Dutalu 3 - La Sainte Bible en Langue Yipunu

Bisalu biyifumba yiLevi

¹ Agugu la mukuta uAaron na uMoise va temu aji Fumu amavosila na Moise o julu mukongu uSinai.

² Aaron amabura baana bana bababaala: tsomi andi, Nadab na Abihou na Elazar na Itamar.

³ Baana bababaala baAaron bamabiatsu bavagulitsi bapagu nowakusu yisalu yibuvagulitsi bupagu:

⁴ tumba Nadab na Abihou bamafuila va gusu Fumu ava bamabangisila muji ungana va gusu Fumu o kumu jiSinai. Basamabura baana kabogu yika Elazar na Itamar bamasiala usala yisalu yibuvagulitsi bupagu va misu mataji ogu Aaron.

⁵ Fumu amatsingula Moise rie:

⁶ Bega yifumba yiLevi va gusu Aaron muvagulitsi upagu yiri bomusalila.

⁷ Jogu bomusalila abimamuvegu usala na bosalila dibuli diotsu va gusu Ndagu Yibenguna na bosalanga yisalu o Mbura Nsambi.

⁸ Bokelisanga bisalulu biotsu biNdagu Yibenguna na bosalanga abi baIsrael bobavega nobasalilanga yisalu o Mbura Nsambi.

⁹ Gukavega bisi Levi botsu ombu Aaron nombu baana bandi bababaala, bovegu tindi uvegu na baIsrael ubasalila yisalu yiogu o Mbura Nsambi.

¹⁰ Yika Aaron na baana bandi bababaala bana musuga uyisalu yibuvagulitsi bupagu; muenyi agubemba yisalu yibuvagulitsi bupagu aboku.

¹¹ Fumu amatsingula Moise rie:

¹² Gulu, nyimabonga bisi Levi va gari baIsrael va yivinga yitsomi tsiotsu, diwendi rie: tsomi tsibaIsrael; bisi Levi bobanganga abami.

¹³ Tsomi tsiotsu tsivu tsiami; yilumbu ayi nyimabokila tsomi tsiotsu o bulongu buEgypte nyimakedilila tsomi tsiotsu tsiIsrael nesi tsibatu nesi tsibibulu, tsiubanganga atsiami. Menu la Fumu.

Sansama jitega jiyifumba yiLevi

¹⁴ Fumu amatsingula Moise ava amabila o kumu jiSinai rie:

¹⁵ Sansama bisi Levi muna mandagu mabataji bogu na muna mikuta miogu; gukasona miina mababaala botsu ubanda na baana bababaala abakavu tsungi mosi.

¹⁶ Moise amavaga sansama nana Fumu amamurumina.

¹⁷ Amama la miina mabaana bababaala baLevi: Guerchon na Quehat na Merari.

¹⁸ Miina mabaana bababaala baGuerchon na mikuta miogu amama: Libni na Chimei.

¹⁹ Miina mabaana bababaala baQuehat na mikuta miogu amama: Amram na Issar na Hebron na Ouziel;

²⁰ miina mabaana bababaala baMerari na mikuta miogu amama: Mali na Mouchi; abina la bifumba biLevi na mandagu mabataji bogu.

²¹ Mukuta uLibni na mukuta uChimei mimapalila mu Guerchon, botsu bana bamaba mikuta miGuerchon.

²² Jogu abamasansumu ava bamarangila babaala botsu ubanda na baana abakavu na tsungi mosi, dutalu duogu dumaba yisambuali yitosini na kama yiranu.

²³ Mikuta miGuerchon mimavaganga milaku o nsima Ndagu Yibenguna o yiari ayi wisi ewendisini.

²⁴ Yivunda yindagu jibataji baGuerchon yimaba Eliassaf muana dibaala uLael.

²⁵ Bamavega baana bababaala baGuerchon yisalu ukelisa Ndagu Yibenguna, nesi ndagu jitsanda nesi mfunga nesi tsanda ajivu va dikotulu diNdagu Yibenguna;

²⁶ nesi matsanda madulombili nesi madikotulu didulombili yiari na yiari biNdagu Yibenguna nesi yinyensulu yipagu nesi mikudu miotsu mibisalu biNdagu Yibenguna.

²⁷ Mukuta uAmram na ulssar na uHebron na uOuziel mimapalila mu Quehat, botsu bana bamaba mikuta miQuehat.

²⁸ Bamatala babaala botsu ubanda na baana abakavu na tsungi mosi, dutalu duogu dumaba yinana yitosini na kama yisiamunu abamavegu yisalu yiMbura Nsambi.

²⁹ Mikuta mibaana babaala baQuehat mimavaganga milaku o yiari yitandu yiNdagu Yibenguna.

³⁰ Yivunda yindagu jibataji baQuehat yimaba Elissafan muana dibaala uOuziel.

³¹ Bamavegu yisalu ukelisa yigara yipangini na tavula na dingasa na binyensulu bipagu na bisalulu biMbura Nsambi abimasalulu bisalu na dumbu na biotsu bisusu.

³² Yivunda yibivunda bibisi Levi yimaba Elazar muana dibaala uAaron muvagulitsi upagu; amaba na musuga uruma babaala abamasalanga o Mbura Nsambi.

³³ Mukuta uMali na uMouchi mimapalila mu mikuta miMerari, botsu bana bamaba mikuta miMerari.

³⁴ Jogu abamasansumu ava bamarangila babaala botsu ubanda na baana abakavu na tsungi mosi, dutalu duogu dumaba tosini yisiamunu na kama beji.

³⁵ Yivunda yibivunda bimikuta miMerari yimaba Souriel muana dibaala uAbihail. Bamavaganga milaku o yiari yibanda yiNdagu Yibenguna.

³⁶ Bamavenga baana bababaala baMerari yisalu yiukelisa tsimbi tsiNdagu Yibenguna na baweleti na makutu na mabandu na bisalulu bijionyi na biotsu bisusu;

³⁷ na makutu madulombili yiari na yiari na mabandu mamakutu na makutu mageyi na mikudu mimonyi.

³⁸ Moise na Aaron na baana bandi bababaala bamavaganga milaku va gusu Ndagu Nsambi o yiari ayi wisi epalili va gusu Ndagu Yibenguna, jogu bamaba na yisalu yiukelisa Mbura Nsambi va yivinga yibaIsrael; muenyi agubemba yisalu yibuvagulitsi bupagu, aboku.

³⁹ Bisi Levi botsu aba Moise na Aaron bamasansama na musuga uFumu muna mikuta miogu, babaala botsu ubanda na baana abakavu na tsungi mosi, dutalu duogu dumaba magumabeji na tosini beji.

Nyobu tsitsomi

⁴⁰ Fumu amaruma Moise rie: Sansama tsomi tsiotsu tsibabaala tsibaIsrael ubanda na baana abakavu na tsungi mosi, gukabasona miina mogu.

⁴¹ Gukatangila bisi Levi va yivinga yitsomi tsibaIsrael. Menu la Fumu. Munongu mosi gukaranga biruitsi bibisi Levi va yivinga yitsomi tsibiruitsi bibaIsrael.

⁴² Moise amavaga sansama jitsomi tsiotsu tsibaIsrael nana Fumu amamurumina.

⁴³ Tsomi tsiotsu tsibabaala tsimasansumu na miina mogu ubanda na baana abakavu na tsungi mosi, dutalu duogu dumaba magumabeji na tosini beji na kama beji na magumidusambuali na batu barieru.

⁴⁴ Fumu amatsingula Moise rie:

⁴⁵ Bonga bisi Levi botsu va yivinga yitsomi tsiotsu tsibaIsrael na biruitsi bibisi Levi va yivinga yibiruitsi bibaIsrael. Bisi Levi boba abami. Menu la Fumu.

⁴⁶ Mu diambu dinyobu jikama beji na magumidusambuali na tsomi tsibaIsrael yirieru abeviolili dutalu dubisi Levi,

⁴⁷ guvonda mutu mutu mbongu yiranu tsilora jivema; gukatsibonga nana mbongu tsiMbura Nsambi: utsira utsionyi uvu yigumi yigarama.

⁴⁸ Gukavega mbongu tsieni ombu Aaron na baana bandi bababaala, nyobu tsidutalu aduiviolili dutalu dubisi Levi.

⁴⁹ Moise amabonga mbongu tsinyobu tsidutalu adumaviolila bisi Levi;

⁵⁰ amabonga mbongu tsitsomi tsibaIsrael: tosini na kama yirieru na magumasiamunu na mbongu yiranu; mbongu tsiMbura Nsambi.

⁵¹ Moise amavega mbongu tsinyobu ombu Aaron na baana bandi bababaala nana Fumu amamurumina.