Dutalu 21 - La Sainte Bible en Langue Yipunu

BaIsrael udila bedili bisi Canaan na misiengi miogu

¹ Kaga jiArad, muisi Canaan agumatsananga o tandu amagulu rie: BaIsrael uruga beruyi mu nsila jiAtarim. Amatoyisa baIsrael na amakotisa bamosi o tsugu.

² Mbana baIsrael bamavangana pangini na Fumu rie: Pa gutuwakisa batu beni tupansa tindi upansa misiengi miogu.

³ Fumu amagulu diufi dibaIsrael na amabawakisa bisi Canaan. BaIsrael bamababoka na bamapansa tindi upansa misiengi miogu; mbana bamaluga mbura eni Horma, divindugulu rie: dubungu.

Banyoga

⁴ BaIsrael bamagusuga o mukongu uHor, bamavioyila mu nsila jiMubu uBenga, uyenatsiengila bulongu buEdom, bamaba na mirima o julu mu nsila.

⁵ Bamatatila Nsambi na Moise na bamawivula rie: Dibandu yi dumatupalisila o bulongu buEgypte uyitubokisa o kumu? Biguji bigatsi na mamba magatsi na va julu vana tugerondi biguji biebibi.

⁶ Mbana Fumu amatinda banyoga; banyoga beni bamagaka baIsrael; bapuela bapuela bamafu.

⁷ BaIsrael basusu bamawenda ombu Moise novosa rie: Tumavaga dibi mu mbari tumatatila jenu na Fumu. Sambila Fumu yiri okakasana banyoga bebaba netu. Moise amabasambilila.

⁸ Fumu amaruma Moise rie: Vaga nyoga jikunga nojivakiga mu nguangu; mutu uotsu agumagaku na nyoga ava ogengilila nyoga aji guvaga osaguga.

⁹ Moise amavaga nyoga jikunga, amajivakiga mu nguangu na mutu uotsu agumagaku na nyoga, ava amagengilila nyoga jikunga amasaguga.

Miendu te na bamatola o mukongu uPisga

¹⁰ BaIsrael bamawenda na bamayevaga milaku o Obot.

¹¹ Bamagusuga va Obot na bamayevaga milaku o Ye-Abarim o kumu ajivu jisungasana na Moab o yiari ayi wisi epalili.

¹² Bamarambuyila vana na bamayevaga milaku o yibususu yiZered.

¹³ Bamarambuyila vana na bamayevaga milaku o disimu dina diAmon, mujamba aguvu o kumu na uipalili o bulongu bu Amor; Amon uvu mandilu maMoab, va gari Moab na Amor.

¹⁴ La dibandu dimavosulu mu dibuku diMavita maFumu rie: Vaheb o Soufa na mipupila miAmon,

¹⁵ na yivela yimipupila ayivindimi o yiari yiAr yitoli te no mandilu maMoab.

¹⁶ Avana bamarambuyila uwenda o Beer. Avana Beer eni Fumu amammina Moise rie: Gukiga batu na nyubavega mamba.

¹⁷ Mbana baIsrael bamawimbila duimbu duedudu rie: Biduna basanu! Wimbilanu umuyitsa!

¹⁸ Biduna abi baana babasefu bamatima! Abi bivunda bamatima na pangu tsiogu, nesi nguangu tsiogu! Bamarambuyila o kumu te no Mattana;

¹⁹ bamarambuyila o Mattana, bamawenda te no Nahaliel; bamarambuyila o Nahaliel, bamawenda te no Bamot;

²⁰ bamarambuyila o Bamot, bamawenda te no yibususu ayivu o bulongu buMoab o julu mukongu uPisga, ava guigengilili o yiari yikumu.

BaIsrael udila bedili Sihon na Og

²¹ BaIsrael bamatinda bilumbi ombu Sihon kaga jiAmor uyemutsingula rie:

²² Tusingisa uvioyila o bulongu buagu; tugokota o manungi maminongu na minongu na tugonu mamba mabiduna bienu; tuvioyila mu nsila jikaga te na tuvioga bulongu buagu.

²³ Sihon asamasingisa baIsrael uvioyila o bulongu buandi; amagukiga bagora bandi botsu na amayebengusana baIsrael o kumu; amatola o Yahas na amatoyisa baIsrael.

²⁴ BaIsrael bamamuboka na bamabonga bulongu buandi ubandila o Amon te no Yabboc nesi te no mandilu makandu mabisi Ammon.

²⁵ BaIsrael bamabonga misiengi miotsu na bamatsana muna o Hechebon nesi o mimbu amamabambana na uonyi.

²⁶ Hechebon umaba musiengi uSihon kaga jiAmor; jandi agumatoga divita na kaga jitega jiMoab na amamupatula bulongu buandi buotsu te no Amon.

²⁷ La dibandu basavitsi batsavu bamasava rie: Wendanu o Hechebon! Musiengi uSihon umuerungu nokandu!

²⁸ Muji uHechebon umalula, diwendi rie: mulutsu umusiengi uSihon; Umasielasana Ar-Moab, nesi bafumu bamikongu miAmon!

²⁹ Muna maguga ma ombu gagu Moab! Jenu bisi Kemoch duisaa na mangolu! Amavaga baana bandi bababaala barinitsi, amawakisa baana bandi babagetu o buviga ombu Sihon kaga jiAmor.

³⁰ Tumabatindila mbansa tsietu: ubandila o Hechebon te no Dibon biotsu bimabunga; Tumabunga biotsu te no Nofa na muji umanyensa te no Medeba.

³¹ Kabogu baIsrael bamakota utsana o bulongu buAmor.

³² Moise amasindiga batu uyesieenga Yazer, baIsrael bamabapatula uonyi na mimbu amamabambana na bamabinga bisi Amor abamatsananga guna.

³³ Mbana bamavinga yiari yisusu, bamavioyila o nsila jiBachan. Og kaga jiBachan amababengusana na bagora bandi botsu uyebatoyisa o Edrei.

³⁴ Fumu amatsingula Moise rie: Guyamulaba goma mu mbari nyimamuwakisa ombu gagu, jandi na bagora bandi botsu na bulongu buandi; gumuvayila munongu mosi nana gumavayila Sihon kaga jiAmor agumatsaninanga o Hechebon.

³⁵ BaIsrael bamabetsa Og na baana bandi bababaala na bagora bandi botsu ne umosi va gari ogu amarina, jogu bamamupatula bulongu buandi.