Dutalu 32 - La Sainte Bible en Langue Yipunu

Bifumba birieru utsana betsani o yiari ayi wisi epalili yimujamba uJourdain

¹ Baana bababaala baRuben na baana bababaala baGad bamaba na migamba mineni kabogu bamalaba yiri dilongu diYazer na dilongu diGalaad mamaba mawelimina ukelisa migamba miogu.

² Kabogu baana bababaala baGad na baana bababaala baRuben bamawenda ombu Moise na Elazar, muvagulitsi upagu na baana babakaga badibuli na bamabatsingula rie:

³ Atarot na Dibon na Yazer na Nimra na Hechebon na Elale na Sebam na Nebo na Beon,

⁴ malongu meni ama dibuli diIsrael bamadilila na mangolu Fumu mavu mawelimina na migamba mibiruitsi na jetu tuna migamba mibiruitsi mipuela.

⁵ Bamabuela rie: Pa tumalabu bawelimina nenu, malongu memama mavegu ombu getu na guyatuviosa o mujamba uJourdain.

⁶ Moise amawivula baana bababaala baGad na baana bababaala baRuben rie: Baana bataji benu bowenda o utoga divita na jenu dusiala vava?

⁷ Dibandu yi duirondili ututsa baIsrael yiri bayawenda o bulongu abu Fumu ebaveyi?

⁸ Anana bataji benu bamavayila ava nyimabasindiyila o Cades-Bamea uyesieenga bulongu.

⁹ Bamawenda te na yibususu yiEchekol na banomana usieenga bulongu bamatutsa baIsrael uwenda o bulongu abu Fumu amabavega.

¹⁰ Kabu jiFumu jimaranga muna yilumbu yieni na amaleva rie:

¹¹ Babaala beni abamapalila o Egypte, ubanda na abakavu na magumabeji mabilima ne uviolila bagolaba bulongu abu nyimavangana uvega Abraham na Isaac na Jacob mu mbari jogu basamadedila diufi diami na murima umosi.

¹² Yika Caleb muana dibaala uYefounne muisi Quenaz na Josue muana dibaala uNoun bokota, jogu abamadedila diufi diFumu na murima umosi.

¹³ Fumu amanyoyila baIsrael tindi kabu na amabalinsa o kumu te na magumana mabilima te na dukulu duotsu dumabungu, adumavaga dibi va gusu Fumu.

¹⁴ Dibuli, duivayi dibi dedi mosi na bataji benu te na Fumu onyoyila baIsrael tindi kabu.

¹⁵ Pa jenu baRuben na baGad dumuliyila nsima jaʼ wandi osila baIsrael mutubu o kumu na durombisa dubungu dubatu beni botsu.

¹⁶ Bamabambana ombu Moise na bamavosa rie: Tsiri nana, turungila migamba mietu mibiruitsi bivanga vava na turungila abetu misiengi.

¹⁷ Mbana tukunsama mbangu mbangu uyetoga divita va mosi na baIsrael te na tubatolisa o malongu mogu. Tumba abetu batsani o misiengi mikandu mu diambu dibisi bulongu.

¹⁸ Tugogabuga o mandagu metu te na baIsrael botsu bodila makabu mogu madisiala.

¹⁹ Jetu nogu tugoba na yima ne yimosi o disimu dina diJourdain nesi o tindi vala mu mbari jetu tudilila disiala dietu o disimu diedidi diJourdain o yiari ayi wisi epalili.

²⁰ Moise amabatsingula rie: Pa duivayi nana na pa duireyili va gusu Fumu uyetoga,

²¹ pa jenu botsu duba dukunsama utoga divita, dusabuga Jourdain mbana va gusu Fumu dugoba na nsiembu na jaʼ beni obinga bavinitsi bandi.

²² Pa dugabuga yika ava bulongu bubila o tsi durumu duFumu kabogu dugoba na nsiembu va gusu Fumu na va gusu Israel na Fumu odusingisa utsana o malongu memama motsu.

²³ Tumba pa dugevayi nana kabogu dibi duivayi va gusu Fumu; jabanu rie: dibi dienu diududala.

²⁴ Rungilanu a benu misiengi na rungilanu migamba mienu mibiruitsi bivanga, duyalibana adi dumavangana.

²⁵ Baana bababaala baGad na baana bababaala baRuben bamatsingula Moise rie: Jetu tuvaga adi Fumu erumi.

²⁶ Baana betu na bagatsi betu na migamba mietu mibiruitsi bosiala o misiengi miGalaad

²⁷ na jetu botsu tuba tukunsama utoga divita, tuyetoyila va gusu Fumu nana guivosili.

²⁸ Moise amavega maruma mu diambu diogu ombu Elazar, muvagulitsi upagu nombu Josue muana dibaala uNoun nombu bivunda bimikuta mibifumba biIsrael.

²⁹ Amabatsingula rie: Pa baana bababaala baGad na baana bababaala baRuben bodusabusa Jourdain na botsu boba bakunsama uyetoga divita va gusu Fumu na pa bulongu buba o tsi durumu duenu dukabavega dilongu diGalaad, diuba diogu.

³⁰ Tumba pa bagewendi nenu o utoga divita kabogu bakatsana va mosi nenu o bulongu buCanaan.

³¹ Baana bababaala baGad na baana bababaala baRuben bamamuewaka rie: Tuvaga adi Fumu atsivosa netu.

³² Tuvioga na bitogulu va gusu Fumu o bulongu buCanaan tumba tuirondi udilila disiala o disimu diedidi diJourdain.

³³ Moise amavega baana bababaala baGad na baana bababaala baRuben na dikabu dimosi diyifumba yiManasse, diwendi rie: baana bababaala baJoseph bufumu buSihon, kaga jibaAmor na bufumu buOg kaga jiBachan na misiengi miotsu na biari na biari.

³⁴ Baana bababaala baGad bamamuerunga Dibon na Atarot na Aroer,

³⁵ na Atarot-Chofan na Yazer na Yogbaha

³⁶ na Bet-Nimra na Bet-Haran, misiengi amimakandu na bamarungila migamba mibiruitsi bivanga wandi.

³⁷ Baana bababaala baRuben bamamuerunga Hechebon na Elale na Quiriataim,

³⁸ na Nebo na Baal-Meon, amamavinsu miina na Sibma na bamaluga misiengi ami bamarunga miina.

³⁹ Baana bababaala baMakir na baana bababaala baManasse bamatoyisa bisi Galaad na bamabapatula biogu; bamabinga baAmor abamaba guna.

⁴⁰ Moise amavega musiengi uGalaad ombu Makir na baana bababaala baManasse abamayetsana guna.

⁴¹ Yair muana dibaala uManasse amayebatoyisa na amabapatula misiengi na amamiluga misiengi miYair.

⁴² Noba amayebatoyisa; amabapatula mbura ajinengulungu Quenat na misiengi miyiari yieni; amamiluga diina diandi.