kilumetera mosi wandi o yiari yitandu na kilumetera mosi o yiari ayi wisi ewendisini na kilumetera mosi o yiari yibanda. Musiengi uba o gari. Anana mbura tsiukelisila bibulu tsiubila yiari na yiari bimisiengi.

⁶ Va gari misiengi ami duvega bisi Levi na bategula bogu voba misiengi misiamunu miusuemina ami bikongu borungula usuemina na magumana na misiengi misusu mibeji.

⁷ Dutalu dumisiengi ami duvega bisi Levi adudu: magumana na yinana yimisiengi na mbura tsiogu tsiukelisila bibulu.

⁸ BaIsrael abavu na misiengi mipuela bogabila bisi Levi mipuela na jogu abagaa na misiengi mipuela bobagabila mua misiengi; yifumba yifumba ogabila bisi Levi amimaleba disiala diogu.

Misiengi miusuemina

⁹ Fumu amatsingula Moise rie:

¹⁰ Tsingula baIsrael rie: Ava dusabuyila Jourdain notola o bulongu buCanaan,

¹¹ dukasola misiengi amiuba misiengi mienu miusuemina ami mutu aguboka mutu nandi tsiri na kanda orungula uyesuemina.

¹² Misiengi mieni miuba yisuemunu yienu ava durinina mugabusilitsi upila jimalungu yiri mutu agoboku te na dibuli diuyemutabulila bunsonsi.

¹³ Misiengi misiamunu ami duvega miuba misiengi miusuemina.

¹⁴ Dukavega misiengi mirieru o disimu dina diJourdain na dukavega misiengi mirieru o bulongu buCanaan, mionyi miuba misiengi miusuemina.

¹⁵ Misiengi mieni miuba yisuemunu yibaIsrael nesi muenyi nesi jandi oyitsani nenu: avana mutu uotsu agumaboka mutu nandi tsiri na kanda orungula uyesuemina.

¹⁶ Pa dibaala odimba mutu nandi na yisalulu yibudilu, va julu vana mutu eni ofu, jandi agumamudimba avu yikongu: yikongu aboku.

¹⁷ Pa otinda dimanyi adiuboka mutu, avu yikongu: yikongu aboku.

¹⁸ Pa odimba mutu na nguangu ajiuboka mutu, avu yikongu: yikongu aboku.

¹⁹ Mugabusilitsi upila jimalungu obokisa yikongu; ava obengunina nandi omuboka.

²⁰ Pa dibaala osindila mutu nandi na kabu vo pa oletasa udimba mutu na va julu vana mutu eni ofu,

²¹ pa odimba mutu yigaba na kabu na va julu vana mutu eni ofu, jandi agumamudimba aboku mu mbari avu yikongu: mugabusilitsi upila jimalungu oboka yikongu ava obengunina nandi.

²² Tumba pa dibaala osundila usindila mutu nandi tumba tsiri na kabu vo pa omudimba yima tsiri uletasa,

²³ pa otinda dimanyi tsiri ulaba agu diwendisini na diunamu mutu na mutu eni ofu, tumba pa agabetsi na kabu nandi na agaarombanga uvaga dibi,

²⁴ dibuli diuletsuna diambu nana migaga mimavegulu ujaba yeri agumatinda dimanyi avu awelimina uwakusu ombu mugabusilitsi upila jimalungu.

²⁵ Omukelisa te na omutolisa o musiengi usuemina agu otsanina. Otsana guna te na dufu duyivunda yibavagulitsi bapagu agumawitulu matsi madubiatsu.

²⁶ Pa yikongu ovioga mandilu mamusiengi agu amasuemina,

²⁷ pa mugabusilitsi upila jimalungu obenguna nandi ava amavioyila mandilu mamusiengi agu amasuemina na oboka yikongu, mbela jibukongu bueni jigoba va julu muru umugabusilitsi upila.

²⁸ Diwendi rie: yikongu vengu otsana o musiengi andi agu esuemini te na dufu duyivunda yibavagulitsi bapagu; yivunda yibavagulitsi bapagu anofu, yikongu orungula ugabuga o dimbu diandi.

²⁹ Migaga miemimi mivu mienu na mibaana benu mu mbura tsiotsu atsi dutsaninanga.

³⁰ Pa dibaala oboka mutu riandi avu yikongu, bambeji banosingisila bumbeji yikongu aboku; tumba bumbeji bumutu mosi bugorombisa mutu dufu.

³¹ Duyasinga nyobu mu diambu diyikongu ayivu yiwelimina uboku; jandi aboku.

³² Duyasinga nyobu ajiumurombisa urina o musiengi andi agu esuemini yiri omuetsana o dimbu diandi mbe muvagulitsi upagu asakafu.

³³ Duyabivisa bulongu abu dutsaninanga na malungu mu mbari malungu mebivisi bulongu; bulongu bugorungula utsindulu dibumi dimalungu amamawitulu muna; dibumi diutsindulu yika na malungu majandi agumamawitula.

³⁴ Duyabivisa bulongu abu dutsanina abuna nyirondi utsanina wandi; mu mbari nyivu Fumu oyitsani va gari baIsrael.