Dutalu 33 - La Sainte Bible en Langue Yipunu

Malala mamiendu ubandila dupalulu duEgypte

¹ Guluanu nana baIsrael bamalingila na bagora ava bamapalila o Egypte o tsi durumu duMoise na Aaron.

² Moise amasona malala mogu nana bamarambuyila nana Fumu amamurumina. Amama la malala miogu:

³ Bamarambuyila va Ramses tsungi jitega: yilumbu yiyigumi na biranu ava kedi. Paque jinovioga, baIsrael bamapala na nsangu va misu mabisi Egypte botsu.

⁴ Tumba bisi Egypte utsiga bamatsiganga bamfumbi bogu aba Fumu amabokisa, diwendi rie: tsomi tsiotsu; Fumu amatabulila nsambi tsiogu bunsonsi.

⁵ BaIsrael banorambuyila o Ramses bamayevaga milaku vaSoukot.

⁶ Banorambuyila o Soukot bamayevaga milaku va Etam aguvu o kodu kumu.

⁷ Bamarambuyila o Etam bamageluga o yiari yiPi-Hahirot va nsungisini na Baal-Sefon na bamayevaga milaku va gusu Migdol.

⁸ Bamarambuyila o Pi-Hahirot na bamayevioga va gari mubu o yiari yikumu; bamaviosa bilumbu birieru bimuendu o kumu jiEtam na bamayevaga milaku va Mara.

⁹ Bamarambuyila o Mara na bamatola o Elim; o Elim umaba yigumi na bileka bibeji na magumidusambuali mamambari; avana bamavaga milaku.

¹⁰ Bamarambuyila o Elim na bamayevaga milaku va mugula uMubu uBenga,

¹¹ Bamarambuyila o Mubu uBenga na bamayevaga milaku va kumu jiSin.

¹² Bamarambuyila o kumu jiSin na bamayevaga milaku va Dofca.

¹³ Bamarambuyila o Dofca na bamayevaga milaku va Alouch.

¹⁴ Bamarambuyila o Alouch na bamayevaga milaku va Refidim, batu basamadila mamba monu vana mbura eni.

¹⁵ Bamarambuyila o Refidim na bamayevaga milaku va kumu jiSinai.

¹⁶ Bamarambuyila o kumu jiSinai na bamaye vaga milaku va Quibrot-Taava.

¹⁷ Bamarambuyila o Quibrot-Taava na bamayevaga milaku va Hasserot

¹⁸ Bamarambuyila o Hasserot na bamayevaga milaku va Ritma.

¹⁹ Bamarambuyila o Ritma na bamayevaga milaku va Rimmon-Peres.

²⁰ Bamarambuyila o Rimmon-Peres na bamayevaga milaku va Libna.

²¹ Bamarambuyila o Libna na bamayevaga milaku va Rissa.

²² Bamarambuyila o Rissa na bamayevaga milaku va Quehelata.

²³ Bamarambuyila o Quehelata na bamayevaga milaku va mukongu uChefer.

²⁴ Bamarambuyila o mukongu uChefer na bamayevaga milaku va Harada.

²⁵ Bamarambuyila o Harada na bamayevaga milaku va Maquelot.

²⁶ Bamarambuyila o Maquelot na bamayevaga milaku va Tahat.

²⁷ Bamarambuyila o Tahat na bamayevaga milaku va Tera.

²⁸ Bamarambuyila o Tera na bamayevaga milaku va Mitca.

²⁹ Bamarambuyila o Mitca na bamayevaga milaku va Hachemona.

³⁰ Bamarambuyila o Hachemona na bamayevaga milaku va Mosserot.

³¹ Bamarambuyila o Mosserot na bamayevaga milaku va Bene-Yacan.

³² Bamarambuyila o Bene-Yacan na bamayevaga milaku va Hor-Guidgad.

³³ Bamarambuyila o Hor-Guidgad na bamayevaga milaku va Yotbata.

³⁴ Bamarambuyila o Yotbata na bamayevaga milaku va Abrona.

³⁵ Bamarambuyila o Abrona na bamayevaga milaku va Ession-Gueber.

³⁶ Bamarambuyila o Ession-Gueber na bamayevaga milaku va kumu jiTsin; ajivu Cades.

³⁷ Bamarambuyila o Cades na bamayevaga milaku va mukongu uHor o mandilu mabulongu buEdom.

³⁸ Aaron muvagulitsi upagu amamata o julu mukongu uHor nana Fumu amamurumina; aguna amayefuila mu yilima yimagumana yiotsu ayi baIsrael bamapalila o bulongu buEgypte, mu tsungi jimuranu mu yilumbu yitega yitsungi eni.

³⁹ Aaron amaba na kama na magumabeji na bilima birieru ava amafuila o julu mukongu uHor.

⁴⁰ Kaga jiArad muisi Canaan agumatsananga o tandu jibulongu buCanaan amagulu durugu dubaIsrael.

⁴¹ Bamarambuyila o mukongu uHor na bamayevaga milaku va Salmona.

⁴² Bamarambuyila o Salmona na bamayevaga milaku va Punon.

⁴³ Bamarambuyila o Punon na bamayevaga milaku va Obot.

⁴⁴ Bamarambuyila o Obot na bamayevaga milaku va Ye-Abarim o mandilu maMoab.

⁴⁵ Bamarambuyila o Ye-Abarim na bamayevaga milaku va Dibon-Gad.

⁴⁶ Bamarambuyila o Dibon-Gad na bamayevaga milaku va Almon-Diblataim.

⁴⁷ Bamarambuyila o Almon-Diblataim na bamayevaga milaku va mikongu miAbarim va gusu Nebo.

⁴⁸ Bamarambuyila o mikongu miAbarim na bamayevaga milaku va kumu tsiMoab bebeli na mujamba uJourdain va nsungisini na Jericho.

⁴⁹ Bamavaga milaku va disimu diJourdain ubandila o Beth-Yechimot te no Abel-Chittim o kumu tsiMoab.

Marama maFumu ugaba bulongu buCanaan

⁵⁰ Fumu amavosa na Moise o kumu tsiMoab va disimu diJourdain va nsungisini na Jericho. Amamuruma utsingula baIsrael rie:

⁵¹ Ava dusabuyila Jourdain na ava dutolila o bulongu buCanaan,

⁵² dubinga bisi bulongu botsu; dubunga bakosi botsu bamamanyi; dubunga bibagunu biotsu bibudilu; dubunga mbura tsiogu tsiotsu tsiduyitsu.

⁵³ Jenu dudila bulongu na dutsana muna; nyimaduvega bulongu yiri buba abuenu.

⁵⁴ Dugabana bulongu na mbanda muna mikuta mienu na muna bifumba bienu; jogu abavu dutalu duneni dukabavega yiasi yibulongu yineni, jogu abavu mua dutalu dugeyi dukabavega yiasi yibulongu yigeyi. Mukuta mukuta udila abugusolulu na mbanda; buba abuenu muna bifumba bibataji benu.

⁵⁵ Tumba pa dugolebinga bisi bulongu, jogu aba dusila muna boba nderi badoba mu misu menu na nderi musoba dubansi mu mbansi tsienu. Boba bavinitsi benu o bulongu abu dutsaninanga.

⁵⁶ Mbana nyuduvayila nana nyimatasila ubavayila.